Isaías 65
65
Pañambi'choa vanaña'chone condase'cho
1Na'suja su:
“Ñame tta'ttambindeqquia tsu ñama atte'fa.
Ñame iñajampañambindeqquianga gi ñajan tisuma canjaen.
2Ñajan a'ima in'jamba pa'cco a'ta tise'pama
ttu'se'ni'qque pañambipa ñama iyicca'ye'fa.
Tisupa in'jan'choveyi in'jamba injanga ccaningae jaja'fa.”
Pañamba avujaya'cho
17“Que Canjan. Cuna sefacco, cuna andeve gi agattoeña.
Tayo pasa'choma aqque'papa minguite'qque a'ija tsama injan'jeñambi.
18Ña agattoeña'choma attepa
avujatssipa tsangae tsa'caen avujatsse can'jen'faja.
Nane cuna Jerusalén canqqueve agattoensi tsu
poiyi'cco tseni can'jensundeccu avujatssiya.
19Ña'qque tsa Jerusalénma attepa
avujatssipa gi tseni can'jensundeccuma'qque
attepa injama'choni avujaya.
Nane tseni ti'tsse ina'jen'choma pañambipa ni
ñombi'yepa fundo'je'choma ccase pañaña'bi.
20Tsenijan jiña'bi tsu aipano pa'cho,
ni majan tseyi isu'chove.
Coenza ccasheyendeccu'qque uta pambipa
bo'tsse canse'faya.
Majan cien canqque'fave an'biamba
pa'ta ñoa'me chu'a tsu pa.
Nane toya cienme nepimbi'te pa'ninda
tsu poiyi'cco tisenga egae tsincon'choma in'jan'faya.
21A'i tsao'ñamba tsani can'jen'faya.
O'fa tsaja nasipave jomba tsama an'faya.
22Nane tsao'ñasi faesu tsani can'jen'choja jiña'bi.
Toya'caen nasipama jonsi
faesu tsama an'jen'cho'qque jiña'bi.
Quini'cco bo'tsse canseqquia'caen tsu
ña aindeccu'qque bo'tsse canse'faya.
Nane ña in'jan'chondeccuja semamba
avujatsse tise'pa sema'jen'cho'suma isupa
ñotsse canse'faya.
23Tise'pa, toya'caen tise'pa omba'su dutssiyendeccu'qque
Na'su in'jan'cho aindeccu tsu.
Na'su tsa'caen in'jamba ñotsse tsonsi
aqquiatsse injanga ñotsse sema'fambi
ni tise'pa du'shuma toya chu'ayi paya'chove isu'fambi.
24Tsendeccu toya ñama ttu'sembi'te gi
tise'pa in'jan'choma in'jamba afaya.
Nane tise'pa toya afa'je'ni gi
tise'pama pañaña.
25Putsa'su ain, oveja'qque fae'ngae ccuipa
shoshovima an'jen'faya.
Ttesi'qque vaura'caen shoshovi sambama an'jeña.
Tsa'ma iyota tsu andema amba canseya.
Nane pa'cco ña ñotssia ccotta'cconi'qque
jongoesu dañoña'choja jinchoya'bi.”
Na'su tsu tsa'caen su.
Currently Selected:
Isaías 65: con
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
