Juan 6
6
So Jesús iquia'axan so napacalec ca cinco mil shiỹaxauapi
(Mateo 14.13-21; Marcos 6.30-44; Lucas 9.10-17)
1Qaq co'ollaq ime de'era, nache So Jesús taitague da le'ego aso Lapel Late'erai ye Galilea qataq da lỹa le'enaxat Lapel Late'erai ye Tiberias. 2Qaq ỹataqta qalota na shiỹaxauapi ca'attague' Somaye, souaxat da ỹauaachigui na ỹo'ottac na'anecpi maye sa qaỹauanapega, qataq natareetac na sa no'onpi. 3Nache So Jesús tasheguemec aso qaỹoqotcheguemec 'alhua. Nache huaña da nso'ooñi qataq soua lapaxaguenataqa. 4Qaq mashe saqaỹapeque soua na'axa'te maye laponaxaqui' na judiopi da iuennate so na'a'q le'enaxat da Lapascua. 5Nache co'ollaq namatasheguem So Jesús, nache ila'aguet so qalota shiỹaxauapi, da nca'attaueegue Somaye. Nache inat so Felipe, 'eeta':
–¿Chaq hua'ago' ca sachegoxotaqa'ague da sesheenaxanaxa ca aloq ne'ena qalota shiỹaxauapi?
6Qalaxaye So Jesús mashe ỹaỹaten dam huotaique ỹo'ot, qalaxaye inat somaye, cha'aye huotaique da ỹaỹaten ca la'aqtac so lapaxaguenatac. 7Nache so Felipe 'enapeco':
–Na'aictaxa da ivi' doscientos na'axa'te da do'onataxaatac ca shiỹaxaua, qalaxaye ñaqaiyeta saishet da nalolec da desheenaxana ca sa 'amaqtaq aloq ca ỹataqta qalota shiỹaxauapi, 'eeta'am ne'ena.
8Nache so Andrés, som 'oonolec soua lapaxaguenataqa So Jesús, maye lqaỹa so Simón Pedro, somaye 'enapego' So Jesús, 'eeta':
9–Huo'o da nogotolec hueta'a ne'ena. Damaye huo'oi daua ỹacheta'ape cincole nauolel chegaqaigui na cebada,#6.9 Cebada: Ana nauole cebada, lalamaqte na choxoraqpi, cha'aye ỹataqta saqaỹaua'a, saq 'ena'am ana nauole maye chegaqaigui na trigo. qataq daua dos nỹaxaye. Qalaxaye, daamaye ỹataqta qaica ca la'amaqche'c, saishet da nalouec da qoỹanoigui ne'ena shiỹaxauapi.
10Nache So Jesús 'enapegalo soua lapaxaguenataqa, 'eeta':
–Qoñiỹapega 'enauac na shiỹaxauapi da nso'ooñi.
Qaq ỹataqta qalota na 'auaqpi se'eso qanayeeta'a. Nache nso'ooñi 'enauac somayepi, qaq somayepi ivi' ca cinco mil ỹalleppi. 11Nache So Jesús ỹaconalo soua nauolel, ime, nache ỹanot da na'achecỹaxac Ñim Lo'onatac 'Enauacna. Qaq co'ollaq imat da ỹanot da na'achecỹaxac Ñimaye, nache ỹanoiguilo soua lapaxaguenataqa. Qaq soomaye, nache ỹanoiguilo 'enauac som nso'ootañipi. Nataqa'en ỹe'enaxatchigui naqa'en soua nỹaxaye da ỹanoigui 'enauac somayepi, choche ivitta'a da comaraxaicpi. 12Qaq co'ollaq mashe comaraxaicpi somayepi, nache So Jesús 'enapegalo soua lapaxaguenataqa, 'eeta':
–Qalapoñiỹa't 'enauac na ñi'iỹoxotpi, yaqto' saishet da huo'o ca ne'en.
