Ester 2
2
Aso Ester qalca'aua'a da nate'e
1Qaq co'ollaq mashe huo'oi soua inoxoorec na'axa'te, co'ollaq so nta'a Asuero mashe imeuec da lalemataic, nache tachigui lauel aso Vasti, qataq dam ỹo'ot asomaye, qataq som qalapaxañi lataxac maye qaỹa'axatec da dataỹa'aguet asomaye. 2Qaq huaña nache som ltauapi da lo'onataxanaxac, 'enapega somaye, 'eeta':
Iuen da qanmitaique, nache qanauegueua'a ñi nta'a cam ña qa'ampiolec, qataq ỹataqta 'onaxaipi. 3Qaq 'am nta'a, iuen da 'auauo'o ca 'aramaxashecpi nam hueta'a 'enauac nam 'alhuapi maye 'aulotague', qaq camayepi nacheca ca nauegueua'a qome ñi nỹec lta'araic maye lalamaxat na 'alpi, ñim naña naqa'en na Susa ñi nta'a, qaq acamayepi qaipataxalec qome da ilo'ogue so Jegay, som ỹataqta lpe'et ñi nta'a, som ilotague' na 'alpi. Qaq so Jegay, nacheso so huapegue' qome da iyaquen acamayepi, 4qaq acam qa'añole maye ñi nta'a ỹactec da nqopita, qaq nachaca qome aca qoỹanagui da nate'e, da talec da lo'onataxanaxac aso Vasti.
Nache so nta'a ỹataqta ỹaỹamaxareeta co'ollaxa de'era nhuennataxac, nache damaxasoxoolec da qaỹo'ot damaye.
5Qaq som huaqta'a't nỹecpi ye Susa, hueta'a so 'oonolec judío maye le'enaxat Mardoqueo, som llalec so Yaír, qataq chegoxoguet so Simea qataq so Cis, maye chegoxoguet so Benjamín. 6Qaq somaye nache ỹalectaigui co'ollaxa som qalota shiỹaxauapi, maye so Nabucodonosor maye nta'a ye Babilonia, icoñi' co'ollaxa nache ỹauec, ỹachegoxotchiguiña ye Jerusalén, lỹatac naqa'en so Jeconías maye nta'a co'ollaxa ye Judá. 7Qaq so Mardoqueo huo'o co'ollaxa aso lasoshe saploxo, qaq somaye ỹacona co'ollaxa asomaye da ỹaqchet da 'eco' llale, co'ollaq ileu' soua lta'al asomaye. Qaq asomaye le'enaxat Jadasá, qaq da lỹa le'enaxat Ester, qaq asomaye ỹataqta 'onaxai qataq nalochiguiñi da lataxac. 8Qaq co'ollaq mashe qaỹa'axatec so lataxac maye lapaxañi so nta'a, nache qalota so qalaỹona't qa'ampiolec da hueta'a qanqa'en so lma' lta'araic so nta'a maye naña so huaqta'a't nỹecpi ye Susa, qaq asomayepi nache qaipataxaguet da ilotague' so Jegay som ilotague' so 'alpi, qaq asomayepi nache ỹalectaigui aso Ester. 9Qaq so Jegay ỹataqta ỹaỹamaxareeta co'ollaxa asa'aso qa'añole, qataq ỹauotec, qaq ỹoqo'oye so Jegay saỹaỹaloxon co'ollaxa da ipicten asomaye, ỹanem so no'on nallec, qataq ipataxagueta da huapegue' asomaye soua siete maye ỹataqta no'oñi asom namaxashepi maye hueta'a so lma' lta'araic so nta'a, qaq nache lỹata'ape naqa'en soomaye, co'ollaq nquigaxata som ỹataqta 'onaxaic nỹec som lma' lta'araic som 'alpi.
10Qaq aso Ester saishet da ỹa'axat so chegoxoguetpi qataq so lauo' le'ecpi, cha'aye so Mardoqueo 'enapega co'ollaxa da saishet da ỹa'axat. 11Qaq so Mardoqueo qalaq ima'ape soua na'axa'te da coleetac naxa, so qasoxoc maye naloteuga so lma' lta'araic so 'alpi, da yaqto' ỹaỹateetac da aso Ester qaica camachaqca, qataq da huo'otaq qaỹaỹamaxatta. 12Qaq 'enauac se'eso qa'ampiolec da ỹataqta qaipicteetac ivittre'c soua doce ca'agoxoiqa. Qaq soua la'auaxanaqa seis ca'agoxoiqa, nache huaiguilo da qaỹa'ameetac da lo'ocỹaxac asomayepi na aceite maye chegaqaigui na mirra, qaq soua lỹa't seis ca'agoxoiqa qalaq nache huaiguilo da qaỹa'ameetac da lo'ocỹaxac asomayepi na coraxat, qataq so la'amnaxat na no'oc, maye lalamaxat da na'amnaxat ana 'alo. Qaq co'ollaq mashe ivilde'c soua ca'agoxoiqa maye huaiguilo da qaipicteetac, nache añi 'oonole asomayepi huo'o ye laloqo' da nachaateua'a qanqa'en so nta'a Asuero, 13qaq añi 'oonole se'eso qa'ampiolec da yaqto' nachaateua'a so nta'a, nache qaỹasheetem da ỹaañi cam lauela da ỹaañi, som 'otaxatpi maye hueta'a so lma' lta'araic so 'alpi. 14Qaq ye pe, nache nqo'oota so lma' lta'araic so nta'a, qaq ye nte'eta ye lỹa na'a'q, nache qaltaq nqo'oota so lỹa nỹec maye naigui so lma' lta'araic so 'alpi, maye ilotague' so Sasgaz, som ỹale maye lpe'et so nta'a, qataq nauaatalec aso ỹaqauga lhuapi so nta'a, qaq naxa da ime de'era, nache saishet da qaltaq ỹe'eguelaxa da nqo'oneua'a so nta'a, nacherata da so nta'a maiche qaltaq iỹaxaneuga.
