Éxodo 30

Irovetsicacantantearori altar intaantearori casancayetatsiri

(Éxo. 37.25-28)

1“Povetsicacante aisati orijaniqui altar pintaantearori casancayetatsiri; irosati paaje taavera acacia. 2Oncarate 45 centímetro ontsantsate aisati onquempetaquea otsaranca. Iroquea ojenoquite oncarate 90 centímetro, poavisayetaquero, irotaque pishevatayetaquerori ampanaquirotantanaqueari. 3Aisati pimpatacacotaquero oro, manacotanaqueroneri jenoquiniri aisati pishevatayetaqueroriqui. Impoiji pishoncaqueri maaroni acaqueroqui poashinampiyeterori. 4Irisati oro piyempitantayetaquearo, pimpatacayetaqueri ishaaviji poashinampitaqueroriqui. Apite poaque acaqueroca osorinaquiyetapaaque aisati apite araquerora irotaque pisaquiintantearori inquijacotantearori. 5Ora inchaquii isaquiintantearori irosati paaque acacia oameetsaquiiyetaquero, pampinaicacotantaquearo oro omanacotantanaqueari. 6Ariorica pintsoncacantaquero irosati poantaquearo oticaashiroqui Nonanteari, ontsipataimaataquearo Cajón ontimanteari Nocantacantiri. Tempa aitaque nonquenquetsatacaapinitempiri. 7Ariorica impocapinite capichaji quitaite Aarón irovetsicapinitanteariri tsiorontsi, aitaque intaapinitenarori casancapatsatatsiri. 8Aisati inquempetajero ishaaviniji ariorica intsiotanajeri. Aitaque incantapiniteari intaimotapinitenaro maaroni osarentsipeequi. 9Eiroyea itaantayetarotsi casancayevetachari aisati vatsatsiyetatsiri jero paitapeerica ipanquiyetiri; aisati eiro isaitantarotsi ovaja. 10Tempa irotaque nonashitacaasanoteari oncameetsatasanotanaque. Oncarate aparopee osarentsi inqueapinite Aarón, irisaitantearori oshevatapeequi iriraja iroapinitenari. Tempa irotaque nompeacojeitanteanariri caari cameetsatatsi yantapinijeitiri pishanincapee. Queario catsini nocantaque, oncarate aparopee inqueapinite osarentsi.”

Maaroni shiramparipee impinacoventajeari sanquenatacojeitachaneri

11-12Ari iquemajiri Moiseshi Tasorentsi, icantiri:

“Ariorica pisanquenatacojeitaqueri ivajiropee pishaninca, ontimatiye iramajeitaque aparopeeni impinacoventeari, eiroquea opocashijeitantaritsi oashinoncantsipee oamantatsiri eirorica isanquenatacotatsi. 13Incarate impayetena 5 gramo imentaqui plata ari nianqui, irimoncaratantaquearo moncaramentotsi timatsineri Nonanteariqui. 14Impinacoventajeitea carayetaintsiri 20 irosarentsite jeri iriori avisayevetainchari. 15Ariorica impinacoventajeitea, yora ashitaarantincari eiro yojoquitsi quimota, aisati inquempetaquea iriori caari timasanotatsi iireequite. Ocameetsati irimoncaraavacaajeitanaquea maaroni. 16Aviro aayerine iireequite pishanincapee. Impoiji pimperi yora antaveetatsiri Nonantariqui, inquempoyeantearori. Iriotaque povetsicacanteri timayetatsine coajica Pancotsiqui pampatotimentantenari, ari nonquenqueshiretacojeiteri ipinacoventajeitaca.”

