Isaías 52
52
Jerusalénma ccushaeña'cho
7Ñocca'tsse tsu attian ñotsse condase'choma ipa
ccotta'cco'ye buttopa jiña'su.
Nane opatsse canseya'cho aya'fama tsu i.
Na'su Chiga ingima ccushaen'chone condasepa
tsu Ziónga conda: “¡Que Chigaja Na'su tsu!”
8¡Paña'faja! Na'su toequi Ziónga jiña'ninda tsu
canqquema coirasundeccu tisu tso'fei'ccu
tise ma'caen jiña'choma attepa avujatsse fundo'faya.
9Nane Na'su tise aindeccuma mende'yepa
Jerusalénma ccushaen'ninda tsu
Jerusalén osuipa sheque'cho'qque jangipa
fae'ngae avujatsse settapoen'faya.
10Poi ande'su aindeccu caña'jen'ni
Na'su tise oshacho'choma canjaensi tsu
poi andesundeccu ingi Chiga ingima ccushaen
qquen in'jan'faya.
11¡Sombo'faja! ¡Babilonia'ñe sombo'faja,
tsa que'i Na'su ettini jincho'choma
anga'chondeccumbe ande'ye!
¡Nane jongoesu egama pporaembe'yi
tisuma ñotsse coirapa sombo'faja Babilonia'ñe!
12Tsa'ma dyopa cunshoa'me butto sombo'faya'bi qui.
Nane Na'su, Israel Chiga tsu poifanga
que'ima ñotsse coirapa angacaña.
Na'suma shondo'suja patsuya'cho
13Ñama shondo'suja ñotsse tsu tsoña.
Tisema ti'tsse'tssia've tsonsi tsu ñoa'me joccapitssiya.
14Nane tsain'bio a'i, tise camba'ju,
tise ai'vo'qque ñoa'me dañongesi
a'ia'caen attiambi attepa can'boen'faya.
Tsa'ma tisema can'boenqquia'caen tsu
15tise poi ande'su a'ima giyaensi
avujatsse can'boen'faya.
Nane ande nasundeccu'qque attepa afaye osha'faya'bi.
Tayoe pañambi'choama tsu in'jan'faya.
Currently Selected:
Isaías 52: con
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
