Eclesiastés 2
2
1Qaq huaña nache aỹem seuennataxaatac nache, sheeta': «Nagui she'eguen da so'ot nam na'ashaxacpi yaqto' sootaigui da no'on achaalataxac.» ¡Qalaxaye nataqa'en damaye qaica ca naigui! 2Huaña nache saỹaten dam naỹalliguiyec da chochaq 'oopashec, qataq dam na'ashaxac ỹataqta qaica ca naigui.
3Qataq so'ogoxona da ñetoonaxac qataq da ỹaỹaanec da she'eguen da lamaicỹaxac na lataxa, qataq ỹataqta ñañaneguet namaye da yaqto' saỹaten da nachera dam ỹaỹamaqchiguiñi da ỹo'ottac ca ỹale da ñaq huo'o da nachaalataxac da netalec ana 'alhua.
4Qataq so'ot co'ollaxa na lta'araic no'onatacpi, qataq ño'oxoosheguem so lta'araic ima', qataq huo'o so ỹalamaxat ỹanaxanqa' uva lma'pi. 5Qataq so'o't soua ỹalamaqa'ate ỹanaxanqa'ate, nache saaleguete soomaye ana ỹotta'a't qo'oipaqpi maye huo'o ana ala. 6Qataq so'ot aso late'erai laỹe' na 'etaxat da yaqto' secottalec asom qo'oipaqpi maye ñaxattalec somaye, 7qataq sesheenaxana so ilatacpi qataq aso ilatapi, qataq huo'o nataqa'en so ilatacpi lañoqo' ye ima', qataq nataqa'en nquictauec aso ilo huacapi qataq aso qaguetapi, nache ñapacalec som hua'au nta'alpi ye Jerusalén. 8Qataq ỹataqta qalota so ỹapoñiguishec na lcat plata qataq na oro, nsallaxa maye lalamaxat co'ollaxa som laỹepi nta'alpi maye hueta'alo naua lỹa't 'aleu'. Qataq huo'o so ỹo'onaxanaxanecpi, qataq aso ỹo'onaxanaxanapi, qataq ñauane' 'enauac nam ỹo'ot da lamaicỹaxac cam shiỹaxaua, qataq ỹataqta qalota aso ihuapi. 9Aỹem sevira'a da ỹataqta aỹem 'amaqtaqaic, qataq qalota som ỹogoxoshetpi, ñapacalec som hua'au nta'alpi ye Jerusalén, qaq nataqa'en dam naỹaanec saishet da aỹem ca'ai. 10Qaq saỹauano' da saq so'ot nam ñeqopittegapi, qataq qaica ca na'ashaxac ca saq so'ot. Qaq ỹo'ot da lamaicỹaxac da iquiyaqteỹaxac 'enauac nam so'otpi co'ollaxa, qaq de'era ỹamaicỹaxac, nachera dam ñesheetenaguec. 11Qaq ime, nache semeteetac 'enauac nam ỹo'onatacpi, qataq nam huo'o da lqalaic co'ollaq so'ottac, nache sela'a da 'enauac namayepi da qaica ca naigui, 'eeta'am da 'eetec da huotaique da qanllañi na la'at, qataq qaica ca qaỹachegoxotaigui damaye, ana'ana 'alhua.
12Qaq ime, nache qaltaq seuennataxaalec dam naỹaanec, qataq dam 'oopashec qataq da qaica ca qaỹaỹaanapec, qaq ¿negue't cam ishet da ỹo'ot cam dalaxaic nta'a maye aỹem nca'atalec qome? Ye nam huo'o mashe nache 'eetai' da qaỹo'ot co'ollaxa. 13Qaq huaña, nache sela'a da ỹataqta huo'o da qaỹachegoxotaigui da naỹaanec, qaq saq 'ena'am da qaica ca qaỹaỹaanapec, 'eeta'am nam yo'oqchiguiñi da huo'o na qaỹachegoxotaigui, qaq saq 'ena'am na napalaxa.
14Cam ỹaanaxanaxaic ỹataqta nlotauec, qaq ca qaica ca ỹaỹaanapec qalaq quetagui na napalaxa. Qalaxaye nataqa'en saỹaten da 'enauac da 'oonolec ye iuatta'aguet laloqo'.
