Éxodo 12
12
Icoacairi Tasorentsi inquenqueshiretapinitero quitaiteri Yavisantaniri, yoipacaacoventantajariri
1-2Ari icantajiri Tasorentsi Moiseshi anta Egiptoqui:
“Yoca meeca cashiri pinquenqueshiretapinijeitanteari, iriotaque intanajarori osarentsitantajeari. 3Meeca pincantajeiteri maaroni pishanincapee: ‘Ariorica oncaratanaque 10 iitaiterite cashirica, aitaque paayeteri pivancopeequi aparopee irijani ovisha iriorica chiivo, aisati inquempejeitaquea iriori icarajeitiri pishanincapee. 4Teerica irishequiteji ivancoquiniri iroanteariri maaroni virantsi, ocameetsati incajemeri itsipanampitari iroacaajeiteari impaarantayetaqueri aparopeeni icarajeitaque, irimatanteari iroajeiteari. 5Yora virantsi paayeteri iriotaque shirampari, moncarataquerori aparo irosarentsite, cameetsatatsiri caari amashiyetacha; iriorica ovishajaniqui, teerica, chiivojaniqui. 6Irosati pinquempoyeantaqueari. Ariorica omoncaratapaaquea 14 iitaiterite cashiri, irishaavijiiteanaquerica catsirincaiteri, irosati poantajeitaqueari. 7Paavaqueroyea iriraja, pimpantayetantearo poashinampiyetirori pashitacoropee. 8Ariorica ontsiteniiteanaque, aitaque poyeariri tashirentsi ivatsa, pintsipataqueri quepishiyetatsiri oshi jero tanta caari conoacha tapiacaarori. 9Eiro catsini poaritsi capichaji janari, aisati oncorentsi. Maaroni iito, iitipee, iramporetsapee, ocameetsati pintashijeiteri paamariqui. 10Eiro poanontajatsi poajeitamanajeari. Ariorica intimaarantapaaque, ocameetsati pintayeri. 11Aisati pinquitsaatitajeitaquea, pisapatotitajeitaquea aisati pajiriquitayetearo pinchaquiirepee; pishintsite poajeiteari. Tempa irotaque quitaiteri Navisantanaqueari, tempa narotaque Tasorentsisanori. 12Oca tsiteniriquica aitaque navisanaqueri maaroni Egiptoqui, irosati noamaajeitantanaqueari itomipee egiptosati jivayetatsiri itimi jeri iriori ivirapee jivayetatsiri itimi. Aitaque nontsoncajeitaqueri maaroni ijitasorentsitashiyevetari egiptosati. Tempa narotaque Tasorentsisanori cantasanotatsiri.
13“ ‘Ora iriraja pimpantayetero pivancopee, ponijantantearori jaocarica pisavicayetiri. Ariorica noneapaaquero, eiro noamaitajeitiritsi itomipee pishaninca, irintiquea navisanaque noamaitajeitanteariri itomipee egiptosati. 14Irotaque oca quitaiteri pinquenqueshiretapinijeitantearori aisati pinquimoshireventapinijeitero, pimpincatsatapinijeitantenari. Tempa irotaque nocantacantiri, oncantaitatiyempani. Irosati inquenqueshiretapinijeite iriori pishanincajeitajeari coajicani.
