Éxodo 2

Itimantacari Moiseshi

1Itimi aparo ishanincataniri Leví yaaquero ishanincasanori iriori. 2Ari otsomontetanaque, irosati otimantacari itomi. Oneaqueri icameetsajaniquitaque, irotaque omanantavetacariri icarataque mava cashiri. 3Iro cantaincha oneaqueri aiquero ijatatii iquimotanaque, tecatsi oncantajea omanasanotajeri. Irosati ojatantaca otsapijaqui nija, aayetaiti shiocayetatsiri icanteetiri junco. Ari ovetsicaquero tsivoo oshiacantaquero pitotsijaniqui. Impoiji otsineyetaquero maaroni omorojaniquipeequi eiroquea oqueajatantatsi nija. Irosati otetantacari otomijaniqui, ashitacotaqueri. Ari oimajatacotaitiri otsapijaqui Nilo otimayetaquenta joncopee. 4Ari ocantiro ishinto: “Noshinto, pincatiye ara nijanteaji, pamenacoventeri pijaririjaniqui jaocayeata incanteeteriri.”

5Impoiji opocaque irishinto pincatsari nijaqui oncaate, otsipajeitacaro onampirepee. Ari oshiteajatacaayetapaacaro oneatiiro tsivoojaniqui amajaataque otitacaro joncopee. Ari ocantiro: “Pijate paitero.” 6Irosati ojatantaca, ari amapaaquenero. Irosati ashitareantavacaro, oneatiiri jananequi iraaitacha. Ari intacoshireacari ocavintsaaqueri, ocanti:

—Yoca jananequi, irinti itomi hebreo.

7Ainiro iroori iritsiro otsititaca nijanteaji, amenacoventaqueri. Oneacoventantacariri aaqueri irishinto pincatsari, irosati ojatashitantacaro osampitapaaquero:

—¿Picoimpa namenaitempi noshaninca antsotayempirine yoca?

8-9Ari acanaquero:

—Je, pijatequeti.

Irosati ojatantanaca apatiro oashitanaquero iniro. Oquemantavacarori, irosati opocantaca. Oneantavacarori irishinto pincatsari, ocantavaquero:

—Paanaquenari yoca jananequi anta pivancoqui, pamenenari. Arinea nompinataquempi.

Irosati aantanajari iriniro amenajiri. 10Impoiji iquimotanaque, irosati opantajaro. Ora irishinto pincatsari oquempetacantaqueri irio ashi otomisanori. Ocanti: “Iriotaque yoca naaqueri nijaqui.” Irosati opajitantacari Moiseshi.

Ishiantacari Moiseshi

11Ari yantearitasanotanaque Moiseshi. Aparo quitaiteri ijataque iquivantiri ishanincapee anta quipatsiqui Gosen. Ineapaatiri ishanincapee yantaveetacaasanoyeetaqueri. Aisati ineacotatiiri aparo egiptosati ipasanatiri ishaninca. 12Ari intsipaite yamenayevetanaca anta, iro cantaincha tecatsi irineaque, irosati yaantapaacari irinti, yoaqueri. Ari itijanaqueri impanequiqui. 13Ari pashiniqui quitaiteri ipianaja aisati ineapaatiri apite ishaninca yantavacaaca. Ari icantavetapaacari yora pasanataqueriri itsipa:

—¿Paita pipasanatantacariri? Tempa iriotaque pishaninca.

14Iro cantaincha icantanaqueri:

—¡Jaoca pijitari avirori! ¡Avirompa cantacoventantatsiri picantantapaanari! ¿Picoaquempa poyena narori, piquempetaqueri egiptosati poaqueri oshaiteji?

Iquemantacarori icantaqueriri, irosati itsaroasanotantanaca. Iotanaque iotacoyeetaqueri yoaqueri egiptosati. 15Ari iquemacotaqueri pincatsari Moiseshi, irosati itiancantayevetaca amenayetajerine iroantajeariri iriori. Iro cantaincha te irineajeriji, shianaca ini. Ijataque anta quipatsiqui Madián, isaviquimotapaaquero quempeji quianarentsi.

16Anta quipatsiqui Madián aitaque isaviquiri atiri pajitachari Reuel, antaveetiniriri Tasorentsi. Otimi irishintopee ocarati 7. Ari opocajeivetapaaca quianarentsiqui ojayetajenerime irantapiniyetariqui irovishatepee iri. 17Iro cantaincha ipocayetapaaque pashinipee ashiyetachari irovishate, itiancajeitapaaquero. Ainiro iriori Moiseshi isavicaque ara, ineacoventaquero. Irosati icatiantanaca irinti ipiacoventacaro. Impoiji iquitaataque nija irirajeiteri ovishapee. 18Irosati opiajeitantanaja iriqui. Ineantavajarori, icantajeitavajiro:

—¿Paitaquea meeca pipiitantajari? ¿Picatimaitacampa pijaayetaitiniri nija ovishapee?

19Ari acajeitanaqueri iroori:

—Nareejeivetantapaacarori quianarentsi, ipocajeitapaaque pashini ashiyetachari irovishatepee, itiancajeivetapaaquena. Iro cantaincha noneapaaqueri aparo shirampari egiptosati isavicaiti ara. Iriotaque piacoventavaquenari. Impoiji iquitaataque nija ijaayetaqueneri ovishapee irajeitaqueri.

20Iquemantacarori irishinto, irosati isampitantanacaro. Icantiro:

—¿Jaocaquea meeca iriori? ¡Paitaquea caari pamantacari! Pijate meeca pimpianaque, pincantaiteri impoqueta aca iroapempata.

21Aitaque ocantari onimotaqueri Moiseshi irisavicapee ivancoqui Reuel. Impoiji ipacantacari irishinto pajitachari Séfora ijinantacaro. 22Irosati itimacantacaro itomi, icanti: “Caari nonampisanori oca quipatsi. Tempa naro pashinisati atiri. Irotaque meeca nompajitanteariri yoca notomi Guersón.”

Icamaque pincatsaritatsiniri Egiptoqui

23Ari avisayetanaque oshequi osarentsipee, irosati icamantaca pincatsariveitachaniri anta Egiptoqui. Iro cantaincha yora ishanincajeitaniri Israel, irosati icanta icavintsaapinijeitaca, oashiretacaacari iperanatapiniyeetacari. Iro cantaincha iquemaqueri Tasorentsi iraatsatapinijeitaca aisati icavintsaapinijeitaca.

24Iquenqueshiretajiro icantasanotaqueriri peerani Abrahamani, Isaacani jeri Jacoboni: “Noncaratasanojeitempi.” 25Ineaqueri Tasorentsi ishanincajeitaniri Israel, ari iquenqueshiretaquero avishimojeitaqueriri.

Currently Selected:

Éxodo 2: cni

Highlight

Copy

Compare