Isaías 53
53
1¿Majan tsu ingi condase'choma in'jan'faya?
¿Majanga tsu Na'suja tise oshacho'choma canjaen?
2Nane Na'suja in'jan cuintsu tisema shondo'su
jonqquia'caen santssia ande'ye sho'yoye.
Ñotsse attiambi ingi tise've in'jan'faye.
Ñotssimbi ingi tisenga catse'faye.
3Nane a'ija tisema chi'gapa cati'fa.
Ñombi'ye'su a'i tsu.
Nane vanañe atesu'cho tsu.
A'tuqquia'caen gi tisema panshan'fa.
Barembi tsu qquen in'jamba gi
tisema chi'ga'fa.
4Tsa'ma tise tsu ingi vana'jen'choma an'bian.
Nane ingi ñombi'ye'choma'qque tsu tiseja angacan.
“Chiga tisema ma'ppipa iñaccaensi vana'jen”
qquen gi in'jan'fa.
5Tsa'ma ingi pañambipa in'jangae tsincomba gi
tisema quiqquian'fa.
Ingi egae tsincon'chone tsu tisema vanae.
Tsa'caen tise vana'jensi ingija opatsse canse'fa.
Ma'ppisi tise iñacca'cho tsu ingima ccushaen.
6Poiyi'cco gi oveja'caen injanga ccani jacamba qque'fa.
Ingi in'janqquia'caen gi injanga canse'fa.
Tsa'ma Na'suja pa'cco ingi egae tsincon'cho shacama tisenga antte.
7Tisema vanaemba egae tson'jen'fa'ni'qque tiseja afambi.
Nane ovejama fi'ttiye angaqquia'caen tisema
angasi oveja tosema chattuye tson'jensi
ziyaqquia'caen tiseja afambi.
8Tiseja ño'a'ma egae tsincon qquen supa
me'i'on tsu majan tisene afapa fuiteya'chove.
Majañi'qque tise naniña'chove in'jan'fambi.
Nane va ande'ye tisema itsapa
ña ande'su aindeccu pañambipa egae tsinconsi
tsane tisema fi'tti'fa.
9Minguite'qque tiseja egae tsincombi.
Ni tise aya'fa'ye egae afa'choja sombombi.
Tsa'ma egae tsinconsundeccui'ccu fae'ngae tisema a'tu'fasi
tsu ricondeccui'ccu fae'ngae tiseja ccui.
10Nane Na'suja in'jamba tsu tisema dañomba vanae.
Egae tsincon'chone afe'chove tisema tson'ni'qque
can'jemba jai'ngae tise dutssiyendeccuma atteya.
Nane Na'suja tisei'ccu tisu in'jan'choma
ñotsse nanitsse tsoña.
11Injama'choni tsain'bitsse vana'jemba tsu
ccase qquendyapa cansepa avujatssiya.
Na'suma ño'an shondo'suja tsa'caen atesupa
tsain'bio a'ima ccushaemba ño'ame tsomba
tise'pa egae tsincon'choma angapa catiya.
12Tise tsa'caen tsonsi Chigaja tisema joccapitssia've tsoña
cuintsu ti'tsse mandasundeccui'ccu fae'ngae patsu'faye.
Nane tiseja fi'tti'chonga afeyepa
faesu egae tsincon'su tsu, qquen su'fa.
Tsa'ma ñoa'me tsain'bio aindeccu egae tsincon'choma anga
tsendeccune Chigama iñajamba ñoquiañe.
Currently Selected:
Isaías 53: con
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
