Números 3
3
Irantayeteri ishanincapeeni Leví.
1Anta toncaariqui Sinaí iquenquetsatacantacariri Tasorentsi Moiseshi, irojeitaque ivajiropee ishanincapeeni Aarón aisati Moiseshi: 2Jero ivajiro itomipee Aarón: Nadab jivatatsiri itimi, impoiji Abiú, Eleazar jeri Itamar. 3Icarajeitaque 4, iriojeitaque inashitacaacari antaveetatsiri, antaveetenerine Tasorentsi. 4Iro cantaincha yora Nadab jeri Abiú icamaque caaraiteriqui Sinaí, itaashitacanari Inantariqui Tasorentsi caari icoacairi. Te intimajeiteji itomipee. Irosati yora Eleazar jeri Itamar yantaveetantacanari Tasorentsi, yoametaqueri iriri Aarón.
5-6Ari iquenquetsatacaajiri Tasorentsi Moiseshi, icantiri:
“Pincajemeri ishanincapeeni Leví impocajeiteta, iramitacoteri antaveetatsiri Aarón. 7Irantayeteneri Aarón aisati maaroni pishanincapee anta Pancotsiqui papatotimentantanari aisati iramenayetero timayetatsiri Nonantariqui. 8Aisati irishentero yantaveeyetantari timatsiri Pancotsiqui papatotimentantanari aisati iramitacoteri ishanincapee anta Nonantariqui. 9Pinashitacayeari ishanincapeeni Leví, iriotaque amitacoterine Aarón aisati itomipee, eiro iquempejeitaritsi pashinipee pishaninca. 10Yora irishanincajeitajeari Aarón iriotaque nocoacaasanotaqueri antaveetatsiri. Jaanicarica antaveetashitachane coatsiri inquempetearime antaveetatsiri, ocameetsati iroyeeteri.”
Yashitacari Tasorentsi ishanincapeeni Leví.
11-12Ari icantajiri aisati Tasorentsi Moiseshi:
“Maaroni pishanincapee picarajeitiri, nocoyeaqueri ishanincapeeni Leví pinaajeitajerineri itomipee pishaninca jivayetatsiri itimi; iriojeitaque nashi. 13Tempa nashijeititacari, noamaajeitantacariri itomipee egiptosati jivayetatsiri itimi. Irintiquea itomipee pishaninca nonashitacaajeitacari jivayetatsiri itimi aisati iriori irijani ivirapee. Irotaque nashijeitantacariri; tempa narotaque Tasorentsi.”
Isanquenatacotaqueri ishanincapeeni Leví.
14-15Ari icantiri aisati Tasorentsi Moiseshi caaraiteriqui Sinaí:
“Nocoi pisanquenatacojeiteri iriori ishanincapeeni Leví, pinashitacayetaqueari ishanincasanoripee. Pisanquenatacojeiteri maaroni shiramparipee iroaquera timayetatsiri, moncarataquerori aparo iyashirite irosati anteariyetanaintsiri.” 16Ari imataquero Moiseshi isanquenatacojeitaqueri, imoncarataquero icantaqueriri Tasorentsi.
17Jero ivajiro itomipeeni Leví: Guersón, Quehat jeri Merari.
18Jeri ishanincapeeni Guersón, inashitacaayetacari ishanincasanoripee iriori Libní jeri Simí.
19Jeri ishanincapeeni Quehat, inashitacaayetacari ishanincasanoripee iriori Amram, Ishar, Hebrón jeri Uziel.
20Jeri ishanincapeeni Merari, inashitacaayetacari ishanincasanoripee iriori Mahlí jeri Musí.
Iriojeitaque ishanincasanoripeeni Leví.
21-22Yora ishanincasanoripeeni Libní jeri Simí, iriojeitaque ishanincapeeni Guersón. Icarataque yapatoanaca shiramparipee 7,500 sanquenatacojeitainchari, moncarayetaqueriri aparo iyashirite irosati anteariyetanaintsiri. 23Ari isavicajeitaque iriori araquerora Nonantariqui, iqueapiniti catsirincaiteri. 24Irio jivatacairiri Eliasaf, itomi Lael. 25Anta Pancotsi papatotimentantanari, iriojeitaque amenirori Nonantari aisati timayetatsiri tsompoina: meshinantsipee yoicoyetirori, oticaashiro timatsiri iqueantapinitaroriqui, 26oticaashiropee oyaaraiterite jero oticaashiro timatsiri iqueapinitantarori oyaaraiterite, shoncarori Nonantari jero altar aisati oviritsatepee. 27Yora ishanincasanoripeeni Amram, Ishar, Hebrón jeri Uziel, iriojeitaque ishanincapeeni Quehat. 28Icarataque yapatoanaca shiramparipee 8,300 sanquenatacojeitainchari, moncarayetaqueriri aparo iyashirite irosati anteariyetanaintsiri. Iriojeitaque aisati amenirori Inantari Tasorentsi. 29Isavicajeitaque acaqueroca iracosanoriqui. 30Irio jivatacairiri Elisafán, itomi Uziel. 31Iriojeitaque amenirori Cajón onantari Icantacantiri Tasorentsi, meesa, tsiorontsi, altaripee, jero timayetatsiri inashitacaayetari, oticaashiro, aisati maaroni yantaveetantayetari.
