Éxodo 1
1
Yashinoncaajeitantacari ishanincajeitaniri Israel anta Egiptoqui
1-4Jero oca ivajiro itomipee Jacoboni icarajeitanaqueri peerani ijatantacari Egiptoqui:
Rubén, Simeón, Leví, Judá,
Isacar, Zabulón, Benjamín,
Dan, Neftalí, Gad jeri Aser.
5Yora ishanincajeitaniri Jacoboni icarajeiti yapatoajeitanaca 70, irintiquea José ijatitaca Egiptoqui.
6Ari icamaqueni José aisati irirentipeeni jeri maaroni icarajeivetanacari. 7Iro cantaincha itimajeitanaque oshequi catsini itomipee iriori. Ishequiasanojeitanaque, oshequi imajeitaqueri. Itsoteanaquero ora quipatsi isavicajeitapaaquenta.
8-9Ari osamaniiteanaque iqueanaji pashini pincatsariventajeitajerine egiptosati caari ioterine José. Icantajeitiri ishanincapee: “Pamenajeite, yora ishanincapeeni Israel aiquero ijatatii yoshequiasanojeitanaque, yanaacojeitanaquee ainti ishintsitasanojeiti. 10Tsame amperanatasanojeiteari antacaayeteri paitapeerica, eiroquea itimacantayetajarotsi ijinapee yoshequiasanojeitanajicari. Arioyeata incarajeitaqueri manajeiteeneri ariorica impoque iromanajeitanaquee, irosati irijajeitantanajea, irojocantajero aipatsite.”
11Irosati icoyeantajeitaca ishanincapee egiptosati antaveetacaasanojeiterine ishanincajeitaniri Israel. Ari yovetsicacaajeitaqueri pancotsipee anta apite nampitsi irashiteari yora faraón pincatsaritatsiri, inquempoyeacantapinijeitantearori panquirentsipee yoyeetari. Opajita Pitón jero Ramsés. 12Ari yoashinoncaasanojeivetacari, iro cantaincha aiquero catsini yoshequiasanojeitanaitii. Ineajeitantacariri egiptosati, oshequi iquenqueshireacojeitanaqueri aisati itsaroajeitanaque.
13Iro cantaincha aiquero ishintsinatapinijeitanaqueri yoashinoncaasanojeitaqueri. 14Icantanentacaacari, te irisavicajeite cameetsa. Icantani ishintsinatapinijeitaqueri ijavatsatacaapinijeitaqueri quipatsi yovetsicacaaqueri adobepee, aisati yantaveetacaajeitaqueri oantsipeequi. Oshequi catsini yoashinonqueetaqueri ishanincajeitaniri Israel.
15-16Aisati icantaquero pincatsari ora apite tsinane pajitachari Sifrá jero Puá, amenirori ishanincapee hebreo timajaniyetatsiri. Icantiro:
—Ariorica pamenero tsinane hebreo timajaniyetatsiri, iriorica ontimeri shirampari ocameetsati poavaqueri. Irompa iroorica timatsine tsinane, eiro poirotsi.
17Iro cantaincha te onquemisanteriji icantavetacarori; tempa oshequi opincatsatasanotaqueri Tasorentsi, irotaque caari oajeitantari. 18Irosati icajemacantantacaro pincatsari. Icantavaquero:
—¡Paita pishinejeitantacariri yaneajeitaque jananequipee!
19Ari acanajeitaqueri iroori. Ocantiri:
—Novincatsarite, ora tsinanepee oshanincapeeni Israel, te onquempejeitearoji egiptosato, intsipaite otimajanitita irointi tequerata narori nareeteaji namenantearori.
20-21Aitaque icantacari yora ishanincajeitaniri Israel yoshequiasanojeitantanacari catsini. Aisati aiquero cantsini ishintsitasanotanaitii. Tempa ora amenantatsiri opincatsataqueri Tasorentsi, irotaque icavintsantacarori, yoshequiacaasanojeitantacanarori oshanincapee.
22Iro cantaincha yora pincatsari icantaqueri maaroni ishanincapee: “Poviincajeiteri nijaqui maaroni itomipee ishanincapeeni Israel iroaquera timayetatsi. Irointiquea tsinanejaniqui, eiro poviincajeitirotsi.”
Currently Selected:
Éxodo 1: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
