Números 14
14
Ipiatsatacari ishanincajeitaniri Israel Tasorentsi.
(Deut. 1.26-33)
1Irosati icajemajeitantanaca maaroni ishanincapee, icantani tsiteniriqui iraajeitaca. 2Aisati icantimatanaqueri Moiseshi jeri Aarón, icantajeiti: “¡Cantenane ancamajeititaqueame Egiptoqui aisati aca caaraiteriqui! 3¿Paitaquea yamajeitantaqueeri Tasorentsi aca nampitsiqui, ancamajeitanteari anta iroyeetavaquee? Aisati iraitajeitavaqueero ajinapee, atomipee quisajeiteeri. ¡Ocameetsaveta ampiajeitanajerome Egiptoqui!” 4Ari icantavacaayetanaca aparopee “¡Tsame ancoyeanontea aparoni jivajeitanajeeneri ampiajeitanajerota Egiptoqui!”
5Iquemantacariri Moiseshi jeri Aarón, itiyeroimojeitanacari ishanincapee quipatsiqui. 6Impoiji yora Josué jeri Caleb ocantimonentasanotanacari, itsereanaquero iitsaare. 7Icantiri maaroni ishanincapee:
—¡Ora quipatsi namenanontajeitaitiri ocameetsatasanotaque! 8Tempa inintaquee Tasorentsi, iriotaque amitacoteeneri areejeitantearori quipatsi impajeiteeri, oshiocasanoyetapai panquirentsiyetatsiri, eiro ocoiteimojeitajeetsi. 9Iro cantaincha te oncameetsateji pimpiatsajeiteari Tasorentsi aisati eiro pitsaroacaajeitaritsi savicajeitatsiri anta nampitsipeequi. Aitaque amajeitaqueri antsoncajeitaqueri, tecatsi ticaacoventajeiterine. Arojeiquea ainti itsipajeitana Tasorentsi, iriotaque ticaacoventajeiteene. ¡Eiro pitsaroajeititsi!
10Ari iquemajeivetacaro icantavetacariri, iro cantaincha icoajeitanaque impichaajeiterime. Irosati oconijatimotantapaacari itasorenca Tasorentsi, ishipaquireaque Pancotsiqui yapatotimantantariri, ineajeitavaquero maaroni. 11Icantiri Tasorentsi Moiseshi:
—¿Irosatimpa incanteani maaroni pishanincapee intseencajeitena? ¿Paitampa caari ishirejeitantaro nonijayevetacariri caari ineapinijeiveta? 12Meeca nontiancajeiteneri mantsiarentsi oamaantatsiri, eiro imajeitantatsi irareetearo quipatsi. Avintiquea noshequiacaasanojeitaje aisati noneaperotacaasanotempi, panaacojeitanajeri irinti.
13Iro cantaincha icantanaqueri Moiseshi Tasorentsi:
—Jaaquea, ariorica inquemacotaquempi egiptosati pintsoncajeitaqueririca; tempa ineasanojeitaquero pitasorenca pamajeitantajariri. 14Impoiji incamantayetaqueri savicantajeitarori quipatsiqui Canaán. Tempa iquemacotaquempi iriori quiso poajeitaqueri noshanincapee, ponijaasanotacari aisati otimimotaqueri mencori, ojivatapinitaqueri quitaiteripeequi impoiji otsimancacotapinitaqueri aisati oquitasantetacotapinitaqueri tsiteniripeequi. 15-16Ariorica pintsoncajeitaqueri poamaajeitaqueri noshanincapee, yora savicayetatsiri nampitsipeequi quemacotaquerori pimayetaqueri; incantajeitanaque: ‘Yora Tasorentsi te irimatero irareetacayeari ishanincajeitaniri Israel quipatsiqui icantasanovetacariri impajeiteri, yoamaashijeitajari caaraiteriqui.’ 17-18Irotaque Notasorentsite, nocantasanotantimpiri: ponijantero pitasorenca, pimoncaratero picantasanotaqueri. Tempa picanti: Te intsipaite nonquishea, antearoite nonintanti, nopeacotantiro caari cameetsatatsi yantayetiri piatsatachari. Iro cantaincha te pamenashiteariji cantacaacarori poasanquetairi. Aitaque poasanquetaimentajeitaqueri yantayetiri iriripee, itomipee, icharinepee, irosati itomipee iriori. 19Queario antearoite pinintanti. Pimpeacotajeneri noshanincapee yantajeitaqueri. Tempa picavintsaaqueri anta Egiptoqui irosati meeca aca.
Yoasanquetaaqueri Tasorentsi ishanincajeitaniri Israel.