13Nache soomaye lapona't so ñi'iỹoxot, nache ivi' soua doce no'oxonal soua nlaxatchiguilo so ñi'iỹoxot soua cincole nauolel maye chegaqaigui na cebada. 14Nache som shiỹaxauapi maye ỹauaachigui de'era na'anec maye sa qaỹauanapega maye ỹo'ot So Jesús, somayepi 'enapeco':
–Ỹoqta 'eesa damaye, da la'aqtaxanaxanec Ñim Lo'onatac 'Enauacna maye qaỹa'axatta'aguet co'ollaxa da naỹa ana 'alhua.
15Qalaxaye So Jesús co'ollaq noma da qaỹauotaique da qaỹaconeua'a da qoỹanagui da nta'a, nache Somaye qaltaq ca'ai somayepi da tasheguemec aso qaỹoqotcheguemec 'alhua, da yaqto' nda'a't ca hueta'a.
So Jesús quetalec so 'etaxat
(Mateo 14.22-27; Marcos 6.45-52)
16-17Qaq co'ollaq mashe napalchiguiñi, nache soua lapaxaguenataqa So Jesús, huenooyingui aso nllocta, nache ỹa'axasoxoorelec aso lapel da nqo'ootra ye nỹecpi ye Cafarnaúm. Qaq mashe ỹataqta napalñi co'ollaxa, qalaq So Jesús ñaq saxanaxa da nviraxasom. 18Nache anac so la'at lta'araic, nache ỹataqta ỹo'ot ana lapaxa so 'etaxat. 19Qaq co'ollaq mashe qaỹoqteueeguelo soomaye, nache ỹauaategueta So Jesús da naỹa'a aso nllocta petalec na 'etaxat, nache soomaye ỹataqta huo'o da lcolanaqa'. 20Qalaxaye So Jesús 'enapegalo soomaye, 'eeta':
–¡Nachaỹem, saishet da qayi'i!
21Nache soomaye ỹataqta huo'o da lyaqa' da huenotsheguemec Somaye aso nllocta. Huaña, nache saqaỹaloq da ivittra so loigue yem taỹa'ata 'alhua.
Na shiỹaxauapi nmittaique So Jesús
22Qaq so lỹa na'a'q, nache na shiỹaxauapi maye no'ona'atague da le'ego aso lapel, namayepi nomta'a da soua lapaxaguenataqa So Jesús ndotre'c co'ollaq huenooyingui aso 'oonole nllocta, qaq So Jesús saishet da nnaictagueto soomaye. 23Qaq huo'oi soua lỹa't nllocta, chegoqra'a ye Tiberias, nvira yem saqaỹapeque yem huaña co'ollaq qanallecta'ape soua nauole, co'ollaq ime da ỹan da na'achec so Nataxala'. 24Nache se'eso shiỹaxauapi, co'ollaq ila'a da saishet da hueta'a yi'iye So Jesús qataq soua lapaxaguenataqa, nache somayepi huenooñiguilo se'esoua nllocta da qanqo'oota ye Cafarnaúm, da qanmitaique Somaye.
So Jesús nacheso so 'eeta'am aca nauole maye chegaqaigui da nca'alaxa
25Nache somayepi co'ollaq ivittague da le'ego aso lapel, nache ilalec So Jesús. Nache inattac, 'eeta':
–'Am Napaxaguenataxanaq, ¿chaq lagui co'ollaxa da 'anvitta ne'ena?
26Qalaxaye So Jesús 'enapega somayepi, 'eeta':
–Ỹataqta 'eesa de'era qami' sa'axatema, da qami' Aỹem qanmichiitaique, cha'aye qami' qauqui'i, ivira'a da qami' comaraxaiqa, qaq saishet da souaxat da qami' qauaỹaañi ca naigui na na'anecpi maye sa qaỹauanapega. 27Saishet da qauo'onataxañiitapeguelec cam nallec maye taỹa'a da imeuo, nachaqcata cam nallec maye saishet da imeuo qataq chegaqaigui da nca'alaxa maye chochaq tatec. Qaq 'eca cam nallec maye qami' ỹanema na Shiỹaxaua Llalec. Cha'aye Ñim Ita'a maye Lo'onatac 'Enauacna, ỹachaxan da Aỹem huo'o da shenec.
