Marcos 4
4
Qaỹaloqnaxana ca danaxaatac
(Mateo 13.1-9; Lucas 8.4-8)
1Qaq so lỹa na'a'q, nache So Jesús dapaxaguenataxaatac, neto'ot na loigue aso lapel ye Galilea. Qaq cha'aye souaxat da ỹataqta qalota so shiỹaxauapi maye na'axaỹaxaatac, nache So Jesús huenongui aso 'oonole nllocta, nache nso'ooñi da yaqto' dapaxaguenataxan.#4.1 Nso'ooñi da yaqto' dapaxaguenataxan: Se'eso na'a'q maye huetaigui So Jesús, da lataxac naxa na dapaxaguenataxaatacpi ỹataqta nso'oochiguiñi da ivita da dapaxaguenataxan. Qaq so shiỹaxauapi nachattañi neto'ot na loigue aso lapel.
2Nache So Jesús ỹataqta qalota na dapaxaguenataxanec, ỹauota'a na laloqnaxanaxatpi. Qaq Somaye 'era da daloqnaxana 'eeta':
3«Ỹataqta qana'axaỹaxañiichigui de'era: Huo'o so ỹale jec da ỹaañi aso lañiguishe ala. 4Qaq co'ollaq ñaq danaxaatac, nache huo'o aso lañiguishe ala tatelec so nqa'aic. Qaq co'ollaq qaỹata'ague, nache anac na qoỹopi, nache chec.
5Qaq aso lỹa lañiguishe ala tatelec so 'alhua maye ỹaguec na coma', qaq na 'alhua qalaq saq 'amaqtaq. Qaq souaxat da na 'alhua ye saqaỹangui, nache saqaỹaloq da ñaxat aso nañiguishe. 6Qaq ỹoqo'oye aso nañiguishe ye saqaỹa'ague na lpa'a', nache co'ollaq nnoxoosheguem añi nala', nache ỹavigaxat.
7Qaq aso laỹepi lañiguishe ala qalaq tatelec so 'alhua maye, nache 'eetai' naxa da lañaxataqa' ana ỹaxat. Qaq co'ollaxa ñaxat aso ỹaxatpi, nache asomaye ỹapolec aso nañiguishe, nache saishet da huo'o ca lañaxataxac naqa'en. Qaq ỹoqo'oye aso nañiguishe qaica ca alaỹaxac.
8Qalaxaye aso laỹepi lañiguishe ala tatelec so 'onaxaic na 'alhua, qaq asomaye huo'o ana ala, qataq 'onaxaic da lañaxataxac, qataq 'onaxaic da alaỹaxac. Nache huo'o ana ivi' ana treinta ana alapi añi 'oonole, qataq huo'o ana ivi' sesenta, qataq cien.»
9Ime, nache So Jesús 'eeta':
«¡Da ỹoqta 'eesa da huo'oi naua qartelai lauacolli', qaq no'on da ỹataqta qana'axaỹaxañiichiguiñi!»
Da 'eetec da huo'omshe qaỹauo'o na naloqnaxanaxatpi
(Mateo 13.10-17; Lucas 8.9-10)
10Qaq co'ollaq mashe yaqta'a da imetec so shiỹaxauapi, nache som no'ona'aguet So Jesús, qataq soua doce lapaxaguenataqa inattaco' Somaye, da chaq negue't ca naigui som daloqnaxaatega maye danaxaatac. 11Nache So Jesús ỹasateguet somayepi 'eeta':
«Qami' maye qami' sa'aqtaxaatema dam saqcha'a lo'onataxanaxac Ñim Lo'onatac 'Enauacna, qalaxaye na laỹepi shiỹaxauapi da sapaxaguen qalaq sauota'a na ỹaloqnaxanaxatpi. 12Yaqto' na'aictaxa da nlotauec, qalaq saishet da ila'a, qataq da hua'aqtac, qalaq saishet da ỹaỹaten. Nachaqrata da ntouen, nache iỹaxanot Ñim Lo'onatac 'Enauacna da ỹapalaxat na lasouaxashetpi.»
So Jesús ỹa'axat da naigui so danaxaatac
(Mateo 13.18-23; Lucas 8.11-15)
13So Jesús 'enapeco':
«Da sa qauaỹaañiguet aso saloqnaxaatega nañiguishe ala, nache ¿ca 'eeteco' da ishet da qauaỹaañiteguet na laỹepi ỹaloqnaxanaxatpi?
