Miqueas 7
7
1¡Qaq choxoraicolec aỹem Miqueas! Cha'aye sheeta'am ca nmittac ca nanaxanaqa',
da mashe ime da qanqat ana ala na nañiguishec,
nache saishet da ilalec aca uvapi huo'otaq hiigopi,
acam ala na nañiguishec maye nshetaique da chec.
2Cha'aye mashe qaica ca choxonnataxanaxaic ana 'alhua,
qataq mashe qaica ca no'onañi shiỹaxaua maye no'on da lataxac,
nda'a't nam quetegueua'a da huo'o ca loxonec da ỹalauat,
qataq ñi 'oonolec ỹoiqueetac da nqovin ca lỹa.
3Nache namayepi qaica ca nauec da ỹo'ot na qauem,
qaq nam nataxala'pi iỹaxaata'a da qaisheeten da huo'o cam ỹo'ot,
qataq nam nmit na nasouaxashetpi iỹaxaata'a da qaisheeten da huo'o ca nmit,
qaq nam 'amaqtaqaicpi qalaq maiche ỹoiqueetac nam ỹo'otpi,
nache ỹataqta na'axat da lataxac nam netaigui nam huaqta'a't nỹecpi.
4Qaq nam qoỹeetega no'on da lataxac maye ỹalectaigui namayepi,
qalaq 'eeta'am anam qo'oipaq maye huo'o ana le,
qataq nam qoỹeetega huesota da lataxac qalaq 'eeta'am aca zarza.
Qalaxaye mashe anacta cam na'a'q maye huaigui da nhuaxanaguec,
cam na'a'q maye ỹa'axatta'a co'ollaxa so lauanaxanaxanecpi namayepi.
Huaña qome nache namayepi saỹaỹaten ca 'eetec.
5Saishet qome da 'aua'amaqten ca la'aqtaxanaxac ca 'arỹa,
qataq saishet qome da 'ape'etega ca 'anauochaxaua,
qataq 'antela'alo qome naua 'ara'aqtaqa da 'ana'aqtaxaatague' aca 'arhua.
6Cha'aye cam ñalec, qaica qome ca 'enec naqa'en ca lta'a,
qaq aca ñale dataỹa'aguet qome aca late'e,
qataq aca nate dataỹa'aguet qome aca lachoro,
nache na npa'aguenaxauapi ca shiỹaxaua nachena nam netaña ca lma'.
7Aỹem, qalaxaye seuata'aguet qome Ñim Nataxala',
qataq sacheto'ot da ñaquitaxac Ñim Lo'onatac 'Enauacna maye ica'alaxaqui,
cha'aye Ñimaye aỹem hua'axaỹa qome.
Ñim Nataxala' nca'alaxatec so Israel le'ecpi
8Qaq 'am ñepa'aguenaxaua, saishet qome da aỹem 'antootalec,
cha'aye na'aictaxa da souañe co'ollaxa qalaxaye qaltaq ñachaañi qome,
qataq na'aictaxa da sootaigui ca napalaxa,
qalaxaye Ñim Nataxala' nacheñi ñim aỹem icoỹattalec.
9Qaq aỹem ña'añaxateguet qome da layeloxo Ñim Nataxala',
cha'aye aỹem huo'o da ỹasouaxashet hueto'ot ñimaye,
qaq ñimaye aỹem nmit qome nache ivitta'a da aỹem ỹo'otec ca ỹaỹamaqchiguiñi lataxac.
Qaq ñimaye aỹem ỹauegueuga qome ca ỹo'oqchiguiñe,
qataq aỹem ỹachaxana da nalochiguiñi lo'onataxanaxac.
10Qaq na aỹem ipa'agueetac qom ila'a damaye,
nache ỹataqta lta'araic da la'agaxa nam aỹem detaqtega co'ollaxa, 'eeta':
¿Hua'ague ca neta'ague cam Nataxala' maye 'Anatamnaxala'?
Qaq aỹem sa'amaqchiguiñi qom sauaachigui da huetaiya',
qaỹapetapigui 'eeta'am ca nshaxa maye huetangui ca nqa'aic.
Qañe'eguelaxatsheguem ye Jerusalén
11Qaq 'am Jerusalén, mashe anacta ca na'a'q da qaltaq qano'oxoosheguem nam 'arpaqtaxanaxat,
qataq da qanquigaxatrec naua loga'te na 'ana'alhua.
12Nache que'eca na'a'q chegoqteegalo qome na 'am nategapi,
chegoqchiguiña qome ye Asiria nache ivitta'a ye Egipto,
qataq chegoqchiguiña ye tala Nilo nache ivitta'a ye tala Éufrates,
qataq aso auaxai nache ivitta'a aca lỹa auaxai,
qataq chegoqchiguiña añi qasoxonaxa nache ivitta'a aca lỹa qasoxonaxa.
13Qaq na 'alhuapi taỹa'a da toolec qome,
souaxat nam qauem maye ỹo'ottac nam netalecpi namaye.
Da lchoxonnataxanaxa Ñim Nataxala'
14'Am Nataxala', ña 'alo'ogue qome ne'ena 'aralamaxat nhuo' le'ecpi,
anam 'aralamaqte qaguetapi maye ndauec da huetaigui na aviaq,
maye coleesop na no'on 'alhua,
qaq ña 'auauega qome 'anamayepi ye 'auaqpisat ye Basán qataq ye Galaad, 'eeta'am soua hua'au' vi'iye.
15Nache 'auachaxana qome da 'ayo'oxoyec,
'eeta'ama soua na'axa'te co'ollaq 'anqateeguesop ye Egipto.
16Qaq ỹauaachigui 'anqa'en qome nam ỹotta'a't shiỹaxauapi,
na'aictaxa da ỹataqta 'añaxaicpi namayepi,
qalaq ỹapogui qome na 'alap qataq naua ltela lauaco souaxat da la'agaxa.
17Nache namayepi 'eeta'am qome na 'araxanaq da hualecta'aguet na 'alhua,
qataq iviloxol da ca'ai na nqañoxotaqa'pi,
qaq souaxat da lli'iỹaxa nache 'am ỹe'eguenot qome 'Am Nataxala' maye Qanatamnaxala'.
18Qaq ¿negue't ca Atamnaxala' da 'eeta'am 'am,
da 'auapalaxat na lasouaxashetpi qataq sa 'aulogui da saỹalaq nam saq 'amaqtaq
maye no'onañi co'ollaxa 'aralamaxat nhuo' le'ecpi?
Qataq saishet da nache 'eetai' da 'arayeloxo,
cha'aye nache 'eetai' da lta'araic 'arauotaxanaqtaic da shenaqta.
19Qaq ña 'avi'eguelaxa qome da qomi' 'auchoxore'n,
nache 'aulayiñi qome na qaye'etaxaloxosat,
nache 'auasaxaña cam ỹataqta pa'aguiñi aso auaxai nam qarasouashetpi.
20'Am Nataxala', nache 'eetai' qome da 'aupacchigui da 'ara'aqtac qataq da 'arauotaxanaqtaic,
maye soua hua'au' vi'iye 'auachaxanapeguema co'ollaxa soua hua'au' qarta'al Abraham, qataq so Jacob.
Currently Selected:
Miqueas 7: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.