Salmos 69
69
Attuse'je'cho
1¡Ña Chiga, ñama ccushaenjan!
¡Andeccoqquia'caen gi paye tson'jen!
2Nane tssipaccunga ca'ni ejeqquia'caen gi oshambi
ña tsu'tte ta'etsse ccutsuya'chove me'i'onsi.
Tsa'ccu tso'sianga jasi tsu
quingofa ñama pisaeñe tson'jen.
3Fuiteya'chove panshaen fundosi
tsifo sambapa iñe.
Ña tso'fe'qque tsu quimbi
panshaen ña Chigave ttatta'jesi.
4Tsain'bio a'i injanga ñama chi'ga'fa.
Nane ña tsove'su tosema agatto'choma ti'tsse'o a'i tsu.
Ñama iyiccayesundeccuja injanga ñama sefaeñe in'jan'fa.
Cca'nambi'choama toequi afeya'cho qquen mandapa quin'sui'ccu itsa'fa.
5Queja, Chiga, ña opa tson'jen'choma atesusi gi
ña egae tsincon'choma que'ye a'tuye oshambi.
6Queja, Na'su, Osha'choma Oshacho'cho Chiga qui.
Faesu queve in'jan'choma ansangianjama ña shacane.
Nane in'jambi gi ña tson'jen'cho
cca'indeccuma zuccoemba qqueñañe.
Que, Israel Na'su, tisuve ttatta'suma coiraja.
7Queve in'jamba gi cca'i ñama chi'gapa afasesi
ansangepa can'jen.
8Ña antian, ña mama dushundeccu'qque
ñama atesumbi qquen canjaen'fa.
9Que ettima ñoa'me in'jamba
gi paya'ngae dyombi'tsse coiraya.
Cca'indeccuja quema chi'gapa ñama tsu afase'fa.
10Ña i'namba ambe'yi can'jensi cca'ija ñama feña'fa.
11Ña ñombi'ye'choma canjaeñe
tsincco'cco'je'cco'a sarupama ondiccusi
cca'indeccu co'fepa afase'fa.
12Ayafanasindeccu faesu faesunga condase'fasi
ccusisundeccu'qque ñane settapoen'jen'fa.
13Tsa'ma ñajan quema gi iñajan, Na'su.
Ña Chiga, ¡Ñama fuiteja!
Que ñama ñotsse in'jamba, ¡ñama pañamba afaja!
Que ñama tsangae coirapa, ¡ñama ccushaenjan!
14¡Anttejama, ña tssipaccunga ca'ni ejeye!
¡Tsa'ccu tso'sia'ye ñama ccushaenjan!
¡Ñama chi'ga'chondeccu'ye ñama ccushaenjan!
15¡Anttejama, na'en quingofa jisi ña aijaye!
¡Anttejama, fentsindaccu rande ñama indipa andeccoeñe!
16Na'su, ñama pañamba afaja.
¡Queja ñotssiapa qui ñoa'me ñotsse in'jan!
¡Ñama'qque ñotsse in'janjan!
17¡Quema shondo'suma catijama!
¡Junde ñama afaja! Ñoa'me dyo'tssia'ni gi can'jen.
18Ñanga catsepa ccushaenjan.
¡Ñama iyiccayesundeccu'ye ñama ccushaemba somboenjan!
19Ña vana'jen'cho, ña ansange'cho,
ñanga egae tson'choma'qque qui atesu.
Ñama iyiccayesundeccuma'qque qui atesu.
20Nane ñajan tsa'caen vana'jemba
gi injama'cho tsosipie doqquia'caen oshambi.
¡Injama'cho shacasi gi oshambi!
Ñama fuite'suve tta'tta'ma attembipa
ñama vuiquian'suve tta'tta'a'qque gi cachuimbi.
21Ña anqque'sunga seje'pama eyeppu'fa ñama fi'ttiye.
Ña tsaqquie'suni'qque
inzatssia tsa'ccuma ñanga cui'ña'fa.
22¡Antteja cuintsu ñama iyiccayesundeccu an'jen'ni
tise'pa anqque'suyi tise'pama quendeccoeñe!
23¡Antteja cuintsu tsendeccu binime dapa
dyopa oshambipa ttun'dundu'je'faye!
24Tise'pama iyicca'yepa vanaejan.
Ñoa'me iyicca'yepa si'ngia'caen tise'pama nepianjan.
25Antteja cuintsu tise'pa can'jen'choja a'i meniame dasi
majañi'qque tise'pa carpa tsaoni can'jembecañe.
26Nane que majama ñoquimbiansi tsendeccuja tsama mandian'fa.
Que majama iñetsse iñaccaensi tsendeccuja feña'fa.
27Tise'pa osha'cho egae tsincon'chone
tise'pa injama'choma somboenjan cuintsu
que ccushaen'choma isumbipa tsanga shacapa'faye.
28¡Tise'pa inise canseya'cho tevaen'jeni
jinchoma ccuchaja!
¡Nane ño'andeccui'ccu fae'ngae
tise'pa inisema tevaenjama!
29Tsa'ma ña pajipa vana'jen'choma chigáne,
Ña Chiga, ñama pañamba jangiamba ccushaenjan.
30Settapoemba gi Na'su Chigama ñotsse afa'jeya.
Ñama ñotsse tsonsi gi avujatsse tisema afaya.
31Ña tsa'caen tsonsi tsu Na'suja
vaurama afe'choma isuye ti'tsse avujatssiya.
Nane vaura quitsaye, tise can'cho,
tise tsu'ttema'qque afesi
isuye ti'tsse avujatssiya.
32Tsama attepa va'chandeccu'qque avujatssi'faya.
Poiyi'cco Chigave ttattasundeccu'qque
tise'pa injama'choni quiña'faya.
33Nane Na'suja va'chandeccuma pañamba
tise'pa'su indiye'cho aindeccuma aqque'paya'bi.
34¡Chiga Quitsama ñotsse afa'faja!
¡Nane sefacco, ande, mar, poiyi'cco tsani
can'jensundeccu'qque tisema ñotsse afa'faja!
35Chigaja Ziónma ccushaemba
Judá ande'su canqqueve ccase canqquiaña.
Ccushaensi tsu ccase aindeccuja tseni
can'jemba an'bian'faya.
36Tsendeccu, Na'suma shondosundeccu pa'ni'qque
tise'pa dutssiyendeccu tsa canqquema isupa an'bian'faya.
Nane Na'su Chigama ñotsse in'jan'chondeccuja
tsangae tsu tseni canse'faya.
Currently Selected:
Salmos 69: con
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
