Jonás 4
4
Da lalemataic so Jonás
1Qaq so Jonás ỹataqta dalemata co'ollaxa, cha'aye sa ỹaỹamaxaren de'era ỹo'ot Ñim Nataxala'. 2Ỹoqo'oye natamnot Ñim Nataxala', 'eeta': «¡Aicoue, 'Am Nataxala'! 'Era da sheetega co'ollaq soota'a ye ña'alhua, ỹoqo'oye huac da satauec da saỹa ye Tarsis, cha'aye saỹaten da 'Am maye 'Aro'onatac 'Enauacna, qaỹoqchiguinguit da 'aralemataic, cha'aye 'am soxoraic, choxonnataxanaxaic, huotaxanaqtaqaic, qataq ishet da 'anaralaxat ca 'arhuennataxac da sa 'aupaguelec cam qauem maye 'autaxaỹa da 'auo'ot. 3Qaq ỹoqo'oye nagui 'am seỹaxanot 'Am Nataxala', da nache tachiguiña 'anqa'en da ñachaalataxac, 'onaxaico' da seleu, cha'aye saq 'ena'am da ñeca'altauec.» 4Nache Ñim Nataxala' 'enapego' somaye, 'eeta': «¿Peta'a ỹaỹamaqchiguiñi 'anqa'en da 'aualemata?» 5Huaña nache jec so Jonás, ca'ai se'eso huaqta'a't nỹecpi, nache taỹa ye pa'aigue da nala' lliguisheguem, yem huaña da ỹo'ot so lpaqalaxaqui nache taỹot so lpaqal somaye, da yaqto' ỹauaachigui ca 'eetec ca lataxac se'eso huaqta'a't nỹecpi. 6Qaq Ñim Nataxala' maye Lo'onatac 'Enauacna, nañaxat naqa'en so nshe'ela, da yaqto' ipelteetalec naqa'en na lqaic somaye, nache so Jonás ỹataqta machiguiñi souaxat se'eso nshe'ela. 7Qalaxaye so nte'etom so lỹa na'a'q, nache Ñim Lo'onatac 'Enauacna, ỹamaq so qoche'l da chec se'eso nshe'ela, nache deqaqa naqa'en. 8Qaq co'ollaq nnoxoosheguem aso nala', nache Ñim Lo'onatac 'Enauacna, namaq so la'at ỹataqta dapaqa chegaqa'ague da nala' lliguisheguem, nache ỹavigaxat na lqaic so Jonás, nache somaye nomteguet da lquisheuguetaxa, nache nhuooteguela't da ileu, nache, 'eeta': «'onaxaico' da seleu, cha'aye saq 'ena'am da ñeca'altauec.» 9Qalaxaye Ñim Lo'onatac 'Enauacna, 'enapego' so Jonás, 'eeta': «¿Peta'a ỹaỹamaqchiguiñi 'anqa'en da 'aualemata souaxat da deqaqa so nshe'ela?»
Nache so Jonás, 'enapeco': «Aja', ỹataqta salemata, souaxat da deqaqa so nshe'ela.» 10Nache Ñim Nataxala' 'enapego' so Jonás, 'eeta': «'Am ỹataqta huo'o' da 'arauoche so nshe'ela, qamaq saishet da 'aỹa'aañi qataq saishet da 'auo'ot da lañaxataxac, somaye ñaxat so 'oonolec pe, qaq so lỹa pe nache deqaqa. 11Qaq ta'ainectoxo' da saq ỹactec ñaqa'en da ichoxonnataxanaxa yem 'amaqtaqaic huaqta'a't nỹecpi ye Nínive, maye hueta'a ye shiỹaxauapi maye napactelec ca ciento veinte mil ye lcata, maye saỹaỹaten ca 'eetec da yaqto' nca'alec, qataq qalota ye hueta'a shiguiỹacpi.»
Currently Selected:
Jonás 4: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.