15“ ‘Oncarate 7 quitaiteri poajeitearo tanta caari conoacha tapiacaarori. Ariorica pintaanaquearo, te oncameetsateji ontime tanta tapiachari pivancopeequi. Jaanicarica oajeitaquearone, eiro pishinetiritsi incarajeitempi. 16Ora quitaiteri pintaantanaquearori jero sietetapaatsiri, ontimatiye pampatotimentajeitena; tempa irotaque pinashitacayenari ocameetsatasanotaque. Eiro catsini pantaveetantarotsi, irointiquea povetsicanontayetea poanaropee. 17Ora quitaiteri piquimoshireventantarori tanta caari conoacha tapiacaarori. Ocameetsati pinquimoshireventajeitero. Tempa irotaque quitaiteri nomishitoajeitantajempiri Egiptoqui. Pimatapinijeitero irotaque nocantacantiri oncantaitatiyempani. Irosati inquenqueshiretapinijeite iriori pishanincajeitajeari coajicani. 18Poapinijeitearorica tanta caari conoacha tapiacaarori, pintaanaquearo ishaaviniiji catsirincaiteri 14 iitaiteriti cashiri intanajearone. Aitaque pintaanaquearori poajeitearo tanta caari tapiacha irosati oncaratantanaquea 21 quitaiteri irishaavijiiteanajerica catsirincaiteri. 19Oncarate 7 quitaiteri eiro catsini otimayetitsi tanta tapiachari ivancopeequi pishaninca. Jaanicarica oaquearone tapiachari, eiro picarajeitajiritsi. Aisati inquempejeitea iriori pashinisati saviquimojeitimpiri. 20Irotaque eiro catsini poantarotsi conoachari tapiacaarori. Jaocapeerica pisavicajeiteri ocameetsati poajeitearo tanta caari conoacha tapiacaarori.’ ”
Icantiri Moiseshi jivatacantajeitatsiri
21Ari icajemacantaqueri Moiseshi maaroni jivatacaajeitiriri ishanincapee, icantajeitiri: “Pijajeite paayete aparopeeni ovishajaniqui, iriorica chiivojaniqui poimentajeiterori quitaiteri iravisanteari Tasorentsi iroavisaacojeitanteeri. 22Ora irirajapee paajayetavaquero covitipeequi, impoiji paayete panquirentsi icanteetiri hisopo, poisopatijaniquiyetaquero. Impoiji poviincaajatero irirajaqui virantsi pimpantayetantearo poashinampiyetirori pashitacoropee. Tecatsi sotoatsine aparo picarajeitiri, irosati onquitaiteantanajea. 23Ariorica iravisanaque Tasorentsi, iroamaajeitanteariri itomipee egiptosati. Ariorica irineanaquero irajantsi pipantayetaquerori poashinampiyetirori pashitacoropee, ari iravisanaquero. Eiro ishinetiritsi inampire oamantatsiri iroamaajeiteri pitomipee. 24Oca nocamantajeitaquempiri, oncantaitatiyempani. Irotaque icantacantiri Tasorentsi, ontimatiye pimpincatsajeitero aisati inquempetajea iriori ashanincajeitajeari coajicani. 25Ariorica pareejeitaquearo quipatsiqui icashiacaajeitaquempiri Tasorentsi impajeitempiri, pincantaitatiyempani pantapinijeitero oca nocamantaquempiri. 26Ariorica irisampijeitempi pitomipee: ‘¿Paita ojitari oca quitaiteri anquimoshireventajeiteri?’ 27Ari pancanaqueri: ‘Iro anquimoshireventantearori oca quitaiteri ampincatsajeitanteariri Tasorentsi. Aisati ayeneri virantsi anquenqueshiretantearori peerani yavisantanacarori ivancopeeni ashaninca, yoamaitajeitantacariri itomipeeni egiptosati jivayetatsiri itimi. Irintiquea avisacojeitajantsi itomipee ashanincapeeni.’ ”
Iquemajeitantacarori ishanincapee ora icantaqueriri, irosati yoivojeitantanaca, ipincatsajeitanaqueri Tasorentsi. 28Ari ijajeitanaque imajeitaquero ishanincajeitaniri Israel maaroni icantaqueriri Tasorentsi Moiseshi jeri Aarón.
Diestapaintsiri oashinoncantsi: icamajeitaque itomipee jivayetatsiri itimi
29Ari onianquiiteanaque, irosati yoamaitayetantacari Tasorentsi itomipee egiptosati jivayetatsiri itimi: jeri itomi pincatsari jivatatsiri itimi poyetajearineme impincatsaritaje, aisati iquempetitaqueri itomi timayetatsiri caravosoqui, jeri irijani ivirapee jivayetatsiri itimi. 30Yora pincatsari jeri iriori amitacoyetiriri aisati maaroni ishanincapee itinaajeitanaca tsiteniriqui. Antearoite catsini iraajeitanaca aisati yoashirejeitanaca catsini, otsoteanaca maaroni pancotsipeequi, te intimeji caari camaarantajeitatsine. 31Ari intsipaite icajemacantanaqueri pincatsari tsiteniriqui Moiseshi jeri Aarón, icantavaqueri:
—¡Pijajeitaje meeca! ¡Pinijantareanajeri natiritepee! ¡Pijajeite pimpincatsajeitapaajeri Pitasorentsite picantapinijeitanari! 32Paajeitanajeri maaroni povishatepee aisati pivacatepee, tempa picoajeitaque, pijajeitequeti meeca. Pincantacoventapaajena narori Pitasorentsitequi.
