Marcos 3
3
So Jesús nataren so ỹale so na'a'q mataxaqui
(Mateo 12.9-14; Lucas 6.6-11)
1So Jesús qaltaq inoxoneua'a aso napaxaguenaxaqui#3.1 Paxaguenaxaqui: Qaitaxaỹaxan da naigui de'era na'aqtac hueta'a ye Marcos 1.21. na judiopi, nache huo'o so ỹale maye ỹalectauo daqaqta na lhuaq.
2Qaq so chegaqaigui na fariseopi choche nauaatac So Jesús da huo'otaq nataren so ỹale se'eso na'a'q mataxaqui maye saishetapec namayepi, da yaqto' ishet da qaỹauo'o ca lasouaxashet Somaye.
3Nache So Jesús 'enapego' so sano'on, 'eeta':
«Ña qoñisheguem, 'anachaangui na laiñi na shiỹaxauapi.»
4Ime, nache inat som hueta'a yi'iye, 'eeta':
«¿Chaq negue't ca ỹaỹamaqchiguiñi da qaỹo'ot ye na'a'q mataxaqui maye saishetapec na judiopi: Ca qauem, huo'otaq ca no'on? ¿Qanca'alaxatec ca shiỹaxaua, qalqo' qaỹalauat?»
Qalaxaye qaica ca ỹasateguet Somaye. 5Nache So Jesús ỹataqta dalemataỹa som datataiguipi, qaq co'ollaq ila'a da lquiyaqteỹaxac somayepi da ỹataqta qaramchigui qataq qaica ca lsoxoyec, nache huo'o da laquicoxo. Nache 'enapego' so sano'on, 'eeta':
«'Anchennaxanec na 'arhuaq.»
Nache se'eso ỹale nchennaxanec na lhuaq, nache no'oita.
6Huaña, nache so fariseopi ca'ai aso napaxaguenaxaqui na judiopi, nache sanaỹaloxon da nqo'ona nam quetague'pi so nta'a Herodes#3.6 Quetague'pi so nta'a Herodes: Shiỹaxauapi maye se'eso na'a'q quetague' qataq itauaatac so nta'a Herodes qataq so llalec Herodes Antipas. da qaitaxaỹapigui ca lataxac da qaỹalauat So Jesús.
So Jesús dapaxaguenataxan qataq datannaxan
7-8So Jesús jec, nnaicapegueto soua lapaxaguenataqa da taraxaama so loigue aso lapel. Nache qalota so ca'ategue shiỹaxauapi som hua'aqtapeguelec nam ỹo'otpi Somaye. Somayepi huo'o na chegaqa'a ye 'alhua Galilea, qataq ye Judea qataq ye nỹecpi ye Jerusalén, qataq ye Idumea. Qataq huo'o na chegaqa'atague da le'ego so tala Jordán, qataq huo'o na shiỹaxauapi maye chegaqa'a ye saqaỹapeque ye 'alhua Tiro, qataq ye Sidón.
9Qalaxaye souaxat da ỹataqta qalota so shiỹaxauapi, nache So Jesús 'enapegalo soua lapaxaguenataqa da ỹaỹamaxaayiñi aca 'oonole nllocta, da yaqto' saishet da qanpataxagui Somaye. 10'Eetai'toxo' da So Jesús mashe qalota so nataren, qalaxaye ñaqaiyeta ña qalota so sa no'onpi. Qaq somayepi ỹataqta coleesop So Jesús da huotaique da ipoteua'a da yaqto' no'oita.
11Qaq nam saqcha'a na'añaxacpi leguemaxaicpi co'ollaq ilo'ot So Jesús, nache huañipi qataq ỹa'alaqtagui, 'eeta':
«¡'Am nache 'am Llalec Ñim Lo'onatac 'Enauacna!»
12Qalaxaye So Jesús ỹataqta sa ỹala'ac da 'enapega na na'añaxacpi maye saqcha'api, da saishet da ỹa'axat da chaq negue't Somaye.
So Jesús lca'aua'alo soua doce lamaxa'she
(Mateo 10.1-4; Lucas 6.12-16)
13Qaq co'ollaq ime de'era, nache So Jesús huo'o so maiche lca'aua'api da ỹaviguisheguemec aso qaỹoqotcheguemec 'alhua. Qaq co'ollaq mashe lapoota'a't somayepi, 14nache lca'aua'alo soua doce somayepi, da yaqto', nache 'eetai' da nnaictagueto Somaye, qataq da yaqto' ỹama'q da ỹa'axa't da no'on na'axaỹaxac. Qaq se'esoua doce, Somaye ỹanaguilo da lamaxa'she. 15Qataq ỹanema soomaye da la'añaxa'c da nataren na sa no'onpi, qataq da ca'ai naqa'en na shiỹaxauapi nam saqcha'a na'añaxac leguemaxaicpi.
