Salmos 5
5
Chigai'ccu a'tama ashaeña'cho
1Na'su, ña aya'fama pañamba
ña attuse'je'choma in'janjan.
2Queja ña Na'su, ña Chiga.
Quema iñajansi ña iñajan'choma pañajan.
3Nane poi a'ta sinte jangipa quema iñajansi
qui ña su'choma paña.
Iñajamba gi que pañamba tsoña'chove ronda'je.
4Queja faesu chiga'cambipa
egae tsinconsundeccui'ccu avujatssimbi.
Nane egae tsinconsundeccu quei'ccu
can'jeñe osha'fambi.
5Tisuja ñotssi qquen in'jan'choja
quenga catseye oshambi.
Nane queja egae tsinconsundeccuma ñoa'me chi'ga.
6Fi'ttisundeccuma, tansintssia qquen attiamba
afopoensundeccuma'qque qui chi'ga.
Nane poi afopoensundeccuma qui fi'tti sefaeña.
7Tsa'ma queja ñama ñotsse in'jansi
gi que can'jen'chonga ca'niñe osha.
Nane que ñotssia can'jen'ttima camba
gi puntssamba pa'cco injama'choi'ccu quema iñajan'jen.
8Na'su, ñama iyiccayesundeccu ñama noñangian'fa'ni'qque
Que ñotsse in'jan'choi'ccu ñama angacanjan.
Ñotssia tsaiquingae ñama fendepa angacanjan.
9Ñama iyiccayesundeccuja tise'pa injama'cho
tsosipie egae jinchopa tansintsse afaye atesu'fambi.
Pa'chombe atu'tti changoma ovimbisi tssu'jianqquia'caen
tise'pa aya'fa changoi'ccu injanga egae supa
menzanza'fai'ccu afopoen'fa.
10¡Na'su, ña Chiga, tise'pa injama'choma somboenjan!
Tise'pa quendecco'chonga tise'pama indianjan.
Nane tsendeccu quema pañambipa panshaen egae tsinconsi
tise'pama catipa joqquitssianjan.
11Tsa'ma poiyi'cco majan queve in'jamba
quenga ca'nimba can'jendeccuja avujatssi'faya'cho.
Tsangae tsu avujatsse settapoen'jen'faya'cho.
Tise'pama piccoqquia'caen coiraja cuintsu
que inisema in'jan'chondeccuja quei'ccu avujatssi'faye.
12Nane, Na'su, sundaro tisuma panshaenqque'suma
tiveni an'biamba tisuma piccoqquia'caen
quema in'jan'chondeccuma in'jamba coiraja.
Currently Selected:
Salmos 5: con
Highlight
Share
Compare
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
