Éxodo 20

Ocarati 10 icantacantiri Tasorentsi

(Deut. 5.1-21)

1Jero icantiri Tasorentsi:

2“Narotaque Tasorentsisanori Pitasorentsite, oipacaacoventajimpiri iperanajeitantavetaquempiniri egiptosati.

3“Eiro itimitsi pashini pintasorentsiteteari; tempa apaniro noni.

4“Eiro catsini povetsicayetitsi pishiacantantayeteariri paitarica pineayeteri inquitequi aisati timayetatsiri quipatsiqui jeri timayetatsiri incajarequi; eiro pijitasorentsiyetiritsi. 5Eiro catsini poivotashitaritsi pimpincatsajeitanteariri. Tempa narotaque Tasorentsisanori Pitasorentsite tsaneacojeitaquempiriri. Ariorica pimpiatsatena, noashinoncaajeitempi aisati nonquempeteri pitomipee, picharinepee jeri intomintajeitajeari iriori. 6Iro cantaincha, ariorica irinintajeitena inquemisantajeitena aisati irimoncarajeiterorica nocantacantiri, noncanteani nonintasanojeiteri. Aisati nonquempejeitajeri irishanincajeitajeari iriori.

7“Eiro pineaveetacotashitarotsi novajiro; tempa narotaque Tasorentsisanori Pitasorentsite. Aitaque iroasanquetaimentaqueri neaveetacotashitearone.

8“Pinquenqueshirejeitero ora quitaiteri nonashitacaacari pimacoreanteari; irotaque pimpincatsatapinijeitantenari. 9Oncarate 6 quitaiteri pantaveejeitanteari paitarica pantayeteri. 10Iro caratapaatsine 7, irotaque pimaoreajeitanteari; nonashitacaacari pimpincatsajeitantenari. Tempa narotaque Tasorentsisanori Pitasorentsite. Eiro catsini pantaveetacaajeitiritsi pitomipee, pishintopee, pinampirepee jeri pashinisatipee saviquimojeitimpiri, aisati iriori pivirapee. 11Tempa ocarataque 6 quitaiteri novetsicantacarori inquite, quipatsi jero incajare aisati maaroni timantayetarori. Iro cantaincha caratapaatsiri 7, irotaque notasoncaventantacarori aisati nonashitacaacaro.

12“Pimpincatsateri piri aisati piniro. Irotaque paneanteari osamani, pisavicajeitanteari anta quipatsiqui nompajeitempiri.

13“Eiro poantitsi.

14“Eiro paimentarotsi pijina. Eiro paimentaritsi pijime.

15“Eiro picoshititsi.

16“Eiro pitseeyacotashitaritsi pishaninca pincantacantashitanteariri.

17“Eiro pinevetitayetaritsi ijina pishanincapee, inampirepee, ivacatepee, iraashinotepee, aisati maaroni timimoyetiriri ivancopeequi.”

Itsaroacantacariri ishanincajeitaniri Israel Tasorentsi

(Deut. 5.22-33)

18Maaroni ishanincajeitaniri Israel, iriojeitaque neaquerori otireatireatanaque aisati porecatsiri jero tiorentsi. Aisati ineajeitaquero ocachaajencatantanacari toncaari. Irotaque itsaroajeitantancari catsini, caari iquempejijeitantaro. 19Aisati icantantacariri Moiseshi.

—Aviro quenquetsatacayerine avinti, impoijiquea pincamantajeitenaro icantaquempiri Tasorentsi. Ari nonquemisantajeitaquempi. Te noncoyeji irineanatena iriori, nocamajeiticari.

20Ari icantanaqueri Moiseshi iriori:

—Eiro pitsaroacaajeitaritsi Tasorentsi, iro yonijaajeitantaquempiri iriotacaajeitantempiri pincanteani pimpincatsajeiteri, eiro pantimotantaritsi caari cameetsatatsi.

21Ainiroquera icatiajeitaca ishanincapee, irosati ijatashitantanacaro Moiseshi mencori tsitenishaatsiri inaquenta Tasorentsi.

Icantacantiro Tasorentsi irovetsicantearori altar

22Ari icantaqueri Tasorentsi Moiseshi: “Pincanteri maaroni pishanincapee, ‘Tempa aitaque pineajeitaquenari noquenquetsatacaajeitaquempi inquitequi. 23Eiro pivetsicashiyetatsi oro, iroorica plata pimpincatsatanteariri, pinquempetacantantenari naro pipincatsataque. 24Nocoaque paye quipatsi pivetsiquena altar. Impoiji pamaquenari povishate aisati pivacate, pintaarantasanotenari aisati poaaranteari naacameetsajeitantajempiri. Noncanteani nontasoncacoventajeitempi jaocarica noncoacaajempiri pinquenqueshiretajena, pimpincatsajeitantapaajenari. 25Iroorica povetsique mapipee, eiro poameetsayetavaquerotsi. Ariorica poameetsatantaquearo ashiroyetatsiri, eiro noneacameetsatirotsi. 26Irointiquea cameetsa piveviricaayetaquero. Eiro catsini anaayetatsi oshianacarocari ataimentotsi, eiroquea pimatantatsi pantaite ineanteetimpicari.’ ”

Currently Selected:

Éxodo 20: cni

Highlight

Copy

Compare