16Qaq 'enaua naua le'enaqa'ate soua doce, 'eeta': Simón som ilonec So Jesús da Pedro, 17qataq so Santiago qataq so lqaỹa Juan, maye llalqa so Zebedeo, som iloneque So Jesús da Boanerges, damaye naigui da «llalqa na nalataxa», 18qataq so Andrés, Felipe, Bartolomé, Mateo, Tomás, qataq so Santiago som llalec so Alfeo, Tadeo, qataq so Simón maye chegaqaigui nam dataỹa'aguet naxa na nta'alpi, 19qataq so Judas Iscariote, maye ỹaneuo co'ollaxa So Jesús.
So Jesús qataq so lataxala' na saqcha'a na'añaxac leguemaxaicpi
(Mateo 12.22-32; Lucas 11.14-23; 12.10)
20Qaq co'ollaq ime, nache So Jesús ỹe'eguelaxaua'a so nỹec, nataqa'en soua lapaxaguenataqa. Nache qaltaq qalota so laponeua'a shiỹaxauapi, ivitta'a da soomaye qaica ca ldaqa't da deque'e'. 21Qaq so lauo' le'ecpi So Jesús co'ollaq ỹaỹaten da ỹo'ottac Somaye, nache qanqo'ona da yaqto' qaỹauec, cha'aye Somaye qoỹeetega da huo'o da aloic.
22Qalaxaye huo'o som dapaxaguenataxaatapeguec nam namaxasoxonaxacpi maye chegaqa'a ye Jerusalén somayepi, 'eeta':
«De'era ỹale, damaye netaigui ñi Beelzebú ñim lataxala' nam na'añaxacpi leguemaxaic. Qaq nacheñi ñim chegoqo'ot de'era la'añaxac da do'otaxaatega da ỹo'orauec namayepi.»
23Nache So Jesús iỹaxano' somayepi, nache ỹauo'o de'era daloqnaxana, 'eeta':
«¿Hua'ago' ca 'eetec ca lataxac da so pa'aguenataxanaxaic da maiche no'orela't? 24Ca shiỹaxauapi maye hueta'a que'eca 'alhua da maiche deloguiỹa't, nache camayepi taỹa'a da nlaguiñi. 25Qataq ca maiche nhuo' le'ecpi da huo'otaq maiche npa'aguena't, nache camayepi nataqa'en taỹa'a da nlaguiñi. 26Qaq nache 'eetec nataqa'en so pa'aguenataxanaxaic da delogui' ca maiche laỹepi, nache da lo'onataxanaxac nlaguiñi.
27Qataq da huo'o ca huotaique da decachigui ca lma' ca ỹale 'añaxaic, qaq camaye iuen da hua'auñi da icoñerai' que'eca ỹale.
28Qaq ỹataqta 'eesa de'era qami' sa'axatema nagui, da 'enauac na shiỹaxauapi ishet da qaỹapalaxat na lasouaxashetpi, qataq 'enauac nam qauem la'aqtacpi maye nasaxauec. 29Qalaxaye ca qauema naua la'aqtaqa da detaxaỹa So Saqcha'a Na'añaxac Qui'itta, nache camaye ỹataqta saishet da huo'o ca nchoxonnataguec.»
30Qaq 'era da 'eetec da la'aqtac So Jesús, cha'aye som dapaxaguenataxaatapeguec nam namaxasoxonaxacpi ipettego' da Somaye huo'o ca netaigui saqcha'a na'añaxac leguemaxaic.
Aso late'e qataq soua lqaỹa't So Jesús
(Mateo 12.46-50; Lucas 8.19-21)
31Huaña, nache nvireuo aso late'e qataq soua lqaỹa't So Jesús, nvireua'a ca nỹec maye hueta'a Somaye, qalaxaye pa'atraue'c, nache damaxasoxooreua'a Somaye. 32Nache som nso'ootañipi maye datato'ot So Jesús 'enapego' Somaye, 'eeta':
–Ara 'arate'e qataq daua 'arqaỹa't, daamaye pa'atraue'c, huotraique da 'am detaxaỹapegueto.
33Qalaxaye So Jesús denataxano', 'eeta':
–¿Negue't acam ỹataqta 'eesa da ỹate'e, qataq ca ỹaqaỹañicpi?
34Ime, nache ỹamataigui 'enauac som nso'ootañipi maye datato'ot Somaye, nache 'enapeco':
–'Ena nam ỹoqta ỹaqaỹañicpi, qataq 'ena nam 'eeta'am aca ỹate'e. 35Cha'aye ca ỹoqta 'eesa da ỹalaxaguet Ñim Lo'onatac 'Enauacna, qaq nacheca cam ỹaqaỹa qataq ỹate'e.
Currently Selected:
Marcos 3: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.