28Nache qainattac Somaye, qoỹeeta':
–¿Hua'ago' ca shenaqtec da yaqto' qomi', ishet da so'otaq cam 'eetapeguec Ñim Lo'onatac 'Enauacna?
29Nache So Jesús 'enapeco':
–'Oonolec da 'eetapeguec Ñim Lo'onatac 'Enauacna, nshetaique da qami' qaua'amaqchiñi nam namaq Ñimaye.
30Nache qainat Somaye, qoỹeeta':
–Qaq ¿negue'to' ca na'anec da ishet da qomi' 'auachaxanalo da yaqto' seloxogui, nache ishet da 'am sa'amaqtenaq? ¡Ñaq 'auo'ot cam qomi' 'auachaxanalo! 31Som hua'au qarta'alpi co'ollaxa chectac aso maná co'ollaq hualec so toolec 'alhua, cha'aye nache 'ena'ape naua nanettralec ana nere maye huetalec na la'aqtacpi Ñim Lo'onatac 'Enauacna maye 'eeta': «Ñim Lo'onatac 'Enauacna iquia'axanec somayepi aso nauole maye chegoqo'ot na piguem.»
32Nache So Jesús 'enapeco':
–Aja', ỹataqta 'eesa de'era qami' sa'axatema, da saishet da nacheso so Moisés som qami' ỹanema aso nauole maye chegoqo'ot na piguem, nachaqñita Ñim Ita'a maye nacheñi ñi qami' ỹanema acam ỹataqta 'eesa nauole, maye chegoqo'ot na piguem. 33Cha'aye aca nauole maye ỹan Ñim Lo'onatac 'Enauacna, nachaca acam chegoqo'ot na piguem qataq anac da ỹami' da lca'alaxa 'enauac na shiỹaxauapi.
34Nache somayepi 'enapeco':
–'Am Nataxala', no'onctaxa da nache 'eetai' da qomi' 'aỹa'anema aca'aca nauole.
35Nache So Jesús 'enapeco':
–Aỹem Nachaỹem#6.35 Nachaỹem: Qaimeten ye 8.24. nauole maye san da nca'alaxa. Ca Aỹem naua'a, nache sa nauane' na lqouaxa; qataq ca Aỹem ỹa'amaqten, nache sa nauane' na laquip. 36Qalaxaye Aỹem mashe ime da qami' sheetegalo, da qami' saishet da Aỹem qaua'amaqchiñi, na'aictaxa da qauloitagui na so'otpi. 37'Enauac nam lca'aguishecpi Ñim Ita'a da yaqto' sauo'o ỹapaxaguenatacpi, namayepi Aỹem naua'a; qaq Aỹem saishet da semaqa'aguet. 38Cha'aye Aỹem saishet da sachegoqtot na piguem da ñanac da so'ot ca maiche sheetapeguec, chaqrata da ñanac da so'ot ca 'eetapeguec Ñim Lo'onatac 'Enauacna, cha'aye nacheñi Ñim Aỹem namaq. 39Qaq dam 'eetapeguec Ñi Ita'a maye Aỹem namaq nshetaique da Aỹem qaica ca seqataqchet nam Aỹem ỹanem Ñimaye, chaqrata da qaltaq ñeca'alaxatec qom iviteuga ca pa'atec na'a'q. 40Qataq Ñimaye, nshetaique da 'enauac nam ỹamato'ot na Llalec qataq ỹa'amaqten, nache huo'o da lca'alaxa chochaq tatec, qataq Aỹem ñeca'alaxatec qom iviteuga ca pa'atec na'a'q.