32Yora Eleazar, itomi antaveetatsiri Aarón, iriotaque intasanotarori ijivatacairi ishanincapeeni Leví, aisati iriotaque amenayetiriri amenirori Inantari Tasorentsi.
33-34Yora ishanincasanoripeeni Mahlí jeri Musí, iriojeitaque ishanincapeeni Merari. Icarataque yapatoanaca shiramparipee 6,200 sanquenatacojeitainchari, moncarayetaqueriri aparo iyashirite irosati anteariyetanaintsiri. 35Irio jivatacairiri Suriel, itomi Abihail. Isavicajeitaque iriori Inantariqui Tasorentsi araquerora irampatequi. 36Yora ishanincapeeni Merari iriojeitaque amenirori otaaveratepee Inantari Tasorentsi, atancotashiyetari, otincamipee, yoashiyetirori ocatiantari jero maaroni yantaveetantayetari. 37Aisati otincamijaniquipee shoncarori oyaaraiterite, yoashiyetirori ocatiantari, yoatiashijaniquiyetirori jero oviritsatepee.
38Yora Moiseshi jeri Aarón aisati itomipee isavicajeitaque acaqueroca Inantariqui Tasorentsi, imontetacotaro Pancotsi yapatotimentariri, iriojeitaque amenirori. Itimirica antaveetashitachari, iquempetacantashitaca antaveetatsiri, cameetsati iroyeeteri. 39Icaratantacariri Moiseshi jeri Aarón isanquenatacotajiri ivajiropee maaroni ishanincapeeni Leví. Imoncarataquero maaroni icantaqueriri Tasorentsi. Icarataque shiramparipee moncataquerori aparo iyashirite jeri anteariyetanaintsiri. Icarajeiti 22,000 yapatoanaca.
Ipinaventayetajiri itomi jivayetatsiri itimi.
40Ari icantiri aisati Tasorentsi Moiseshi:
“Pisanquenatacojeitajeri itomipee pishaninca jivayetatsiri itimi, moncarayetaqueriri aparo iyashirite irosati anteariyetanaintsiri. 41Impoiji pinashitacayenari ishanincapeeni Leví, iriotaque pinaajeitajerine itomipee pishaninca jivayetatsiri itimi. Aisati pinquempejeiteri iriori ivirapee jivayetatsiri itimi, iriotaque pinaajeitajerineri ivirapee ishanincapeeni Leví. Narotaque Tasorentsi cantatsiri.”
42Ari imataquero Moiseshi icantaqueriri Tasorentsi, isanquenatacojeitaqueri itomipee ishaninca jivayetatsiri itimi. 43Icarataque maaroni shiramparipee 22,273 isanquenatacotaqueri, moncarayetaqueriri aparo iyashirite irosati anteariyetanaintsiri.
44-45Ari icantiri aisati Tasorentsi Moiseshi:
“Pinashitacaajeitenari ishanincapeeni Leví, iriotaque pinaajeitajerine itomipee pishaninca jivayetatsiri itimi. Aisati iriori ivirapee iriotaque pinaajeitajerine ivirapee pishaninca. Tempa iriojeitaque nashijeitajari. Narotaque Tasorentsi cantatsiri. 46Iro cantaincha oshequi inajeiti itomipee irinti pishaninca jivayetatsiri itimi, yanaajeitaqueri ishanincapeeni Leví. 47Meeca pincoacoyeteri aparopee pishaninca incarate 5 imentaqui quireequi tenatatsiri 11 gramo, moncaratachari moncaramentotsiqui timatsiri Nonantariqui. Impinacoventajeriri timaarantapaintsiri carajeitatsiri 273, 48irosati pimpantajeari Aarón aisati itomipee. Iriotaque impinacoventajeitajeriri iraajeitantajeariri.”
49-51Ari imataquero Moiseshi yaayetaqueri quireequi ipinacoventajeitajiriri itomipee ishanincajeitaniri Israel jivayetatsiri itimi, timaarantapaintsiri. Icarataque quireequi 1,365 ipaqueri Aarón aisati itomipee, imoncarataqueri itenatanteetari timatsiri Inantariqui Tasorentsi. Imoncarataquero icantaqueriri Tasorentsi.
Currently Selected:
Números 3: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