14So danaxaatac naigui ca ỹa'axattac da no'on na'axaỹaxac. 15Qaq aso nañiguishe alapi maye tatelec so nqa'aic, naigui nam na'axaỹaxana dam no'on na'axaỹaxac, qalaxaye da anac so pa'aguenataxanaxaic, nache ỹo'otec da icoua'ai 'enauac nam hua'aqchiguipi.
16Qaq aso nañiguishe ala maye tatelec so coma'sat, qalaq naigui nam na'axaỹaxaatega da na'aqtaguec da lo'onataxanaxac Ñim Lo'onatac 'Enauacna, nache saqaỹaloq da ỹaconeguet qataq lta'araic da ntonaxac. 17Qalaxaye saishet da ỹoqta ỹaỹateeteguet de'era na'aqtaxanaxac, nache da ntonaxac sa qaỹauec, qataq da nque'elaxatta da huo'o na ivireguet, qaltaq da sa qaiyacnapec souaxat da ỹalaxaguet Ñim Lo'onatac 'Enauacna, nache icoua'ai da na'aqtaxanaxac.
18Qataq huo'o na laỹepi na 'eeta'am aso nañiguishe ala maye tatelec so 'alhua maye, nache 'eetai' naxa da lañaxataqa' ana ỹaxat. Namayepi na'axaỹaxana da na'aqtac, 19qalaxaye saishet da hua'aqta'a damaye da naralaxat da nachaalataxac. Nachaqrata da iuennatega nam yo'oqchigui lhuenaxanaxa, da qanauec aca anom, qataq da 'eetec da iqopitaxaatac da nachaalataxac.
20Qaq da pa'atec, aso nañiguishe ala maye tatelec so no'on 'alhua, damaye naigui nam na'axaỹaxaatega da na'aqtaxanaxac qataq ỹasateguet. Qaq que'eca shiỹaxauapi naralaxat da nachaalataxac qataq ỹo'ot da ỹaỹamaqchiguiñi, 'eeta'am aso nañiguishe ala maye huo'o ana ivi' ana treinta ana alapi añi 'oonole, qataq huo'o ana ivi' sesenta, qataq cien.»
Qaỹaloqnaxana aso ncoỹaraxanaxaqui
(Lucas 8.16-18)
21Qaq co'ollaq ime de'era, nache So Jesús 'enapeco':
«¿Peta'a isheto' da qandouo aca ncoỹaraxanaxaqui da mashe ime da qoỹegueua'a, nache qoỹano'ot na pa'aguiñi ca naretaxanaxala', huo'otaq ca mala'? 'A'i, saishet. Nda'a't da acamaye qoỹanasheguem, yaqto' yo'oqchiguiñi naqa'en. 22Cha'aye 'enauac nam qoỹoxottapiguiñi ivira'a da qailalec, qataq saishet da huo'o ca saqcha'a, da huo'otaq queta da sa qaỹaỹaten.
23¡Da ỹoqta 'eesa da huo'oi naua qartelai lauacolli', qaq no'on da ỹataqta qana'axaỹaxañiichiguiñi!»
24So Jesús nataqa'en 'enapeco':
«¡Ỹataqta qana'axaỹaxañiichiguiñi! Ñim Lo'onatac 'Enauacna ipagaqchiichigui cam lcata ca qaỹa'añim ca qarỹai, qataq ishet da ỹactec naqa'en ca qami' ỹanema. 25Cha'aye cam huo'o ca hueto'ot, camaye qanquigaxattec ca qoỹanem, qaq cam qaica ca hueto'ot, qalaq ivira'a cam saq 'amaqtaqolec hueto'ot qaỹacona.»
Qaỹaloqnaxana aso nañiguishe ala maye ñaxatsheguem
26So Jesús nataqa'en ỹauo'o de'era daloqnaxana, 'eeta':
«Da lo'onataxanaxac Ñim Lo'onatac 'Enauacna, damaye 'eeta'am ca ỹale maye ỹanoigui na 'alhua aca lañiguishe ala. 27Qaq na'aictaxa da do'ocheta huo'otaq da nlotauec, huo'otaq pe huo'otaq ye na'a'q, aso nañiguishe ñaxat qataq nquictasheguem da lañaxataxa, qalaxaye som ỹaañi saishet da noma ca 'eetec da lañaxataxac asomaye. 28Cha'aye nam 'alhua maiche ỹo'ot naqa'en da lañaxataxac asomaye, hua'auñi da nnoxoosheguem aso nañiguishe, qaỹata'ague, nache huo'o ana lauoxo, ime, nache huo'o ana alapi. 29Qaq da ivita da ỹe ana alapi, nache qanqo'oneuga da qanqat, cha'aye mashe ivita ye laloqo'.»
