Proverbios 31
31
Na la'aqtacpi so Lemuel
1Na la'aqtacpi so nta'a Lemuel maye lma' ye Masah,
nam na'aqtaxanaxacpi maye ỹapaxaguenec co'ollaxa aso late'e, 'eeta':
2'Am ỹalcolec maye aỹem 'auachegoxoigui co'ollaxa,
'am ỹashelaxanaxat co'ollaq seỹaxanot Ñim Lo'onatac 'Enauacna,
¿negue'tom ca lỹa ỹa'aqtac da 'am sanem?
Nacherata da 'eeta':
3Saishet da 'aumatalec da 'ara'añaxac na 'alpi,
ten huo'o na nta'alpi na mashe daqat
ỹasouaxat anamayepi.
4Qataq da lỹa, 'am Lemuel, sa ỹaỹamaxañi da na nta'alpi
qataq na nataxala'pi da nỹomtapigui na lataxa
qataq na ỹactec da lchemaxa namaye,
5cha'aye da nỹomtac nache ishet da icoua'ai na nqataxacpi,
qataq qaica ca ỹanaigui ca 'eetapeguec na choxoraqpi.
6'Aua'axaỹa'a qome na lataxa qataq na ỹactec da lchemaxa namaye,
nda'a't da 'aỹa'anem da nỹomgui ca qaica ca la'añaxac qataq ca daquicota,
7yaqto' da nỹom nache icoua'ai da lachoxoyec,
qataq saishet da ntoonec da nque'eenaxac.
8'Anlamaxaren qome da 'autaqlec
na sa qana'axaỹaxana da detaqa,
qataq 'aueelec qome nam qaica ca iueelec.
9'Anlamaxaren da 'autaqa, 'auo'ot ca nalochiguiñi lataxac,
ỹataqta 'aueelec na choxoraq qataq na huo'o da lhuenaxanaxa.
Ño'oxonnataguec aca 'alo maye no'on da lataxac
10Aca no'on 'alo ỹataqta huo'o da lqalaic da qaỹanata,
acamaye napacalec da lashiichiỹaxac na ỹataqta no'on coma'.
11Ca lhua ỹataqta imatalec da lpi'iỹaxac acamaye,
qataq saishet da decachetac da yaqto' huo'o aca laueque.
12Ỹataqta machiguiñi naqa'en da lavilỹaxac ca lhua
'enauaque naua na'axa'te da nachaalataxac.
13Jec da nmitaique na qagueta laue qataq na lino,
qataq ỹataqta nasapatta da ỹo'ottac na lqaleenec.
14Qaq 'eeta'am ana notaxaqui
da qanayeguelec na 'etaxat maye laỹe' na nmenecpi,
maye qaỹoqtegue ca ỹachegoxota'ague na lla'ac nallec.
15Da yaqta'a da yo'oxoñi nache ñisheguem,
nache iquia'axan na llalaqpi qataq ana llaqtapi.
16Imeten ca 'alhua maye qaimeetac
nache desheenaxana,
nache añi laueque do'onataxana da ỹaañi ana uva.
17Ỹataqta huo'o da na'añaxataxac,
qataq da lquesaxanaxa da do'onataxaatac.
18Qataq ilo'ogue da lo'onataxanaxac
da yaqto' qaica cara,
qataq ivira'a ye pe da saishet da 'omtalec.
19Huota'a na lhua'q da nasoqta'a ana lqaleenaxanaqte
qaq na lỹa lhuaq qalaq deqalenaxaatac naqa'en.
20Itauaatac nataqa'en na choxoraqpi,
qataq iviraxatauga na deuenaxaatacpi.
21Saishet da leetapigui lauel da nvi' ana aloñi,
cha'aye 'enauac na llalaqpi dapaqchigui na logoxot.
22Na lapo'pi qalaq maiche lo'onatac,
na no'otaxat qalaq ndotec na no'on tocalec
da lo'oxoỹaxac qataq na no'on lino.
23Qaq so lhua ỹataqta qaỹauattoota cam hueta'a huaqta'a't nỹecpi,
qataq ỹataqta nalaigui na 'amaqtaqaicpi ca qanayeuta'a 'alhua.
24Maiche ỹo'ottac na nogoxotpi
qataq na saataxaquipi,
ime, nache imenot na nmenaxaicpi.
25Qataq ỹataqta ỹaatañi da la'añaxac
qataq huo'o da 'enec qanqa'en,
qataq saq leetapigui lauel naqa'en
cam huaigui ca lỹa na'a'q.
26Qataq ỹaanaxanaxaiqa naua la'aqtaqa da detaqa,
qataq huo'o da lsoxoyec da dapaxaguenataxaatac.
27Ỹataqta ilotegue da llecỹaxac ca lma',
qataq sa ỹe'egueeta'a da chec ca saq chegaqaigui da la'añaxac.
28Qaq da ñisheguem na llalaqpi nache ỹo'oxoreetac
qataq ca lhua ỹo'oxoreetac acamaye, 'eeta':
29«Qalota ana no'on 'alo,
qalaxaye 'am, 'anapacalec 'enauac anamayepi.»
30Da nqopitaxanaqtaic, damaye choche dayenaxan,
qataq da nyacỹaxac qaica ca naigui,
qalaxaye aca 'alo maye huo'o naq 'enec naqa'en Ñim Nataxala',
acamaye ỹataqta 'itchiguiñi da qaỹo'oxoren.
31¡Qaq acamaye qaỹo'oxoren qome
da qaỹalectaigui na ỹotta'a't shiỹaxauapi!
¡Qataq qaỹa'axatec 'enauac na no'on ỹo'otpi!
Currently Selected:
Proverbios 31: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.