Isaías 11
11
Isaí omba'su dutssi'ye mandaya'cho
1Shoyo'cho quini'cco setsa'cho'ye sho'yoqquia'caen
tsu tiseja Isaí omba'su dutssiyendeccu'ye attiaña.
2Na'su Chiga Qquendya'pa tsu tisei'ccu tsangae can'jemba
in'jaeña cuintsu osha'choma atesupa in'jañe.
Qquendya'pa can'jensi tiseja
cca'ima ñotsse in'jaemba tansintsse mandapa
Na'su Chigama ñotsse in'jamba dyoe'sui'ccuyi paña'jeña.
3Tiseja jo'su tso'fei'ccuyi camba ni
tsosinai'ccuyi pañamba in'jamba afaya'bi.
4Tsa'ma tansintsse mandapa ñoquimbindeqquia'ma fuiteya.
Tise ande'su va'chandeccu injan'jeña'cho
itsayesa'ne'qque coiraya.
Tise afa'choja quini'ccoa'caen
egae tsinconsundeccuma ma'ppiya.
Nane tise aya'fai'ccu ufa'choja egandeqquia'ma fi'ttiya.
5Ñotsse manda'cho, tansintsse su'cho'qque
tise ondiccu'je'caen fae'ngae
tisei'ccu jincho'fa mani jacan'ni'qque.
6Tsequi a'ta putsa'su ain, oveja du'shui'ccu
fae'ngae opatsse canse'faya.
Toya'caen ttesi, chivo du'shui'ccu
fae'ngae ana'jen'faya.
Nane vaura du'shu, cuvottesi'qque
fae'ngae coen'faya.
Toya'caen tsu antte'faya a'i du'shu
cuintsu tise'pama coirapa angacañe.
7Vaura, oncomari'qque fae'ngae jacansi
tise'pa dushundeccu fae'ngae ana'jen'faya.
Cuvottesi'qque vaura'caen shoshovima an'jeña.
8Du'shuja cofasi chango ji'ttini cofe'jeye'qque oshaya.
Nane tise tivei'ccu sinsinsio changonga
dyombi'tsse tsomiñe oshaya.
9Me'i'on tsu jongoesu dañoqque'su
ña in'jan'cho ccotta'cconi can'jeñe.
Nane tsa'ccu marnga on'baqquia'caen
Na'su Chigane in'jan'choja
poi aindeccumbe injama'chonga
on'baya cuintsu tise've in'jan'faye.
10Banderama jangiansi a'i tsanga boqquia'caen tsu
tsequi a'ta va Isaí setsa'cho'su shoyo'cho attiansi
poiyi'cco a'i tisenga bo'faya.
Nane poi ande'su aindeccu tsu tise've tta'tta'faya.
Tise can'jeña'ttija tise a'tatssiai'ccu ñoa'me ñotssiya.
Ccani anga'chondeccu toequi ji'cho
11Toya'caen tsequi a'ta Na'suja
tise Osha'choma Oshacho'choma canjaemba
tise aindeccu'su toya tise've in'jan'chondeccuma
ccase ttu'se boñaña.
Nane Asiriani toya'caen Egiptonima
ttu'se boñamba Patros, Etiopía, Elam, Sinar, Hamat toya'caen poi marni'su
andenima'qque tise'pama ttu'sepa boñaña.
Currently Selected:
Isaías 11: con
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