33Ari ishintsinajeitanaqueri, icoaque irijajeititanajea intsipaite. Tempa iquenqueshirejeitaca ijijeivetaca ari incamajeitaque maaroni. 34Irosati yovetsicaarantajeitantaja ishanincajeitaniri Israel. Yaayetaquero aisati ora ijapatsayevetacari caari iconoayeti tapiacaarori tanta, yapinaicapatsayetaquero quitsaarentsiqui, inquijacoyetantanaquearori. 35Aisati ijatashijeitapaintiri egiptosati icoacoyetapaintiri ineapiniyetiri. Ipantayetavacariri maaroni timimoyetiriri: vetsicayetachari plata, oro jero aisati iitsaarepee. 36Yora Tasorentsi icantashireacaajeitacari egiptosati ipashijeitantavacariri cameetsa maaroni yamanajeitapaintiriri. Aitaque ocantari yaitajeitanaqueri yashiyevetaniri egiptosatipee.
Ishitoantajeitanajari ishanincajeitaniri Israel Egiptoqui
37Irosati ishitoantajeitanaja, yojocajeitanajiro inampini Ramsés, iquenajeitanajiro anta Sucot. Oshequi catsini inajeiti. Icarajeiti 600,000 shiramparipee moncaratachari imanajeitea, jero aisati tsinanepee jeri jananequipee. 38Aisati oshequi pashinisati atiripee oijajeitanaqueriri. Aisati iquempetaca irovishatepee jeri ivacatepee oshequi catsini. 39Iro cantaincha, te osamaniteji irovetsicanontajeitantanajeari iroajeitanajeari nianqui; tempa ishintsinajeitajiri egiptosatipee intsipaite irijajeitaje. Irointi yaanaque tanta yovetsicaqueri caari conoacha tapiacaarori.
40-41Ari ocarati 430 osarentsipee isavicantajeivetacari anta Egiptoqui. Omoncaratantapaacari 430 osarentsipee, ishitoajeitantanajari Egiptoqui. 42Ari nianquiiteni tsiteniri aitaque yamenacoventajeitaqueriri Tasorentsi yomishitoajeitantajariri. Irotaque inquenqueshiretapinijeitantearori ishanincajeitaniri Israel osarentsipeequi. Aisati inquempejeitajea iriori irishanincajeitajeari coajicani, incanteani inquimoshireventapinijeitero.
Icantacantiro Tasorentsi inquimoshireventapinitero yavisantaniri
43Ari pashini quitaiteri icantasanotaqueri Tasorentsi Moiseshi jeri Aarón:
“Jero oca nocantacantiri: Ariorica pinquimoshireventero quitaiteri navisantacari caari noamaajeitantari pitomipee, te noncoacaajeiteriji pashinisati iroajeiteari ivatsa poaquenari. 44Irintiquea oajeitearine yora pinampirepee jeri pamanantanepee, tempa pitoyeantajeitaqueri irinti. 45Itimirica pashinisati quivantimpiri, iriorica antaveetimpiri, eiro catsini yoayetaritsi. 46Ocameetsati iroacaajeiteari irinti itomipee aparopeequi ivancoqui. Eiro catsini ishitoacairitsi ivatsa saiteriqui aisati eiro icarajayetiritsi itonqui. 47Aisati inquempejeitaquea maaroni pishanincapee. 48Iro cantaincha isaviquimojeitimpirica pashinisati atiri coatsiri incarajeitempi, ocameetsati pintoyeantacantajeri aisati iriori ishanincapee. Impoijiquea pincarajeitajeri inquempejeitantanajempiri. Eiro catsini poacaajeitaritsi caari toyantajeitacha. 49Oca nocantacantiri, ocameetsati irimoncarajeitajero maaroni pishanincapee timajeitajantsineri coajicani, jeri pashinisatipee saviquimojeitempine.”
50Ari imajeitaquero ishanincajeitaniri Israel icantaqueriri Tasorentsi Moiseshi jeri Aarón. 51Aitaque ocantacari imishitoajeitajiri Tasorentsi ishanincajeitaniri Israel anta Egiptoqui. Ijajeitanaque iveshintsajeitanaca.
Currently Selected:
Éxodo 12: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
