Salmos 49
49
Cansepa bare'cho
1¡Poi ande'su aindeccu, vama paña'faja!
2Nane ricondeccu, va'chandeccu'qque,
joccapindeqquia, bove'ccondeqquia'qque,
vama paña'faja.
3Ñajan in'jamba afaye tson'jen.
Nane injama'cho tsosipie in'jan'choma
gi condaya cuintsu que'i'qque in'jan'faye.
4Settapoen'choi'ccu condasesi paña'faja.
Gitara'ca'ma jeñamba a'tutsse conda'choma gi
a'tatsse afaya.
5Ñama iyiccayesundeccu jipa
ñama egae tsoñe ttu'fa'ni'qque dyojombi gi.
Nane tsa egae vanaqque'su a'ta nepi'ni'qque gi dyojombi.
6Tsendeccuja osha'choma an'biamba
tsai'ccu quinsepoemba afapa patsuye qquen in'jan'fa.
7Tsa'ma majañi'qque tisuma ccushaeñe oshambi.
Ni Chiganga afepoeñe oshambi faesuma ccushaeñe.
8¡Nane jimbitssi tsu corifin'dima boña'chove
tsai'ccu a'i canse'pama chavapa ccushaensi
9cuintsu tsangae canseya'choma isupa pambitsse canseye!
10In'jan'cho tsu poiyi'cco a'i fae'ngatsse pa'fa.
Nane injama'pa, sumbi'qque pa'fa.
Rico'qque pasi cca'indeccu tise an'bian'choma isu'fa.
11A'i quinsepoemba tisu iniseve
tise andema inisian'an'qque pasi ande chango atu'tti tsu tise tsangae can'jeña'cho.
¡Nane tseni tsu tsangae can'jeña!
12A'ija tsangae canseya'bi.
Tise corifin'dija barembi tsu.
Poiyi'cco ande'ye jacanqque'su paqquia'caen
tise'qque injanga paya.
13Tisuyi patsuye osha qquen in'jan'chondeccu
tsu tsa'caen pa'faya.
Tisuja ñotssia qquen afasundeccu
tsu tsa'caen naninge'faya.
14Ovejama coira'su ovejama angacanqquia'caen
tsu paya'choja vandeccuma atu'ttinga angaya.
Sinte a'tasi ño'andeccu ccase qquendyapa tise'pama patsusi
tsu congomba tise'pa ai'voja tsangae
ande chango atu'ttini jinchoya.
15Tsa'ma Chigaja paya'cho'ye ñama ccushaemba
ccase qquendyaemba tisei'ccu angaya.
16Faesu ricove dapa tise tsa'oma ti'tsse ñotssive tson'ni'qque
bo'yo'e dapa can'boenjama.
17Nane tise pa'ta jongoesuma angaye oshambi'ni
ñotssiama ande chango atu'ttini an'biañe oshaya'bi.
18Ja'ño avujatsse can'jemba ricosi
cca'indeccu tisema ñotsse afa'je'ni'qque
19paya'cho a'ta tsu jai'ngae nepiya.
Tsequi a'ta nepisi ccatsse a'tatssia'ma atteya'bi.
20A'ija tsangae canseya'bi.
Nane ricombe corifin'dija barembi tsu.
Poiyi'cco ande'ye jacanqque'su paqquia'caen
tise'qque injanga paya.
Currently Selected:
Salmos 49: con
Highlight
Share
Compare
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
