Números 4
4
Irantayeteri ishanincapeeni Leví.
1-3Ari iquenquetsatacaajiri Tasorentsi Moiseshi jeri Aarón, icantiri:
“Nocoi pisanquenatacojeiteri ishanincapeeni Quehat, pinashitacaajeitaqueari ishanincasanoripee moncarayetaquerori 30 irosati 50 irosarentsite, antaveetatsineri Pancotsiqui pampatotimentantanari.”
4“Ora iranteri ishanincapeeni Quehat, iramenacoventero noameetsatasanotaqueri catsini. 5Ariorica povacaajeitanajeari pishanincapee, yora Aarón jeri itomipee irio paencareanajerone oticaashiro pinqueapinitironta Nonantari cameetsatasanotatsiri. Impoiji impashicantearo Cajón onantari Nocantacantiri. 6Aisati impashicantearo jentari meshinantsi jenioquiji. Impoiji irimaroncantearo apatsarancaroni teera quitioncamaonirori aisati irisaquiintero inchaquii iranatacotantearori. 7Irosati quitioncamaonirori irimaroncantaquearo meesa, impoiji iroanqueyetero peraatopee, cocharapee, vaasojaniquipee jero otimantari ovaja. Aisati iroori tanta yamapiniyeetanari. 8Irosati impashitacotantaquearo quitioncamaori teera, aisati impashicantearo jentari meshinantsi. Irosati irisaquiintantaquearo inchaquii iranatacotantearori. 9Impoiji iraye aisati teera quitioncamaonirori, impashicantearo inantari tsiorontsipee, tenazapee, platiyopee jero maaroni vaasojaniquipee yoantayetari quejitsi. 10Irosati irampinaicacotantaquearo maaroni jentari meshinantsi aisati iroayetaque inchaquii iranatacotantearori.
11“Aisati iraye teera quitioncamaonirori, impashicantearo altar vetsicachari oro. Impoiji irampinaicacotantaquearo jentari meshinantsi aisati irisaquiintero inchaquii iranatacotantearori. 12Impoiji iraayetajero maaroni yantaveetantayetari Nonantariqui irovayetero quitioncamaoniroriqui teera, irosati irampinaicacotantaquearo jentari meshinantsi, impoiji iroayetero inchaquii iranatacotantearori. 13Ocameetsati irisheyetajeri quejitsi aisati samampo timatsiri antearoqui altar, impoiji impashicantearo teera potsotimaotasanotatsiri. 14Irosati iroanquetantaquearo maaroni yantaveetantayetari altariqui: itaantayetarori casancari, teneroripee, paarapee, tazón aisati maaroni ashiyetari altar. Irosati impashicantaquearo jentari meshinantsi aisati irisaquiintero inchaquii iranatacotantearori. 15Ariorica intsoncayetaquero Aarón aisati itomipee irovetsicayetaquero maaroni cameetsatasanoyetatsiri nonashitacaari aisati vetsicajeitanaquempi poaajeitantanajeari, irosati impocajeitantaquea iriori ishanincapeeni Quehat iraajeitantanaquearori maaroni ocapee. Eiroquea yantayetirotsi nonashitacaasanoyetari, icamajeiticari. Maaroni timayetatsiri Pancotsiqui papatotimentantanari, iriojeitaque aapiniterone ishanincapeeni Quehat. 16Yora Eleazar itomi antaveetatsiri Aarón, iriotaque amenerine quejitsi oijaapiniterine, aisati casancavaneri jero oitsoqui panquirentsipee yamapiniyeetanari jeri quejitsi nonashitacaari. Aisati iramenero Nonantari jero maaroni timayetatsiri cameetsatasanoyetatsiri nonashitacaayetari.”
17-18Ari icantiri aisati Tasorentsi Moiseshi jeri Aarón:
“Eiro pishinetiritsi ishanincasanoripeeni Quehat intsoncajeitea incamimojeiteri ishanincapee. 19Eiro noasanquetantaritsi noamaimenteri irantaquerorica nonashitacaasanoyetari, ocameetsati incanteri Aarón aisati itomipee aparopeeni paitarica iranteri aisati paitarica iraapiniteri. 20Eiroquea iqueashitantatsi iramenero cameetsatasanoyetatsiri nonashitacaari, icamajeiticari.”
