Salmos 78
78
Chiga israendeccuma angacan'cho
1Ña aindeccu, ña atesian'jen'choma paña'faja.
Que'i tsosinama fetta'faja
ña su'choma pañañe.
2Condase'choi'ccu gi condasepa atesiaña.
Andema agattointene condambi'choama gi ja'ño condaya.
3Tsa'ma ingi yayandeccu tayo condasesi gi pañamba in'jan'fa.
4Toya'caen anttembe'yi gi Na'su ñotsse tson'jen'choma
ingi dushundeccunga atesian'jen'fa cuintsu
tsendeccu'qque tise'pa dushundeccunga atesian'faye.
Tsa'caen tsonsi poiyi'cco tsu Na'suja
osha'choma oshacho'cho qquen atesupa
tisema ñotsse afa'faya.
5Chigaja tise manda'choma Jacob aindeccunga conda.
Nane israendeccunga tsu conda
ma'caen ñotsse canseya'chove.
Tsa'caen condapa ingi tayopisundeccunga manda cuintsu
tise'pa dushundeccunga tsama atesian'faye.
6Tise'panga atesiaña'cho cuintsu
tise'pa'qque dushundeccunga tsama atesiansi
toya isuyembindeqquia'qque jai'ngaeja tsama paña'faye.
Nane jai'ngaeja tsendeccu'qque
tise'pa dushundeccunga atesiaña'cho.
7Tsa'caen jai'ngae isuye'chondeccu'qque Chigave in'jamba
tise tson'jen'choma aqque'pambe'yi
tsangae tise manda'choma pañamba canse'faya.
8Tsa'caen in'jamba cansepa
tise'pa tayopisundeqquia'can'faya'bi.
Nane tise'pa tayopi'su coenzandeccuja
tsosinai'ccu pañambipa injama'choni'qque
in'jambipa Na'su Chiga in'jan'chove tson'fambi.
9Tayopi israe'su Efraín sundarondeccuja
battittianccui'ccu geraen'jemba dyopa
sepaccopa buttoccoin ja'fa.
10Chiga tise'pai'ccu condasecco'choma catipa
tise manda'choma'qque pañambipa in'jangae canse'fa.
11Na'su tson'choma aqque'papa
tise canjaen'choma'qque aqque'pa'fa.
12Nane tise'pa yayandeccu can'jeinte
Chigaja osha'choma tise'panga canjaen.
Egipto andeni'su Zoáni tsa'caen tsomba
13marma'qque samboemba manda cuintsu
israendeccu tsangae panshañe.
Nane pavefani, tansinfani, mar tsa'ccu ttuqquia'caen
ccutsu'ni panshan'fa.
14A'tanijan unjimba'ccoi'ccu fuitepa
canjaen'jen maningae ja'faya'chove.
Cose'qque si'ngei'ccu sefane chanjiemba canjaen'jen.
15A'i menia'su patuvo'choma'qque doñamba
inján'tssia tsa'ccuma somboen cuintsu
poiyi'cco a'i cu'i'faye.
16¡Nane patu'ye Chigaja na'eme somboensi quian'me ai'je!
17Tsa'caen atte'ma tsu toya egae tsincomba
a'i menia can'jemba Joccapitssia Chigama
pañambipa cati'fa.
18Iyicca'yepa Chigama atesucañe in'jamba
dyombi'tsse tise'pa in'jan'cho anqque'suve iñajan'fa.
19Na'suma afasepa qquen su'fa:
“¿Chigaja oshaya ti anqque'suma
va a'i menia inginga afeye?
20Nane tansintsse Chigaja fattoccoma doñasi
tsa'ccuja na'en'caen sombo.
Tsa'ma ¿oshaya ti panme inginga afeye?
¿Oshaya ti aña'choma tise aindeccunga afeye?”
21Na'su Chigaja tsama pañamba ñoa'me iyicca'ye.
Si'nge anchandenqquia'caen iyicca'yepa
Jacob aindeccuma si'ngei'ccu oque cati.
22Nane israendeccuja Chigave in'jambipa
tise fuiteye in'jan'chove'qque in'jan'fambisi tsu
tsa'caen oque cati.
23Tsa'ma Chiga sefaccoma mandasi sefaccoja fettayepa
24unjin tuiqquia'caen panma shequian moe.
Tsa manáma moe cuintsu tise aindeccu an'faye.
25¡Nane a'i tsu Chigama sefacconi'su shondosundeccu
anqque'suma an'jen'fa!
