Job 9
9
1Tsonsi pañamba Jobja su:
2Ñoa'me que suqquia'can tsu, qquen gi in'jan.
Nane Chiganga ccutsupa a'ija tise “ñotssiama” canjaeñe oshambi.
3A'i Chigai'ccu afaccoye in'jamba mil afa'chove afa'ni'qque
ni fae'cco Chigama patsuye afa'cho sombombi.
4Chigaja ñoa'me osha'choma oshachopa osha'chove in'jan'cho.
¿Majan tsu tisema camba afapa patsu?
5Chigaja iyicca'yepa ccotta'ccoma joqquitssian'jen.
A'i atesumbisi ccotta'ccoma ccappoppaemba anga.
6Tise tsonsi andeja oya.
Oyasi tsosini jincho'qque joqquitssi'fa.
7Tise mandasi coejechigaja somboya'bi.
O'fema'qque mandasi chanjuña'bi.
8Nane faesu fuitembi'ma tisuyi tsu sefaccoma attajaemba
mar shave'pa omba'ye tsui ja'jepa patsu.
9Tiseja osha'cho o'fe jinchoya'chove agattoemba
Oncomari Coenza o'fe, Ofendyondyo, An'cco toya'caen
Vacho'va Patienccuma'qque agattoen.
10¡Nane osha'cho ñotssiave tise'yi tson!
¿Majan tsu pa'cco tsama in'jañe osha?
11Chiga ñai'ccu pporotsse panshan'ni'qque
¿ma'caen gi tisema atteya?
Nane tise panshan'chove atesumbi gi.
12Tise jongoesuma itsa'ni'qque
¿ma'caen gi tisema se'piya?
Nane oshambi gi tisema iñajampañañe
“¿micon'jen qui?”
13Chiga iyicca'ye'ninda
¿ma'caen gi junde tisema ñoquiaña?
Nane Egipto'su Rahab sundarondeccu'qque
patsuyepa tisenga ccaru'fa.
14Tsa'cansi ¿ma'caen gi tisei'ccu afaccopa
ccaningae afaya?
15Nane ñajan egae tsincombi'ma gi
toya tisema afaye oshambi.
Tiseja ñama tansintsse conda'su tsu.
Aqquia mendeyeya'choveyi gi tisema afaye osha.
16Mapán ña tisema tansintsse su'chove iñajampañasi
tise paña'an'qque ñoa'me
ña aya'fama pañañambi —qquen gi in'jan.
17Nane injanga unjin, fingiain'ccu tiseja ñama noñangiamba
ña iñacca'ttima ti'tsse atapoeña.
18Panshaen ñama ñombi'yansi gi
ni qquendyapa ñofaccaye oshambi.
19Majan ti'tsse quin'an qquen atesuye in'jan'ni'qque
tiseja osha'choma ti'tsse quin'an.
Majan ti'tsse ño'an qquen atesuye in'jan'da
¿majan tsu ño'amba tisema ttu'seye osha?
20Ña egae tsincombe'yi canse'ni'qque
toya tsu ña aya'fa su'choja ña shacama canjaeña.
Nane ña egae tsincombe canse'ni'qque
tise tsu ña egama atteya.
21Ña egae tsombichoa'ja ¿jongoesune tsu bare?
Nane tisuma gi chi'ga.
22Poiyi'cco tsu fae'ngatssi'fa.
Tsa'cansi gi qquen in'jan:
Tiseja egae tsinconsundeccui'ccu fae'ngae
ño'andeccuma'qque fi'tti sefaeña.
Currently Selected:
Job 9: con
Highlight
Share
Compare
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
