Salmos 8
8
Chiga a'ima in'jan'cho
1¡Na'su ingi Chiga,
poi andeni ti'tsse'tssia tsu que iniseja!
Nane pa'cco sefaccoma ti'tsse joccapitssia qui queja.
2Que anttesi tsu dushunaccu,
nane toya chocho'jendeccu'qque
quema avujatsse afa'fa.
Tsa avujatsse afa'choi'ccu qui quema afasesundeccuma patsu.
Nane sundaro ttuccunga ca'ni'masia've ñoñaqquia'caen
qui quema chigasundeccuma patsu.
3Sefaccoma camba gi atte que agattoen'choma.
Nane cose'suchiga, o'fe'qque que agattoen'cho tsu.
Tsama attepa gi qquen in'jan:
4¿Jongoesu tsu va ande'su a'ija?
¿Jongoesune qui tisema injan'jen?
¿Jongoesu tsu va ande'su tsandieja?
¿Jongoesune qui tisema in'jamba coira'je?
5Nane re'riccone qui quema sefacconi'su
shondosundeccuma utu'ccoa've a'ima tson.
Tsa'ma tsa'caen tsomba qui tisenga otifaenqquia'caen
ñotsse afapa ti'tsse'tssia na'suve tson.
6Toya'caen qui tisema ccutsian
pa'tssi que agattoen'choma mandaye.
Nane tiseja osha'chone na'su tsu.
7Pa'cco oveja, pa'cco sema'su vaura,
pa'cco tsampini jacanqque'su'qque tisema paña'fa.
8Pa'cco sefacconi chhajeqque'su,
pa'cco na'eni canseqque'su'qque tisema paña'fa.
9¡Na'su ingi Chiga, poi andene tsu que iniseja ti'tsse'tssia!
Currently Selected:
Salmos 8: con
Highlight
Share
Compare
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
