Éxodo 16
16
Ipaqueri Tasorentsi contonapee aisati maná yoajeitacari
1Ari iponeajeitanaja ishanincajeitaniri Israel Elim, irosati yareetantacaro caaraiteri Sin, irotaque montetarori Elim aisati Sinaí. Iro quitaiteri 15, apitetatsiri cashiri yareetantacari, omoncarataja ishitoantajeitanajarori Egiptoni. 2Anta caaraiteriqui aitaque icantimajeitapaajiriri aisati Moiseshi jeri Aarón. 3Icantajeitiri:
—¡Aviro amajeitaquenari aca, meeca paacantajeitaquena notashe, irotaque noncamajeitanteari! Anta nosavicajeitantaniri Egiptoqui, oshequi noapinijeitari poshiniri, noquemapinijeita; tecatsi coiteimojeitenane. Ariome incoacaajeitaquename Tasorentsi noncamitajeitaqueame anta, eiro nashinoncaitame aca.
4Irosati icantantajari Tasorentsi Moiseshi:
—Meeca nompajeitempi poajeiteari poneachaneri inquitequi. Yora pishanincapee iraanontajeitea quitaiteripeequi apatiro iraanontea ocarati iroajeiteari quitaiteriqui. Nocoi nameneri jaanica quemisanterone nocantayetiri, aisati jaanica caari quemisanterone. 5Ora seistapaatsineri quitaiteri, ariorica iraanontea yovetsiqueri iroyeari ivancoqui, ocameetsati iraanontajeititea quimota. 6Yora Moiseshi jeri Aarón icamantajeitaqueri ishanincapee:
—Ariorica irishaavijiiteanaje catsirincaiteri, aitaque piojeitanajeri iriotaque Tasorentsi omishitoajeitajimpiri anta Egiptoqui. 7Ariorica onquitaiteamanaje aitaque pineajeitaquero itasorenca Tasorentsi, tempa iquemajeitaquempi picantimajeitaqueri. ¡Paitampa pijitacantaqueri jaoca nojijeitacari narori, picantimajeitantaquenari!
8Ari icantasanotiri aisati:
—Ariorica irishaavijiiteanaje catsirincaiteri, impajeitempi vatsatsi poajeiteari aisati osaitequera impasanojeitempi tanta poajeiteari. Tempa iquemajeitaquempi picantimajeitaqueri. Te naro pincantimate, irinti Tasorentsi picantimataque.
9Ari oquitaiteamanaji, irosati icantantamanacari Moiseshi irirenti:
—Pincanteri maaroni ashanincapee impocajeitamaneta aca ampatotimentajeitamanearita Tasorentsi; tempa iquemajeitaqueri oshaiteji icantimataqueri.
10Ainiroquera Aarón iquenquetsatacaajeitiri maaroni ishanincapee, ari yamenajeitanaque anta caaraiteriqui, ineatiiro itasorenca Tasorentsi ishipaquireacaapaaquero mencori. 11Ari iquenquetsatacaajiri Tasorentsi Moiseshi, icantiri:
12—Noquemaquero icantaqueri pishanincapee, meeca pincantajeiteri: ‘Ariorica irishaavijiiteanaque catsirincaiteri, nompajeitempi vatsatsi poajeiteari. Aisati ariorica onquitaiteamane, nompajeitempiro tanta poasanojeitea pinquemasanojeitea. Impoiji piotasanojeitanaque narotaque Tasorentsisanori Pitasorentsite.’
13Ari ishaavijiiteanaque catsirincaiteri, irosati ipocajeitantaca contonapee. Itsoteajeitapaaquero maaroni isavicajeitaquenta ivancopeequi. Aisati oquitaiteantamanajari ineajeitamanatiiro cajashiiteri oshoncanacari maaroni isavicajeitaquenta. 14Opirijaiteantanajari, irosati oconijaitsoquijaniquiyetantanaca maaroni saiteriqui; oquempevetacaro sharaca. 15Ineajeitantacarori oquitamaroporoquijeitaque, iro cantaincha te iriojeiteroji. Irosati icantavacaajeitantanaca: “¿Jaocampa ojitari oca?” Ari icantanaqueri Moiseshi:
—Irotaque ipajeitaqueeri Tasorentsi avajeiteari. 16Jero oca icantacantiri amoncarajeiteri: Ocameetsati paanontajeitea poajeiteari quitaiteriqui, pimoncaratanontaquea jaocarica picarayeti pivancopeequi. Ocameetsati paanontajeitea ariorica oncarate apite covitijaniquiqui ari nianqui, iraayete aparopee atiri.
17-18Ari imajeitaquero yaanontajeitaca, aparopeeni aanontayetaincha quimota, irio itsipapee capichamaaji, ocarati icantacantaqueri. Yora aanontayevetainchari quimota, te ontimaarantimotanajeriji, irintiquea yora aanontainchari capichaji, te oncoiteimoteariji. Tempa icoyeanontajeitaca ocarati iroyeari.