21-23Icantiri aisati Tasorentsi Moiseshi:
“Pisanquenatacojeiteri iriori ishanincapeeni Guersón pinashitacayetaqueari ishanincasanoripee moncarayetaquerori 30 irosati 50 irosarentsite, antaveetatsineri Pancotsiqui papatotimentantanari.”
24“Jeroca irantayeteri iriori ishanincapeeni Guersón: 25iraapinitero maaroni oticaashiropee Pancotsi papatotimentantanari, jeri meshinantsi jentari yoicoyeetirori jenoqui aisati, oticaashiro piqueapinitantarori, 26aisati oticaashiropee oyaaraiterite jero oticaashiro piqueapinitantarori oyaaraiterite shoncarori Nonantari, jero iroori altar, aisati oviritsatepee jero maaroni yantaveetantayetari. 27Yora Aarón aisati itomipee iriotaque canterine paitarica irantayeteri aisati iraapiniteri. Iriotaque canterine irimajeitantearori paitapeerica irantajeiteri. 28Irotaque irantayeteri ishanincapeeni Guersón Pancotsiqui papatotimentantanari, irio cantayeterine Itamar itomi antaveetatsiri Aarón.
29-30“Aisati pisanquenatacojeiteri ishanincapeeni Merari pinashitacayetaqueari ishanincasanoripee moncarataquerori 30 irosati 50 irosarentsite, antaveetatsineri Pancotsiqui papatotimentantanari. 31-32Jero irantayeteri iriori: irio aapiniterone taaverapee, atancotashiropee, otincamipee, yoashiyetirori ocatiantari, otincamijaniquipee oyaaraiteritequiniri shoncarori Nonantari jero yoashiyetirori ocatiantari, yoatiashijaniquiyetirori jero oviritsatepee aisati maaroni yantaveetantayetari. Avirotaque cantasanoterine aparopeeni ovajiropee paitarica iraapiniyeteri. 33Irotaque oca irantayeteri maaroni ishanincapeeni Merari, iramenero Pancotsi papatotimentantanari, irio cantayeterine Itamar, itomi antaveetatsiri Aarón.”
34-36Yora Moiseshi aisati Aarón jeri jivatacaajeitiriri ishanincapee, isanquenatacojeitaqueri ishanincapeeni Quehat inashitacaayetacari ishanincasanoripee moncarayetaquerori 30 irosati 50 irosarentsite. Iriotaque antaveetatsine Pancotsiqui apatotimentantariri Tasorentsi icarajeitaque shiramparipee 2,750 yapatoanaca. 37Aitaque icarajeitaqueri ishanincapeeni Quehat antaveetatsineri Pancotsiqui apatotimentantariri Tasorentsi, isanquenatacotacantaqueri Moiseshi aisati Aarón. Imoncarataquero icantaqueriri Tasorentsi.
38-40Jeri iriori ishanincapeeni Guersón, inashitacaayetacari ishanincasanoripee moncarayetaquerori 30 irosati 50 irosarentsite, antaveetatsineri Pancotsiqui apatotimentantariri Tasorentsi, icarajeitaque 2,630. 41Aitaque icarajeitaqueri isanquenatacotacantaqueri Moiseshi jeri Aarón, imataquero icantaqueriri Tasorentsi.
42-44Impoiji iriori ishanincapeeni Merari, inashitacaayetacari ishanincasanoripee moncarayetaquerori 30 irosati 50 irosarentsite, antaveetatsineri Pancotsiqui apatotimentantariri Tasorentsi, icarajeitaque 3,200. 45Aitaque icarajeitaqueri isanquenatacotacantaqueri Moiseshi jeri Aarón. Imoncarataquero icantaqueriri Tasorentsi.
46-48Aitaque icarajeitaqueri yapatoajeitanaca ishanincapeeni Leví, isanquenatacotacantaqueri Moiseshi jeri Aarón aisati jivatacaajeitiriri ishanincapee. Inashitacaayetacari ishanincasanoripee moncarayetaquerori 30 irosati 50 irosarentsite, antaveetatsineri Pancotsiqui apatotimentantariri Tasorentsi, icarajeitaque 8,580. 49Iro isanquenatacotacantajeitantacariri ishanincapee icantaqueri Tasorentsi Moiseshi. Aisati icantayetaqueri paitarica irantayeteri aparopeeni, aisati iraapiniyeteri. Imoncarataquero icantaqueriri Tasorentsi.
Currently Selected:
Números 4: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