(Deut. 1.34-40)
20Ari yacanaqueri Tasorentsi icanti:
—Cameetsataque, aitaque nompeacotajeneri, nomoncaratempiro picoacotaquenari. 21Iro cantaincha, narotaque Aneasanotatsiri ainiro notasorenca, notsoteaquero maaroni quipatsi. 22-23Irotaque noncantasanotantari: Yora neapinijeivetacarori notasorenca nomayetaqueri Egiptoqui aisati aca caaraiteriqui, tseencapinitaquenari, ¡eiro catsini ineajeitirotsi quipatsi nocantasanotaqueriri intacantajeitaquempiniri! ¡Maaroni tseencaquenari eiro catsini ineajeitirotsi! 24Apaniro irinti Caleb quemisantanari irineero; tempa onashita iquenqueshireantari iquemisantaquena, te inquempejeiteari itsipapee. Irotaque noshinetanteariri irareetearo quipatsi yamenanontayetaitiri aisati yora irishanincajeitajeari iriotaque savicantajeitearone. 25(Yora amalecitapee aisati canaaneopee savicajeitatsiri anta opampaiteayetapai.) Meeca aviroripee, osaitequera pimpiacaajeitanajeri pinquenajeitanajero caaraiteriqui jatantachari incajarequi Quitioncari.
26-27Aisati icantiri:
—¿Jaoca oncarate namavetero icantimatana pishanincapee caari cameetsajeitatsi? Noquemaquero icantayetaquenari. 28Meeca pincamanteri: ‘Naro Tasorentsisanori, nocantasanoti; nontianquempiro avishimojeitempineri ora noquemaquempiri picantaque. Aitaque nonquempetacantajeitaquempi. 29Maaroni cantimajeitaquenari moncarataquerori 20 irosarentsitepee sanquenatacojeitainchari, intsoncajeitea incamajeite aca caaraiteriqui. 30Apaniro Caleb itomini Jefuné, jeri Josué itomini Nun irareetearo quipatsi. Avirojeiquea, eiro pareejeitarotsi nocashiacaasanovetaquempiri pisavicantajeiteameri. 31Irintiquea pitomipee picantacojeivetari: ‘Iraitajeitavaqueeri quisajeiteeri’, naajeitanajeri anta quipatsiqui caari pineacameetsajeiti; iriotaque savicantajeitearone irinti. 32Ora pitonquipee aitaque onareajeiteari aca caaraiteriqui. 33Yora pitomipee incanteani irisavicajeite aca caaraiteriqui inquempeteari shentiriri irovishate oncarate 40 osarentsi. Aitaque oncanteari impinaventero pipiatsajeitaquena. Irosati pincamajeitanteari caaraiteriqui avirojei. 34Tempa ocarataque 40 quitaiteri pamenanontantaitarori quipatsi, aisati onquempetajea oncarate 40 osarentsi pimpinaventero pitseencajeitaquena. Aparo quitaiteri onquempetea aparo osarentsi. Aitaque piojeitanaquerori jaoca noncanteriri tseencajeitanari. 35Narotaque Tasorentsi, queario nocantasanoti. Aitaque noncanteriri pishanincapee piatsajeitachari cantimataquenari. Aca caaraiteriqui aitaque pineajeiterori pintsoncajeitea pincamajeite.
Icamantacari 10 amenanontaveitarori quipatsi.
36-37Yora amenanontaveitarori quipatsi itiancavetacari Moiseshi, ipiajeitantajarori. Te oncameetsateji icamantayetapaaqueriri ishanincapee, icantimonentacaajeitacari iquisacaacari. Ari yoasanquetaaqueri Tasorentsi, icamajeitaque maaroni. 38Irintiquea Josué jeri Caleb, te incameji.
Yovaaranteetaqueri ishanincajeitaniri Israel nampitsiqui Hormá.
(Deut. 1.41-46)
39Icamantantacariri Moiseshi ishanincapee icantaqueriri Tasorentsi, yoashiretasanojeitanaca catsini. 40Oquitaiteantamanajari itinaajeitamanaca, itoncaajeitanaque ovecaratapaaca toncaari. Icantajeitaque:
—¡Areejeitaquee meeca aca! Tsamequeti ajate anta quipatsiqui icashiacaqueeri Tasorentsi. Queario antaquero caari cameetsatatsi.
41Ari icantavetari Moiseshi:
—¿Paitaquea pipiatsajeitantajarori icantaqueeri Tasorentsi? ¡Oca picantajeivetari, eiro pimajeitirotsi! 42Eiro pijajeititsi, yora Tasorentsi eiro quiso yoajeitajimpitsi. Ario intsoncajeitavaquempi quisajeiteeri. 43Yora amalecitapee aisati canaaneopee yoyeajeitaquempi anta, irimanajeitavaquempi, intsoncajeitavaquempi. Tempa pitseencajeitaqueri Tasorentsi, te meeca quiso iroajeitajempiji.
44Iro cantaincha aiquero ijajeitanaiti toncaariqui. Yora Moiseshi te iroijateriji aisati iroori Cajón onantari Icantacantiri Tasorentsi, irosati isavicajeitapaaque. 45Impoiji imanajeitavaqueri amalecitapee aisati canaaneopee savicajeitatsiri nampitsipeequi, itsoncajeitavaqueri yoajeitaqueri. Yoijanajeitanaqueri irosati nampitsiqui Horma.
Currently Selected:
Números 14: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