19Irosati icantajeitantavetacari Moiseshi:
—Eiroyea poanontajeitavajatsi poajeitamanajeari osaitequera.
20Iro cantaincha ainiro aparopee caari quemisantajeiterine, yoanontajeivetanaja. Ineajeitamanatiiro shitipatsatanaque, ijaanacaro quenitsi. Ineacotantacariri Moiseshi, irosati iquishimentantacari.
21Icantani maaroni quitaiteripeequi icoyeanontapinijeita capichaji quitaite ocarati yoapinijeitari. Tempa ineapinijeitaquero oshequi ovejaapinita ariorica irijenoquitapaaque catsirincaiteri. 22Iroquea caratapaatsiri 6 quitaiteri, yaanontitajeitavaca quimota, irimoncaratantearori apite quitaiteri. Ari ineacojeivetacari yora jivatacaajeitiriri, irosati ijatashitantavetacari Moiseshi icamantacojeivetapaacari. 23Iro cantaincha icantavaqueri:
—Jee, cameetsataque yantajeitaqueri. Irotaque icantacantiri Tasorentsi. Tempa osaitequera irotaque quitaiteri inashitacaacari, ampincatsajeitanteariri. Ocameetsati meeca pintashinontitayetea aisati pinconontitayetea quimota ocarati picoacayetari. Impoiji pinquempoyeajeitero timaarantayetapaatsiri ashi osaitequerani.
24Ari iquemisantajeitaquero icantaqueriri Moiseshi, iquempoyeajeitaquero cameetsa. Te oshitipatsateji aisati te irijaajeitearo quenitsi. 25Ari oquitaiteamanaque irosati icantajeitantamanacari:
—Meecaquea avajeitearo, tempa irotaque inashitacaacari Tasorentsi oca quitaiteri ampincatsajeitanteariri. Eiro meeca aneajeitamanajirotsi. 26Tempa ocarati 6 quitaiteri acoyeanontapinijeitantari. Iro cantaincha ora caratapaatsine 7 eiro otimitsi; tempa irotaque amaoreajeitanteari.
27Ainiro caari quemisantatsi, isotoajeivetanaca incoyeajeitantajeameri. 28Iro cantaincha tecatsi irineajeitapee. Oca yantajeitaqueri te onimoteriji Tasorentsi. Irosati icantantacari Moiseshi:
—¡Jaoca oncarate pojocajero pitseencajeitiro nocantajeivetaquempiri aisati noamevetaquempiri! 29Pinquenqueshirejeitero naro Tasorentsi paquempirori aparo quitaiteri pimaoreajeitanteari; irotaque ora quitaiteri caratapaatsiri 6 nopantimpirori poajeiteari pimoncaratantearori apite quitaiteri. Iroquea sietetapaatsiri quitaiteri, aparopeeni pisavique pivancoqui, eiro pisoquijajeititsi.
30Ari omoncaratapaaca quitaiteri, irosati imaoreajeitantanaca.
31Oca yoapinijeitacari ipajitaquero maná. Oquitamaroitsoquijaniquiyetaque oquempeyevetacaro fariña. Iro cantaincha pochaquijaniquiitaque oquempetacaro cayeta iconoyeetiri ija pitsi.
32Ari icantajiri Moiseshi ishanincapee.
—Jeroca icantacantiri Tasorentsi: ‘Pijaye aparo covitijaniquiqui moncaratachari apite litro, impoiji pinquempoyeacoyetero. Irotaque ponijaajeiteriri pishanincajeitajeari coajicani, iriojeitantanaqueari queario irotaque nopapinijeitaquempiri aca caaraiteriqui namantajeitajimpiri Egiptoqui. Tempa irotaque poapinijeitacari.’
33Ari icantiri iriori irirenti:
—Pijaye avirori maná, aparoni covitijaniqui pinquempoyeacotasanotero. Impoiji poyeero coajicani Pancotsiqui Irinanteari Tasorentsi. Irotaque ponijaajeiteriri ashanincajeitajeari coajicani.
34Ari imataquero icantaqueriri Tasorentsi Moiseshi, ijaaque covitijaniquiqui iroyeri coajica Cajóqui ontimanteari Icantacantiri Tasorentsi, aitaque inquempoyeacoterori.
35Yora ishanincajeitaniri Israel, icantani yoapinijeivetacaro maná ocarataque 40 osarentsi irosati yareejeitantacaro ovecaratapaaca quipatsi Canaán.
36Ora covitijaniqui omoncarataro apite litro. Icantiro irineanequi iriori hebreo “gomer.” (Ora caratatsiri 10 gomer omoncarataro aparo efa.)
Currently Selected:
Éxodo 16: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
