Josué 14
14
Ipayetaqueri Josué ishanincapee iipatsite canaaquiniri
1Irotaque oca quipatsi Canaán yaajeitaqueri ishanincajeitaniri Israel irisavicajeitanteari. Yora Eleazar, antaveetiniriri Tasorentsi, itsipatari Josué jeri jivatacaajeitiriri ishanincasanoripee, ipayetavaqueri aparopeeni. 2Ipishonquimentaquero paitarica iotacantacariri Tasorentsi, ipajeitantacariri caratatsiri 9 ishanincasanoripee jeri icashetatatsiri ishanincasanoripeeni Manasés. Imoncarataquero icantaqueriri Tasorentsi Moiseshini. 3Yora ishanincasanoripeeni Rubén, Gad, jeri pashinipeeni ishanincasanori Manasés timanaque iipatsite intatiqueroqui nija Jordán, ipanaqueriri Moiseshini. Irintiquea ishanincasanoripeeni Leví, te imperiji quipatsi irashiteari. 4Yora ishanincajeitaniri José icarajeitaque apite; inashijeitaca ishanincasanoripeeni Manasés jeri ishanincasanoripeeni Efraín. Irintiquea ishanincapeeni Leví tecatsi impe aparo quipatsi, irointiquea ipajeitaqueri nampitsipee irisavicajeitanteari aisati ipacoyetaqueri paashitomashi iriviratanteariri vacapee jeri ovishapee. 5Aitaque icantajeitaquerori quipatsi ipavacaajeitacaro, imoncarataquero icantaqueriri Tasorentsi Moiseshini.
Iipatsite Caleb ora Hebrón
6Yora ishanincajeitaniri Judá ijajeitaque anta nampitsiqui Guilgal inquenquetsatacayeri Josué. Yora Caleb, itomini Jefuné quenezeo, icantapaaqueri:
—Nopoqui nonquenqueshireacaajempiro icantaqueriri Tasorentsi Moiseshini, yora quemisantiriri, asavicantajeitapaacari anta Cadés-barneaqui. Icantacotaquena narori aisati avirori. 7Ocaratantanacari 40 nosarentsite, itiancantaqueeri Moiseshini aponeanacaro Cadés-barneaqui amenanontantaitarori quipatsica Canaán. Apiajeitantanajarori, tempa acamantacotasanotapaaquero cameetsa. 8Irintiquea acarajeivetaitari, yoimintsaroajeitapaaqueri ashanincapeeni. Aroquea ainti, acantani aquemisantaquero icantasanotaqueeri Atasorentsite yora aquemisantajeitiri. 9Ari icantasanotanaquena Moiseshini iquemaquero Tasorentsi: ‘Ora quipatsi pamenanontaitiri, irotaque pisavicanteari coajicani, aisati irotaque irisavicantajeitajeari pishanincajeitajeari; tempa picantani piquemisantaquero icantasanotaquempiri Atasorentsite yora aquemisantajeitiri.’ 10Meeca avisanaque 45 osarentsi icantasanotantacariri Tasorentsi Moiseshini oca, ainiroquera atimayetapaaqueni caaraiteriqui. Imoncarataquero icantasanotaqueri, yoaneaquena. Meeca nomoncarataquero 85 nosarentsite. 11Irosati nocanta meeca noneaperota, quempeni peerani itiancantaqueeri Moiseshini amenanontantayetacaroniri quipatsica. Aitaque nomataquero nojayete nomanayetea noquempetani peerani. 12Irotaque nocantantimpiri meeca: pimpenaro quipatsi toncaariquiniri icashiacaaquenari Tasorentsi, isavicajeitinta ishanincajeitaniri Anac, antearitsantsayetatsiri. Aisati antearoitepee inampipee, oquisotasanoyeti itantotacoyetirori. Iro cantaincha irio Tasorentsi matacayenarine nojocajeitanteariri: tempa irotaque icantasanotaqueri.
13Irosati icantacoventantacari Josué Tasorentsiqui intasoncacoventanteariri. Ari ipaqueri nampitsi Hebrón irisavicajeitanteari aisati irishanincajeitajeari coajicani. 14Aitaque ocantacari yaaquero Caleb quipatsi Hebrón. Irotaque meeca isavicajeitantari ishanincajeitaniri. Tempa iquearioventaquero iquemisantasanotaqueri Tasorentsi, yora Itasorentsite Israel. 15Ora Hebrón opajiveitani Quiriat-arbá. Iro opajitantaniri, itimi aparoni shirampari pajitachaniri Arbá antearitsantsatatsiri ishanincapeeni Anac.
Impoiji isavicajeitanaque cameetsa iipatsitequi, te irimanajeitajeaji aisati.
Currently Selected:
Josué 14: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