¡Nane Chigaja tsama afe cuintsu an tteppu'faye!
26Coejechiga sombo'jeni'su fingiama mandapa
Chigaja tise quin'sui'ccu mar'ye fingiañe mandasi ji.
27Nane unjin tuiqquia'caen aña'choja tise aindeccunga amppi.
¡Unjin tuiqquia'caen tsu yayapa chivi'rija
agattoye osha'bi'tsse amppi'fa!
28Aindeccu can'jen'tti enttingenga amppipa
tise'pa carpa tsa'oma itoyetsse amppi'fa.
29Amppisi aindeccuja taipa pan'shantsse an tteppu'fa.
¡Nane Chiga tsu tise'pa iñajan'choma tise'panga afe!
30Tsa'caen tise'pa iñajan'choma toya pasambi'tsse an'jemba
toya tise'pa aya'fani aña'choma tsai'je'ni
31Chiga iyicca'ye'choja tise'panga pporo.
Nane Chigaja iyicca'yepa tise'pa'su ti'tsse quin'andeccuma fitti'tti.
¡Israe'su ti'tsse joccapindeqquia'ma fitti'tti!
32Tsa'ma Chiga tsa'caen tson'ni'qque
tise canjen'choma in'jambipa
toya tsu aindeccuja egae tsincomba canse'fa.
33Tsa'cansi tsu Chigaja tise'pa canse'choma uta'tsse naniamba dyoqque'sui'ccu tise'pa can'jen'choma noñangian.
34Chiga tsa'caen tise'pama fi'tti'jesiyi
tsu tsequi a'ta tise've tta'tta'fa.
Nane anttembe'yi tise've ccase ttatta'je'fa.
35Tsequi a'ta tsu tise'pama ccushaemba
coira'su Sefacconi'su Chigave in'jan'fa.
36Tsa'ma tsa'caen tise'pa aya'fai'ccu
Chigama ñotsse afapa ñoa'me afopoen'fa.
37Tsa'caen ñotsse afa'a'qque
injama'cho tsosipie toya in'jambipa
tisei'ccu injancco'fa'choma'qque toya chi'ga'fa.
38Tsa'ma Chigaja toya tise'pama mendeye'jepa
tise'pa egae tsincon'cho shacama joqquitssian.
Tise iyicca'ye'choma'qque aqque'papa tise'pama fi'ttimbi.
Nane ccase, ccase ñoquisi tise ñoa'me iyicca'ye'choja pasa.
39Aqquia injama'cho shaca'cho aindeccu
tsu qquen in'jamba ñoqui.
Nane fingian fingiamba
shandambitsse jaqquia'can tsu a'ija.
40A'i menia can'jemba tise'pa in'janqquia'caen
tsain'bitsse tsomba Na'su Chigama pañambipa
tisema ñoquimbian'fa.
41Injanga tson'ñaccapa Chiga iyicca'yepa tson'jen'chove atesu'fa.
Tsa'caen tsomba Israel Ñotssia Joccapitssia Chigama ñoquimbian'fa.
42Osha'choma Oshacho'cho Chiga tise'pama
ccushaen'cho a'tama aqque'pa'fa.
43Nane Egipto'su Zoán andeni osha'cho canjaen'choi'ccu
tise'pai'ccu iyiccosundeccuma patsu'choma'qque aqque'pa'fa.
44Tseni na'en'su tsa'ccuma anjampaveyi tsonsi
egiptosundeccuja tsama cui'ye osha'fambi.
45Tenqquen'cho, sapoma'qque moesi osha'choma an sefaen'fa.
46Tise'pa nasipa'suma tise'pa taiya'choma'qque
ttombunga afe cuintsu an'faye.
47Tise'pa tsajaccuma'qque tsandapandaqui'ccu dañomba sefaen.
Higoma'qque tsa'caen da'ño.
48Toya'caen tsandapandaqui tise'pa aiña'cho vaura,
ovejama'qque fitti'ttisi tsanda veyaen'cho'qque
faesuma oquepa fitti'tti.
49Nane Chigaja ñoa'me iyicca'yepa
tsa'caen tise iyicca'ye'choma canjaemba
tise'pama noñangiamba vanae.
Tisema sefacconi'su shondosundeccuma'qque moesi
tsa'caen egiptosundeccuma vanaemba fittitti'fa.
50Anttembe'yi Chigaja tise iyicca'ye'choma canjaen.
