Mateo 28
28
Da 'eetec co'ollaq nca'alec So Jesús
(Marcos 16.1-8; Lucas 24.1-12; Juan 20.1-10)
1Qaq co'ollaq mashe inoxonec so na'a'q mataxaqui, nache mashe yo'oxolec ana 'alhua so la'auaxanec na'a'q, nache aso María maye lma' ye Magdala, qataq aso lỹa María, soomaye nqo'oneugalo aso nhuachiqui So Jesús.
2Nache nque'elaxatta da huo'o so lacholaxanaxa ana 'alhua, cha'aye so lamaxashec Ñim Lo'onatac 'Enauacna, somaye chegoqtot na piguem da naỹaña aso huachiqui. Nache nqat so coma' lta'araic maye lapoxot asomaye, nache nso'oolec. 3Qaq se'eso namaxashec piguem le'ec ỹataqta 'eroigui, 'eeta'am na nqashelgaxa, qataq soua alogo ỹataqta ỹapaga'q, 'eeta'ama ana aloñi da lapagaqa'. 4Qaq so huataxanaqpi co'ollaq ila'a somaye, nache ỹataqta iviloxolaqchet da lcolanaxa. Nache somayepi huetaiya' 'eeta'am na leuaxaicpi. 5Nache so namaxashec 'enapegalo soua 'alol, 'eeta': «Saishet qome da qayi'i. Aỹem saỹaten da qami' qanmichiitaique So Jesús som qaỹalauat qataq qaiuaxaneuo co'ollaxa. 6Qaq Somaye saishet da hueta'a ne'ena. Cha'aye mashe qaltaq nca'alec, ipacchigui co'ollaxa da 'enapec. Qalaxaye qauanaqui ña qaumiiñi nam qaỹachaña co'ollaxa so lo'ocỹaxac. 7Qaq nagui sa qanaỹaloxoñi qome da qoqui, nache qaua'aqtaxañima caua lapaxaguenataqa, da Somaye mashe nca'alec qataq hua'auta'ague da Galilea. Qaq huaña qome yemaye, nache qanauañi'. Qaq 'era da na'aqtac maye qami' sa'axatema.»
8Nache soua 'alol ỹataqta ñi'i' qalaxaye nataqa'en ỹataqta lta'araic da ntonaxa'c, nache je'c ỹataqta nqalgoqte' da iroua'alo da la'axaỹaxa'c soua napaxaguenataqa. 9Huaña, nache So Jesús nachaxanalo soomaye, nache iquiita'ape. Nache soua 'alol nquigueua'alo So Jesús, nache ỹa'aroto naua l-llectel, qataq qapaloiguilo naua lchel, nache ỹo'oxoreetrac. 10Nache So Jesús 'enapegalo soomaye, 'eeta': «Saishet qome da qayi'i. Nachaqrata da qanqalgoqoi da yaqto' qaua'aqtaxañim qome caua ỹapaxaguenataqa da taregue da Galilea. Huaña qome yemaye, nache ñauaneto.»
Da la'aqtaxanaxa'c maye saq 'en soua huataxanaq lashe'
11Nache soua 'alol co'ollaq je'c da nqoneua'alo soua napaxaguenataqa, nache huo'oi soua huataxanaq lashe' maye nauaataleguete aso huachiqui tareua'a ye nỹecpi. Nache huaña da da'aqtaxanem som lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna 'enauac de'era qanayeuaigui. 12Nache soua lataxala'ate na ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq so lataxala'pi na shiỹaxauapi ye qanayeuta'a 'alhua, somayepi detaxaỹapega't qataq qanasachigui da late'erai qanqa'en aca lasheue da qaisheete'n soua huataxanaq lashe' da yaqto' saishet da ỹa'axa't dam ỹataqta 'eesa maye qanayeuaigui. 13Nache qoỹeetegalo soua huataxanaq lashe', qoỹeeta':
«Qaua'aqtaxañim qome na shiỹaxauapi, da soua lapaxaguenataqa So Jesús nareua'a so pe aso huachiqui co'ollaq qami' qauo'ocheeta, nache decachiỹa so lo'ocỹaxac So Jesús. 14Qaq ñi nta'a da huo'otaq iviro'ot da ỹaỹaten de'era, nache qomi' setaxaỹaqapegue' ñimaye da yaqto' qami' saishet da huo'o ca qarasouaxashechi.»
15Nache soua huataxanaq lashe' ỹasateguet da ỹaconegueta aso nsheetenaqte anom, nache je'c da da'aqtaxanem na shiỹaxauapi ipagaqchiichiguilo dam la'aqta'c soua lataxala'ate na ntaxaỹaxanaxanecpi da qaitaxaỹapegue' Ñim Lo'onatac 'Enauacna. Qaq de'era natenataxanaxac nachera da queta da qaỹa'aqtaxaata'am na judiopi, choche ivita'a co'ollaq qoỹiyiñi de'era qanayeuaigui se'eso na'a'q.
So Jesús ỹama'q soua lapaxaguenataqa
(Marcos 16.14-18; Lucas 24.36-49; Juan 20.19-23)
16Nache soua once lapaxaguenataqa So Jesús je'c da taregue da Galilea da nqo'oora aso qaỹoqotcheguemec 'alhua maye ỹachaxanapec co'ollaxa da huaña da qanauane' Somaye. 17Qaq co'ollaq mashe qanauane' So Jesús, nache qaỹa'aroto naua nllecte, na'aictaxa da huo'o na ñaq iqoleguettac da ỹoqta 'eesa da nacheso So Jesús.
18Nache So Jesús nquiga somayepi nache 'enapega, 'eeta':
«Ñim Lo'onatac 'Enauacna Aỹem ỹami' da na'añaxac da yaqto' selo'ogue 'enauacna. 19Qaq ỹoqo'oye nagui qami' qanqo'oñiỹa qome na ỹotta'a't shiỹaxauapi 'enauac ana 'alhua da qanquigaxachiiuec na ỹapaxaguenatacpi. Qauachelaxanataxañiỹa qome da le'enaxat ñi Qarta'a, qataq na Llalec, qataq So Saqcha'a Na'añaxac Qui'itta. 20Qataq qauapaxaguiñic qome namayepi da ỹalaxalec 'enauac na ỹapaxaguenataxanaxacpi. Qaq Aỹem nache 'eetai' da qami' soota'agueta, choche ivitta'a ca loga't ana 'alhua.»
Currently Selected:
Mateo 28: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.