Salmos 103
103
Na'suma gi ñotsse afaya'cho
1Pa'cco ña canse'pai'ccu gi
Na'suma ñotsse afaya.
Pa'cco ña in'jan'choi'ccu gi
tise ñotssia inisema ñotsse afaya.
2Pa'cco ña canse'pai'ccu gi
Na'suma ñotsse afaya.
Ni fae'ccoeyi'qque tise ñanga ñotsse
tson'jen'choma aqque'paya'bi gi.
3Na'su tsu pa'cco ña egae tsincon'choma joqquitssian'su.
Tise tsu pa'cco ña paji'cho'ye ñama ccushaen'su.
4Tise tsu ñama pa'cho'ye qquendyaen'su.
Nane tise ñotsse in'jan'choi'ccu,
tise mende'yepa afe'choi'ccu
tsu ñama ttupa an'bian.
5Osha'cho bove ñotssiai'ccu
ña injama'cho in'jan'choma vuiquian.
Nane cuna tose sho'yosi pindo quin'anme daqquia'caen
ingi'qque chu'a quin'sui'ccu canse'faya.
6Na'suja noñangiañesundeccuma fuiteye jongoesuma tansian'da
tsu ñoa'me ñotsse fuitepa tansian.
7Na'suja Moisésnga tise tsoña'choma condapa
israendeccunga tise tson'jen'choma canjaen.
8Na'suja ingima mende'yepa vasuitsse tson'jen.
Nane iyu'umbe'yi pa'cco tise in'jan'choi'ccu
ingima ñotsse in'jan.
9Poi a'ta ingi injama'choma somboembi.
Ni tsangae ingima iyicca'yembi.
10Ingi egae tsincon'cho shaca injan'tssi'ma'qque
toya tiseja ingi shacama iñajambi.
11Nane sefacco pa'cco andema piccoqquia'caen
tiseja tise've in'jamba pañasundeccuma tsa'caen ñoa'me in'jan.
12Tayo tsu ingi egae tsincon'choma joqquitssian.
Nane chiga sombo'je'cho chiga amppi'je'cho'ye
biani jinqquia'caen
ingi egae tsincon'choma biani joqquitssian.
13Yaya tise dushundeccuma mende'yeqquia'caen tsu
Na'suja tise've in'jamba pañasundeccuma
in'jamba mende'ye.
14Ande'su ccuttopa'sima agattoen'chove in'jamba
ingija aqquia ñoña'cho qquen atesupa in'jan.
15Poiyi'cco a'i tsu shoshovia'caen canse'fa.
Nane te'ta afojoqquia'caen canseye ashaen.
16Tsa'ma Na'su Chiga tise fingiain'ccu fingiansi
te'ta pandiqquia'caen pasi
majañi'qque tisema injan'jembi.
17Tsa'ma tsangae tsu Na'su Chigaja tise've in'jamba
pañasundeccuma in'jan'cho.
Tsangae tsu tsambe omba'su dushundeccuma'qque
tansintsse ñotsse tsoña.
18Tsendeccu tisei'ccu injancco'fa'choma
aqque'pambipa tise manda'choma pañamba tson'ninda tsu anttembe'yi ñotsse in'jaña.
19Na'suja sefacconi can'jemba manda'jesi
tise manda'cho'qque osha'cho jincho tsu.
20¡Chigama sefacconi'su shondosundeccu,
Na'su Chigama ñotsse afa'faja!
Que'i quin'sui'ccu Na'su manda'choma pañamba
tsonsundeccu qui.
21¡Chigambe sefacconi'su sundarondeccu,
Na'su Chigama ñotsse afa'faja!
Que'ija tisema shondopa
tise in'jan'chove tsonsundeccu qui.
22¡Pa'cco Na'su agattoen'cho,
Na'su Chigama ñotsse afa'faja!
¡Nane pa'cco Na'su agattoen'cho já ccutsuni'su'qque
tise manda'choma ñotsse afa'faja!
¡Ña'qque gi pa'cco ña injama'choi'ccu
Na'su Chigama ñotsse afaya!
Currently Selected:
Salmos 103: con
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