Tise'pa paye se'pimbipa
vanamba paqque'suma moe tise'pama fi'ttiye.
51Tsa paqque'sui'ccu poiyi'cco Egipto'su
aisheve isuye'chondeccuma fi'tti.
Nane Egipto aindeccu'su in'jan'cho dusungandeccuma sefaen.
52Tsa'ma tise aindeccuma ovejama angacanqquia'caen
Egipto'ye somboemba a'i menia angacamba coira'je.
53Ñotsse coirapa angacansi dyombe'yi jaja'fa.
Tsa'ma tisema mandiansundeccuja pa'fa,
na'en tise'pama piccosi.
54Chigaja tsa'caen tise aindeccuma angacamba
tise ñotssia ande'su utufanga tise'pama i.
Tise patsupa isu'cho ande'su ccotta'cconga
tise'pama i.
55Ipa israendeccu ca'nisi tseni can'jensundeccuma
joqquitssian mañamba tise'pa andema israendeccunga afe.
Yaya tise dutssiyendeccunga afeqquia'caen
tsa andema attufaemba afe cuintsu
israe'su aindeccu cca'tti, cca'tti
canqquiamba can'jen'faye.
56Tsa'ma ccase injanga tson'jen'fa
Chiga tsoña'chove atesuye.
Joccapitssia Chigama pañambipa
tise'pa in'janqquia'caen tson'fa.
Na'su manda'choma chi'gapa tsa'caen tson'fambi.
57Tise'pa tayopi'su coenzandeccu tsonqquia'caen
Chigama catipa tise've in'jan'fambi.
Battittianccu tansintsse battiañembiqquia'caen
tise'pa tsoña'choma tansintsse tson'fambi.
58Chigama iyicca'yean'fa faesu chiga'candeqquiama iñajaña'ttive ñoñamba.
Ñoña'cho chigandeccuve'qque ñoñamba iñajan'fasi
Na'suja chi'gapa se'pi.
59Aindeccu tsa'caen tsonsi Chigaja attepa
iyicca'yepa pa'cco Israelma cati.
60Catipa Siloni tise a'i'ccu can'jen'tti'ye sombo.
Nane aindeccu Na'suma iñajan'jen'tti'su carpa tsa'o'ye sombo.
61Sombopa antte cuintsu Israelma iyiccayesundeccu
Chiga a'i'ccu fae'ngae injancco'fa'chove
canjaen'cho cafonma itsa'faye.
Nane tise Ñotssiama, tise Quin'suma'qque indipa
tsa cafonma angaya'chove antte.
62Nane tise aindeccuma ñoa'me iyicca'yepa antte
cuintsu tise'pama iyiccayesundeccu
sundaro matichi'ccu tise'pama fitti'tti'faye.
63Si'ngenga tsandie dusungandeccuja pa'fa.
Nane tsandu'je'fasi settapoen'jen'chove zi'yatssi tsu.
64Sundarondeccu matichi'ccu Chigama afasundeccuma fi'ttisi
tsandupajen'chondeccu'qque tise'pane i'nañe osha'fambi.
65Tsa'ma Na'suja anamba qquendyaqquia'caen
tisema iyiccayesundeccuma patsu.
Nane quin'an sundaro ccusipa qquendyapa in'janqquia'caen
66Na'suja tisema iyiccayesundeccuma patsusi ccuyin ja'fa.
¡Tsangae tsu tise'pama ansangian!
67Toya'caen José aindeccuma pasaemba
tise dutssi'ye Efraín'su a'ima na'suve tsombi.
68Tsa'ma Judá'su aindeccuma in'jamba
tise in'jan'cho Zión ccotta'ccoma'qque in'jan.
69Nane andema agattoemba tsangae ñoñaqquia'caen
se'fatssia ccotta'ccoa'ca'en
tisema iñajan'je'ttima'qque tsangae ccutsian.
70Toya'caen tise in'jan'cho shondo'su Davidma in'jamba
ovejama coira'su sema'ba'ye tisema somboen.
71Somboemba mandasi Davidja ti'tsse ovejama angacambipa
Na'su in'jan'cho Jacob aindeccuma coira.
Nane ovejama coiraqquia'caen israendeccuma coira.
72Tsa'caen tsu Davidja ñotssia injama'choi'ccu Chiga aindeccuma coira.
Nane ñotsse in'jamba tise tivei'ccu tise'pama fendepa angacan.
Currently Selected:
Salmos 78: con
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