41Huaña, nache huo'o na judiopi le'ecpi da quetapeguelec So Jesús, souaxat co'ollaxa da 'eeta': «Aỹem Nachaỹem nauole, maye sachegoqo'ot na piguem.» 42Nache somayepi 'eeta':
–¿Damaye saisheto' peta'a da nachera da Jesús, dam llalec so José? Qomi' sauattonaq so lta'a qataq aso late'e. Qalaq ¿ta'ainco' da 'eetega chegoqo'ot na piguem?
43Nache So Jesús 'enapegalo soomaye, 'eeta':
–Saishet da Aỹem qoquiitapeguelec. 44Qaica ca ishet da choche Aỹem naua'a da huo'otaq sa nauegueuo Ñim Ita'a maye Aỹem namaq; nache camaye ishet da qaltaq ñeca'alaxatec ca pa'atec na'a'q. 45Naua nanettrañi la'aqtaqa som la'aqtaxanaxanecpi Ñim Lo'onatac 'Enauacna naamaye, 'eeta': «Ñim Lo'onatac 'Enauacna ỹapaxaguen 'enauac na shiỹaxauapi.» Qaq ỹoqo'oye 'enauac nam na'axaỹaxana Ñim Ita'a qataq napaxaguena Ñimaye, namayepi Aỹem naua'a da yaqto' Aỹem ca'ategue.
46Saishet da huo'o ca ilogui da lasheguiỹaxac Ñim Ita'a; Nachaqaỹemta maye sachegoqtot Ñimaye. 47Qaq ỹataqta 'eesa de'era qami' sa'axatema, da cam Aỹem ỹa'amaqten, nache 'eesa da huo'o da lca'alaxa maye chochaq tatec. 48Aỹem, Nachaỹem nauole maye san da nca'alaxa. 49So hua'au qarta'ailpi co'olloxoche quetalec so toolec 'alhua, nache somayepi chectac aso nauole chegaqasheguem le'enaxat maná, qalaxaye nache 'ena'am ileu somayepi. 50Qalaxaye Aỹem sa'axattac aso nauole maye chegoqo'ot na piguem, da ca chec asomaye, nache saishet da ileu. 51Aỹem maye Nachaỹem nauole maye ñeca'altauec, qataq sachegoqo'ot na piguem. Ca chec ana'ana nauole, nache qaica ca loga't da nachaalataxac. Ana nauole maye san, nachera da ỹo'ocỹaxac. Qaq damaye san yaqto' nca'alec 'enauac na shiỹaxauapi.
52Nache nam judiopi maye sa iyacnapec da detaqtega So Jesús, maiche taỹa't da ncotatega't, 'eeta':
–¿Hua'ago' ca 'eetec dam da', da qomi' ỹanema da maiche lo'ocỹaxac da sacheguenaq?
53Nache So Jesús, 'eeta':
–Aja', ỹataqta 'eesa de'era qami' sa'axatema, da huo'otaq saishet da qolliqui da lo'ocỹaxac na Shiỹaxaua Llalec, qataq da saishet da qanỹomiiguilo naua ltago'q, nache saishet da huo'o ca qarca'alaqai chochaq tatec. 54Qaq ca chec da ỹo'ocỹaxac qataq nỹomguilo naua itago'q, nache huo'o da lca'alaxa maye chochaq tatec. Nache camaye qaltaq ñeca'alaxatec ca pa'atec na'a'q. 55Cha'aye da ỹo'ocỹaxac, nachera da ỹoqta 'eesa nallec, qataq naua itago'q, nachenaua na ỹoqta 'eesa naquip. 56Ca chec da ỹo'ocỹaxac qataq ca nỹomguilo naua itago'q, nache camaye nache 'eetai' da Aỹem na'attaua'a, qaq nache 'ena'am Aỹem soota'aguet camaye. 57Ñim Ita'a maye Aỹem namaq, Ñimaye huo'o da la'añaxac da ỹan da nca'alaxa chochaq tatec, qaq Ñimaye nacheñi ñi chegoqo'ot da ica'alaxa. Qaq ỹoqo'oye 'enauac nam Aỹem ỹa'amaqten qataq chec da ỹo'ocỹaxac, huo'o qome da lca'alaxa chochaq tatec. 58Qaq Aỹem sa'axattac aso nauole maye chegoqo'ot na piguem. Qaq asa'aso nauole, asomaye saishet da 'eeta'am aso maná, maye chectac co'ollaxa som hua'au qarta'ailpi, qalaxaye nache 'ena'am 'enauac somayepi ileu. Qaq cam chec asa'aso nauole maye sa'axattac, nache camaye nache 'eetai' da nca'altauec.