Qaỹaloqnaxana aso ala ana mostaza
(Mateo 13.31-32; Lucas 13.18-19)
30So Jesús nataqa'en, 'eeta':
«¿Negue'tom ca 'eeta'am da lo'onataxanaxac Ñim Lo'onatac 'Enauacna? Qataq ¿negue'tom ca ishet da saloqnaxana? 31Damaye, 'eeta'am aca ala ana mostaza da ỹaañi cam ỹo'ottac na 'alhua. Qaq na'aictaxa da acamaye ỹataqta qaica ca la'amaqchec, saq 'ena'am ana laỹepi nañiguishe ala ana 'alhua, 32qalaxaye da ñaxat, nache ỹataqta napacalec ana laỹepi nañiguishepi que'eca nanaxanaqa'. ¡Ana lcouepi ỹataqta qalochiguiñi, qaq ỹoqo'oye na qoỹopi ishet da anac, nache taiguilo naua lcouel da ỹo'ot na lpata'c!»
Na laloqnaxanaxatpi maye iueetac naxa So Jesús
(Mateo 13.34-35)
33So Jesús dapaxaguenataxanec da na'aqtaxanaxac maye ỹa'axat da lo'onataxanaxac Ñim Lo'onatac 'Enauacna, ỹachegoxotchigui na qalota daloqnaxanapi, nam ishet da ỹaỹateeteguet na shiỹaxauapi. 34Qaica ca la'aqtaxanaxac Somaye da huo'otaq saqca ca daloqnaxana. Qalaxaye da nda'ai'salo naxa soua lapaxaguenataqa, nache npottegueto da ỹataqta da'aqtaxaatema qataq ỹataqtegue naqa'en.
So Jesús vi'iiguet naqa'en so la'at
(Mateo 8.23-27; Lucas 8.22-25)
35Qaq nacheso se'eso na'a'q, co'ollaq mashe pe, nache So Jesús 'enapegalo soua lapaxaguenataqa, 'eeta':
«Saxatague da lỹa le'ego ana lapel.»
36Ime, nache ca'ai so shiỹaxauapi, nache ỹa'axasoxoolec aso lapel netrangui aso l-llocta'. Nataqa'en huo'o so laỹepi shiỹaxauapi da jec, huenoteua'a aso laỹepi nlloctapi.
37Qaq nque'elaxatta da huo'o so la'at lta'araic. Qaq cha'aye se'eso la'at ye ỹataqta lta'araic, nache ana lapaxa na 'etaxat tangui naqa'en aso nllocta, nache asomaye nquictasheguem na 'etaxat na lauel.
38Qaq So Jesús do'ocheta, neta'aguet na lsheenec nca'attauo aso nllocta, hua'aqtañi ỹauota'a so na'axanaxat. Nache soua lapaxaguenataqa nquetoxono' Somaye, ỹataqta qaỹa'alaxalec, qoỹeeta':
–'Am Napaxaguenataxanaq, ¿peta'a ỹataqta sa 'auteno'o' da qomi' iyiiyiñi?
39Nache So Jesús ñesheguem, nache 'enapega so la'at qataq aso lapel da nañaxaayiñi. Nache so la'at vi'iiguet, nache 'enauac da ỹe'eguelaxa da ntochiguiñi.
40Nache So Jesús 'enapegalo' soua lapaxaguenataqa, 'eeta':
–¿Ta'ainco' ye ỹataqta ỹapac da qarcolanaqai? ¿Ỹataqta ñaq saxanaqca peta'a ca qarpi'iỹaxaqui Aỹem?
41Qalaxaye soomaye ỹataqta nlaqchiguilo da lcolanaqa' nache nnattrega't, 'eetra':
«¿Negue't dam da' ỹale, ye ivira'a na la'at qataq na 'etaxat da ỹalaxaguet?»
Currently Selected:
Marcos 4: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.