Joel 2
2
Na'su a'ima ttu'se'cho
12Na'suta tsu tansintsse conda:
“Ja'ño tisu injama'choma ñoñamba
toequi ñani ji'faja.
¡Ambe'yi ina'jemba ñombi'yepa fundo'faja!”
13Tsa'cansi tsu toequi
Na'su que'i Chiganga shanda'faya'cho.
¡Tisu sarupama chittambe'yi
que'i injama'choma chittaqquia'caen cambiaña'cho!
Nane Na'suja junde iyicca'yembipa
que'ima ñoa'me in'jamba mende'yepa
que'inga egae tsoñe in'jambi.
Tsonsi Na'suja su:
23“¡Avujatssi'faja, Zión canqque'su aindeccu!
¡Na'su que'i Chigave in'jamba avujatssi'faja!
Na'suja unjima tise tuite tuiñaqquia'caen
ñotssiave atesian'suma moeña.
Nane tayoe'caen tsu sanfan'su unjin toya'caen
coejefa'su unjima'qque tise tuiyaqui tuiña.
24Tsa'cansi trigoma ñotsse taisi
coira'je'cho cuarto on'bapa sheque'jeya.
Vino tanque toya'caen olivo yayapa tanque'qque on'bapa feti'jeya.
25Tayoeta gi sundaroma moenqquia'caen
ttombuma moe cuintsu que'i taiya'choma cca'na'faye.
Tsane afepoenqquia'caen gi ja'ñojan
ti'tsse que'inga afeya.
27Tsequi a'ta qui ñajan Na'su, que'i Chiga,
Israelni can'jen'cho qquen in'jan'faya.
Nane faesuve me'i'on tsu.
Minguite'qque ña aindeccuja ccase ansange'faya'bi.
Chiga Qquendya'pa jiya'cho
28Tsa'caen da'fasi gi poi aindeccunga
ña Qquendya'pama moeña.
Que'i dutssiyendeccu, que'i onquengendeccu'qque
tsu ñane afa'faya.
Que'i chu'a tsandiendeccuja
sefani'su attian'choma tsu atte'faya.
Que'i coenzandeccuja ayó'pae tsu ayo'o'faya.
29Tsequi a'ta gi ña Qquendya'pama moeña
ñama shondosundeccunga–tsandienga,
pushesunga–cuintsu tsendeccuja ñane afa'faye.
30Toya'caen gi sefacconima canjaeña
osha'cho camboenitssia'ma.
Nane andeni'qque gi anjampa, si'nge,
onfen'ba, osha'choma canjaeña:
31Toya'caen Na'su jiya'cho a'ta ca'tsa
nepiji'nijan coejechiga tsu sintti'e daya.
Cose'suchiga'qque tsu anjampaveyi daya.
32Tsa'ma poiyi'cco majan Na'suma iñajan'chota
ccushapa pa'fayambi.
Nane Jerusaléni, Zión ccotta'cconi
tsu ccushaeña'choja jinchoya.
Na'su tayo tansintsse suqquia'caen tsu
tise in'jan'chondeccuja pambe canse'faya.”
Currently Selected:
Joel 2: con
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