15Qaq huaña, nache sheeta': «Dam taỹa'aguet cam qaica ca ỹaỹaanapec, nataqa'en aỹem saỹa'aguet, qaq ỹoqo'oye ỹataqta qaica ca naigui dam qalota ỹaỹaanec. ¡Qaq ivira'a damaye da ỹataqta qaica ca naigui! 16Cha'aye qaica ca ishet da qaltaq iuennatega cam ỹaanaxanaxaic, qataq cam qaica ca ỹaỹaanapec, cha'aye da mashe qaỹoqteguelo naua vi'iye, nache 'enauaque da qaicoua'aisalo, cha'aye cam ỹaanaxanaxaic, qataq cam qaica ca ỹaỹaanapec 'eeta'a't da ileu'.»
17Qaq huaña nache sevira'a da saỹemec da ñachaalataxac, cha'aye 'enauac nam qaỹo'otpi ana'ana 'alhua da aỹem dataỹa'aguet. Qaq ỹataqta 'eesa da qaica ca naigui, 'eeta'am da 'eetec da huotaique da qanllañi na la'at.
18Qataq sevira'a nataqa'en da saỹemec 'enauac nam ỹo'onatacpi co'ollaxa ana'ana 'alhua, cha'aye saỹaten da 'enauac namayepi talec cam aỹem nca'atalec qome. 19Qaq huo'o dam ỹataqta 'eesa, da camaye na'aictaxa da ỹaanaxanaxaic huo'otaq da qaica ca laỹaanataxanaxac, qalaxaye camaye ỹauo'o lalamaxat qome, 'enauac nam ỹataqta lta'araic da ỹo'onataxanaxac co'ollaq so'ottac, qataq so'ogoxona da ỹaỹaanec da yaqto' ishet da aỹem hueto'ot namayepi ana'ana 'alhua. ¡Qaq damaye nataqa'en ỹataqta qaica ca naigui! 20Qaq co'ollaq sela'a nam so'otpi ana'ana 'alhua, nache huo'o da ñetogotaxac souaxat da ỹataqta lta'araic da ỹo'onataxanaxac co'ollaxa, 21cha'aye huo'o na do'ogoxona da naỹaanec, qataq da nauattonaxanaxac, qataq nam nauane'pi dam lo'onataxanaxac, da yaqto' talec 'enauac cam sa do'onataxan co'ollaxa. ¡Qaq damaye nataqa'en ỹataqta qaica ca naigui, qataq ỹataqta saỹaỹamaxañi! 22Qaq, ¿negue'tom cam ỹachegoxotaigui cam shiỹaxaua da ỹaguec da lo'onataxanaxac, qataq da ỹaguec da lhuogoxo da netalec ana'ana 'alhua? 23Cha'aye 'enauac dam nachaalataxac da nlaqchigui da nqui'ic, qataq saỹalemaxat da lo'onataxanaxac, ivira'a ye pe da qaica ca nmataqa' da lhuennataxac. ¡Qaq damaye nataqa'en qaica ca naigui!
24Qaq dam ỹaỹamaqchiguiñi maye ishet da ỹo'ot cam ỹale, damaye, 'eeta': deque'etac, qataq nỹomtac, qataq nque'etaxaachigui da alaỹaxac da lo'onataxanaxac, cha'aye selalec da nataqa'en damaye, chegoqo'ot Ñim Lo'onatac 'Enauacna. 25Cha'aye, ¿negue'to' ca ishet da deque'etac, huo'otaq da ntootapigui', da saishet da nacheñi Ñimaye? 26Cha'aye Ñim Lo'onatac 'Enauacna, ỹanem da laỹaanec, qataq da lauattonaxanaxac, qataq da lamaicỹaxac cam taalec da ỹaỹamaxareeta Ñimaye, qalaxaye cam 'etaxaloxoic, qalaq ỹanem da lo'onataxanaxac da lapootac qataq nquictasheguem da lsallaxa, da yaqto' ime, nache ỹanem cam taalec da ỹaỹamaxareeta Ñimaye. ¡Qaq damaye nataqa'en qaica ca naigui, 'eeta'am da 'eetec da huotaique da qanllañi na la'at!
Currently Selected:
Eclesiastés 2: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.