Isaías 55
55
Na'su Chiga ttu'se'cho
1“¡Poiyi'cco majan qquipoe'su'ta jipa tsa'ccuma cu'i'faja!”
Majan corifin'di me'cho'ta jipa
afepoembe'yi trigoma isupa an'faja.
Nane vino, chochoma'qque chavambe'yi cu'i'faja.
2¿Jongoesie qui corifin'dima catipa
osha'cho an'masia'ma injanga chava'fa?
¿Jongoesie qui que'i semasi afepoen'choma
in'jambe'yi injanga cati'fa?
Ñama ñotsse paña'da qui ñotssia anqque'suma amba
ya'yatssia'ma'qque avujatsse an'faya.
3Ñani jipa ñama paña'faja.
Ñama pañamba canse'faja.
Nane tsangae injancco'fa'chove gi
que'i'ccu afapa tson'jeña ña tayopi'su David'yenga
ñotsse in'jamba afa'cho cuintsu ja'ño nepiye.
4Nane tisema gi ccutsian cuintsu poi ande'su aindeccunga canjaemba
poi canqque'su aindeccuma nafattiañe.
5Ña, que Na'su, Israel Ñotssia Chiga quenga ñotssiave tsonsi qui
quema atesumbi'choa canqquesundeccuma'qque ttu'seya.
Nane que ttu'sesi tsu quenga buttopa ji'faya.
6“Toya tisema atteye osha'ta Na'suve tta'tta'faja.
Toya pporotsse tise can'jen'ninda tisema ttu'se'faja.
7Egae tsincon'suja tise tson'jen'choma antteya'cho.
Egae in'jan'choja tise injama'cho in'jan'choma antteya'cho.
Nane Na'sunga toequi shanda'ninda tise tsu me'deyeya.
Na'sunga toequi shanda'ninda tise tsu
egae tsincon'choma aqque'paeña.
8Ña in'jan'choja que'i in'jan'choacambi tsu.
Ña tson'cho'qque que'i tson'choacambi tsu.
9Nane sefacco andema ombanga jinqquia'caen
Ña in'jan'cho tsu que'i in'jan'choma ti'tsse'tssia.
Toya'caen ña tson'cho tsu que'i tson'choma ti'tsse'tssia.”
Qquen tsu Na'suja ñoa'me su.
10“Unjin chandisu'cco'qque sefane tuipa,
ccase toequi sefani ansundembi.
Nane tsangae tsu tuipa andema tssipoen
cuintsu sho'yoqque'su sho'yopa te'taye.
Tetasi a'ija an'bian'fa ccase joñe;
toya'caen panme ñoñamba añe.
11Tsa'canqquia'caen ña Aya'fama injanga afambi gi.
Tsa'cansi tsu ña in'janqquia'caen tsomba
ña mandaqquia'caen tsoña.
12Que'ija avujatsse tsene sombopa
que'i andeni ccase japa opatsse can'jen'faya.
Nane que'i toequi ja'choma attepa
ccotta'cco rande, chipiri'qque settapoemba avuja'faya.
Quini'cco'qque attepa tise'pa ttembama oyaen'faya
tsai'ccu tise'pa avuja'choma canjaeñe.
13Nojan sho'yombisi onsha'mejan atapaya.
Ancco'si me'i'onsi shaga'ttoja atapaya.
Tsa'caen tson'jensi tsu
poiyi'cco Na'su inisema ñotsse afa'faya.
Nane tsaja ccucha'masia tsangae canjaen'cho tsu.”
Currently Selected:
Isaías 55: con
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