15Qaq aso Ester, asom llale so Abijaíl, maye ntesoqo' so Mardoqueo, co'ollaq ivita da nachaateua'a so nta'a, nache asomaye nda'a't da ỹache som ỹamaxalec so Jegay, som ỹale maye lpe'et so nta'a, qataq nauaatalec aso 'alpi, qaq aso Ester mashe 'enauac som hueta'a so lma' lta'araic so nta'a, da ỹauotec asomaye. 16Nache aso Ester, qaỹauegueua'a so nma' lta'araic da yaqto' nachaateua'a qanqa'en so nta'a Asuero, huetoigui so ca'agoxoic diez, maye nataqa'en le'enaxat Tebet, co'ollaq mashe ivi' soua siete vi'iye da lo'onataxanaxac somaye. 17Nache so Asuero ỹataqta nqopita co'ollaxa aso Ester, qaq saỹauano' da 'eetec de'era somaye da huo'o aca ỹataqta nqopita asom laỹepi 'alpi, qaq 'era da 'eetec so Asuero da ỹataqta nqopita asomaye, nache somaye ỹataqta itauan asomaye, saq 'ena'am aso laỹepi 'alpi maye mashe hueta'aguet co'ollaxa somaye, qaq ỹoqo'oye ỹanaxanaxangui asomaye aso aro'o, nache ỹanagui da nate'e da nmeneguet aso Vasti. 18Ime nache so nta'a, ỹo'ot so lta'araic nquia'axac, qataq so na'ashaxac da yaqto' ỹo'oxoren aso Ester, nache icoyeguen 'enauac so nta'alpi, qataq ltauapi da lo'onataxanaxac, qataq nquigaxaañi ye lcata aso lsheetenaxanaqte so netalec so 'alhuapi maye ilotague', qataq ỹanec so qalota lachetaqtaxanaxatpi, ipagaqchiichigui da 'eetec da lsoxoyec ca nta'a.
So Mardoqueo ỹaỹaten da qaỹauotaique da qaỹalauat so nta'a
19Qaq soua na'axa'te co'ollaq so qa'ampi, qaỹauega so lỹa nỹec maye naigui so lma' lta'araic som 'alpi, nache so Mardoqueo nso'ootañi hueta'a so lasom so lma' lta'araic so nta'a. 20Qaq ipacchigui dam lqataxac co'ollaxa so Mardoqueo, da aso Ester saishet da ỹa'axat so chegoxoguetpi, qataq som lauo' le'ecpi, nacherata da ipacchigui nam lapaxaguenataxanaxacpi so Mardoqueo maye ỹanem co'ollaxa asomaye, 'eeta'am co'ollaq ñaq neto'ot somaye. 21Qaq so Mardoqueo co'ollaq ñaq nso'ootañi netaña so lasom so lma' lta'araic so nta'a, nache hua'aqchiguilo co'ollaq detaqtega't soua Bigtán qataq so Teres, som lataxala'ate som nauaatalec so nta'a maye hueta'a so ñegueuo so nma' lta'araic. Qaq soomaye ỹataqta dalematai' co'ollaxa, nache detaqtrapigui ca lataxac da yaqto' ỹalauat so nta'a Asuero. 22Qaq so Mardoqueo co'ollaq ỹaỹaten de'era qana'aqtaxaatapigui, nache da'aqtaxanem aso nate'e Ester, qaq asomaye nache da'aqtaxanem so nta'a da la'aqtaxanaxac so Mardoqueo. 23Qaq co'ollaq qanmit de'era, nache co'ollaq qaỹaỹaten da 'eesa, nache se'esoua dos lataxala'ate som nauaatalec so nta'a, qaỹamaxasoxooleguete da qaicoñeldashegue'm. Qaq de'era qanayeuaigui, damaye ỹauaachigui co'ollaxa qanqa'en so nta'a da qoỹerelec aso nere maye nanettalec nam qaỹo'otpi yi'iye 'alhua.
Currently Selected:
Ester 2: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.