Irivetsicacantantearori antearo chomo bronce

(Éxo. 38.8)

17Ari iquemajiri Moiseshi Tasorentsi, icantiri:

18“Povetsicacante antearo chomo ioshitaquea bronce irosati bronce iraaque osavicanteari: poaquero nianqui pimontetacaaquero Pancotsi pampatotimentantenari aisati altar. Impoiji pijaye nija irotaque pinquivacotapinijeiteari. 19Yora Aarón aisati itomipee irotaque iraayeri nija inquivavacoteari aisati iitipee. 20Inquivavacotea ariorica inqueero Pancotsi, aisati ariorica inquempejitearo altar irantaveetanteari, aisati intaantenariri yamayetanari; eiroquea icamajeitantatsi 21Eiro icamajeitantatsi, ocameetsati inquivajeitero iracopee jero iitipee. Irotaque oca nocantacantiri, oncantaitatiyempani ontime. Irotaque irimoncarateri Aarón aisati irishanincajeitajeari coajicani.”

Iroameetsajatacanteri quejitsi irinashitacayeari

(Éxo. 37.29)

22Ari iquemajiri Moiseshi Tasorentsi, icantiri:

23“Aviro nocoacaaqueri pincoyeayete shiocayetatsiri casancajencatasanotatsiri. Pimoncaratantaquearo moncaramentotsi timatsineri Nonanteariqui: oncarate 6 kilo mirra, 3 kilo metaqui aisati 3 kilo cálamo. 24Iroquea casia oncarate 6 kilo, 3 litro oreji orivo ari nianqui. 25Ontimatiye pimatacantero ocapee poameetsajataca antasanotero, iquempetiro vetsicayetirori casancajaripee; irotaque quejitsi casancajencatatsiri pinashitacaasanotaquenari. 26Irotaque pisaitantayetaquearori timayetatsineri Pancotsiqui pampatotimentantenari, Cajón pintetacotantearori Nocantacantiri, 27aisati meesa jero maaroni timayetatsineri; aisati iriori tsiorontsi jero maaroni timayetatsineri; 28aisati altar pintaantearori casancapatsayetatsiri; jero aisati altar pintaapinitanteariri virantsi jero maaroni timayetatsineri. Aisati pinquempetaquero iroori chomo jero osavicantanaqueari. 29Aitaque pincantayetaquerori pisaiyetaquero, onashitasanotantanaqueari oncameetsatasanotanaque catsini maaroni timayetatsineri. Yora antaquerone nonashitacaasanoteari.

30“Oca povetsicacantayeteri, irotaque pisainatanteariri Aarón jeri itomipee, irantaveejeitantanaqueari Nonanteariqui. 31Irosati pincantajeitantaqueari pishanincapee: ‘Oca casancajari noameetsajatacantasanotaquero, oncantaitatiyempani ontime osarentsipeequi. 32Eiro pisainayetashitaritsi picarajeitiri aisati eiro pivetsicashiyetatsi quempetearoneri. Tempa irotaque nonashitacaasanotacari, aisati avirori, irotaque pinquempetacanteri cameetsatasanotatsiri. 33Jaanicarica vetsicashiyetachane aisati sainatashiyetearine icarajeitiri, ontimatiye pintiancajeri, eiro icarajeitanajimpitsi.’ ”

Irovetsicantearori casancajari

(Éxo. 37.29)

34Ari icantajiri Tasorentsi Moiseshi:

“Paayete pintayeri cashiyetatsiri: jero casancajayetatsiri icanteetiri uña jero aisati oja icanteetiri galbano. Aisati pinquempetacantaquero nocantaquempiri povetsicacantero casancajari. 35Irotaque inconoantaquearori ariorica intononcaquero, cameetsaquea oncasancajencatasanotantanaqueari. Pinquempetacantasanotero iquempetiro vetsicayetirori casancajaripee. 36Impoiji pintononcacantasanotero, cameetsa oncarenipanetasanotantanaqueari. Irotaque poacoteri Pancotsiqui pampatotimentantenari, pintsipataimaataquero Cajón. Oca pintayeri, irotaque nonashitacaasanoteari oncameetsatasanotanaque. 37Eiroya povetsicanontatsi avirori quempetearone oca; tempa irotaque nashi pincashiacaasanotenari, poameetsajatanari. 38Jaanicarica vetsicayetatsine intiritantayetearori, ontimatiye pintiancajeri, eiro icarajeitanajimpitsi.”

Currently Selected:

Éxodo 30: cni

Highlight

Copy

Compare