59Qaq de'era dapaxaguenataxaatapeguec So Jesús, damaye huaigui aso napaxaguenaxaqui na judiopi maye naña ye Cafarnaúm.
Da na'aqtac maye chegaqaigui da nca'alaxa maye chochaq tatec
60Qaq co'ollaq qaỹa'aqchigui de'era lapaxaguenataxanaxac Somaye, nache ỹataqta qalota nam quetague' So Jesús na, 'eeta':
–De'era qonetega, damaye ỹataqta huo'o da lqalaic da qaỹaconeguet; ¿negue'tom ca ishet da 'am naỹamaxareete'?
61Nache So Jesús 'enapeco':
–¿Peta'a sa qauaỹamaxayiñi de'era? 62Qaq ¿hua'ago' ca qoñiitec qone' da huo'otaq qami' qauloỹa'a na Shiỹaxaua Llalec da ỹe'eguelaxasheguema yem hueta'a co'ollaxa? 63Som Saqcha'a La'añaxac Ñim Lo'onatac 'Enauacna, nacheso so chegoqo'ot da nca'alaxa maye chochaq tatec; qaica ca chochaq shiỹaxaua da ỹan de'era achaalataxac. Qaq dam shenapec, damaye chegoqo'ot som Saqcha'a Na'añaxac maye ỹan de'era achaalataxac. 64Qalaxaye ñaqaiyeta huo'o na saishet da da'amqaanataxan da qoñiita.
Qaq 'enapec de'era So Jesús, cha'aye nale'ena da ỹaỹaten co'ollaq cheta'ague da do'onataxan nam saishet da da'amqaanataxan qataq som huotaique co'ollaxa da ỹaneuo Somaye. 65Nataqa'en 'enapeco':
–Qaica ca ishet da Aỹem ca'attague' da huo'otaq Ñim Lo'onatac 'Enauacna maye Ita'a saishet da la'aqtac.
66Huaña, nache ỹataqta qalota nam quetague' So Jesús da ỹaxaañi da quegue Somaye. 67Nache So Jesús inatta'ape soua doce lapaxaguenataqa, 'eeta':
–¿Qami' peta'a nataqa'en qansheetaique da qoqui?
68Qalaxaye so Simón Pedro 'enapeco':
–¿Negue'tom ca lỹa seca'ataxague, 'am Qarataxala'? Ye nache'amta maye naua 'ara'aqtaqa naamaye ỹa'n da achaalataxac maye chochaq tatec. 69Qomi' mashe sogote da 'am sa'amaqtenaq, qataq saỹaanaqta da nache 'am Lca'aguishec qataq 'am Llalec Ñim Lo'onatac 'Enauacna maye nache 'eetai' da nca'altauec.
70Nache So Jesús 'enapeco':
–¿Saisheto' da qami' doce da qami' ica'agui'she? Ñi 'oonolec da qoñiita netaigui ñi pa'aguenataxanaxaic.
71Qaq nacheso som Judas maye llalec so Simón Iscariote som detaqtega So Jesús. Cha'aye so Judas, nacheso so 'oonolec soua doce lapaxaguenataqa maye ỹaneuo Somaye.
Currently Selected:
Juan 6: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.