Isaías 1
1
Judándeccu egae tsincon'cho
1Na'su Chiga tisema in'jaensi Amoz dutssi'ye Isaíasja Chiga Judáne toya'caen Jerusaléne su'choma afa. Nane Uzías, Jotam, Acaz toya'caen Ezequías Judá andema manda'je'fa'ni tsu Isaíasja Chiga Aya'fama afa.
2Sefacco, ande'qque Na'su su'choma paña'faja:
“Dushundeccuma gi coeña coenzave daya'ngae.
Tsa'ma tsendeccuja ñama pañambipa chi'ga'fa.
3Sema'su vauraja tise na'suma atesu.
Boro'qque tise'be na'su tsao'ña'choma atesu.
Tsa'ma ña in'jan'cho israendeccuja
Ñama atesumbipa ña tise'pama
in'jan'choma'qque atesu'fambi.”
4¡Va'cha qui, egae tsinconsundeccu!
Tsain'bio shacave qui andu'choma'caen andu'fa.
Que'i yayandeccu egae tsincon'fasi
que'i'qque in'jangae tson'jen'fa.
Na'su'ye qui joqquitssi'fa.
Nane Israel joccapitssia Chiga'ye attufapa
qui tisema cati'fa.
5Tsain'bitsse qui vana'jen'fa
egae tsincon'chove tsoñe in'jamba.
¿Ma'caen gi que'ima ti'tsse vanaeña?
Nane que'i ñoa'me quin'su me'chosi
que'i tsove'qque pa'cco iñacca'chosi
que'i ai'vo'qque manima
ti'tsse iñaccaeña'chove me'i'on.
6Tsovene tsu'ttepie ñotssiave jinchombipa qui
pa'cco iñacca'cho, si'ma'cho,
toya'caen tui'ccupa qui paji'fa.
Tsa'ma majañi'qque que'ima se'jembi ni
que'i iñacca'choma sarupai'ccu findimbi.
Ni que'i iña'suma yayapai'ccu vuiquiambi.
7Que'i ande a'i meniame dasi
si'ngeja que'i canqquenga setsepa oque.
Que'i caña'jen'ni tsu que'i enemigondeccu
que'i jon'choma an'jen'fa.
Nane Sodoma canqque ju'ru sefaqquia'caen
que'i canqque a'i meniame da.
8Tsa'caen dapa Ziónjan tai'je'cho pasasi
tsajaccuma coira'su tsa'oa'caen
osuipa barembi tsu,
Nane pepinoma taisi
pepinoccuma coira'su can'jen'cho'qque otta catiye.
Toya'caen enemigondeccu ttupa ronda'jesi
oshambiqquia'caen tsu Ziónjan oshambi.
9Na'su Osha'choma Oshacho'cho Chiga ingi'su
majandeccuma ccushaembiecan'da
ñoa'me gi Sodoma, Gomorra canqque'su
aindeqquia'caen metsse sefa'faye'can.
Chigama in'jamba iñajan'cho
10¡Sodoma nasundeqquiacan qui! Na'su que'inga su'choma paña'faja.
¡Gomorra canqquesundeqquiacan qui! Ñotsse paña'faja ingi Chiga que'ima atesiaña'choma.
11Na'suja su:
“¿Jongoesie qui osha'cho afe'choma ñanga i'fa?
Panshaen an'biamba gi que'i ovejama,
vaura du'shu yayapama'qque oque oraen'fa'choma in'jambi.
Nane vaura, oveja, chivo quitsaye
anjampama'qque gi chi'ga.
12Que'ija jipa ñanga catse'fa.
Tsa'ma ¿majan tsu que'ima ttu'se
ña tsa'o'su atandunduni tsu'tsu jacan'faye?
13Ti'tsse i'je'fajama que'i afe'je'cho barembi'choama.
Tsama oque oraen'fasi tsu ñane'jan tssu'jutssi.
Chiga ccaccove ancansi, sema'ma'quia a'ta ji'ninda
qui aindeccuma ttu'se'fa cuintsu fiestaemba ñama iñajan'faye.
Tsa'ma que'i tsa'caen fiestaen'an'qque
toya egae tsincomba canse'ninda gi avujatssiya'bi.
14Cose'su chiga ccaccove ancan'cho fiestama,
toya'caen que'i fae'ngae bo'fa'choma'qque gi chi'ga.
¡Tsa'caen ñama noñangiansi gi tsane quimbi!
15Que'i tivema yasapa ñanga iñajansi
gi tsama cañe chi'gapa ccafanga piyi.
Mapán bia'ave ñama iñajan'ni'qque gi
ñajan que'ima pañambi.
16¡Tisuma cashi'faja!
¡Que'i egae tsincon'choma ccucha'faja!
¡Nane que'i egae tsincon'choma cati'faja
ña attesa'ne!
¡Egae tson'jen'choma antte'faja!
17¡Ñotsse tsoña'chove atesu'faja!
Pa'cco que'i quin'sui'ccu ñotssiama tson'faja.
Nane va'chama fuitepa toya'caen
tise yaya pasi isuya'choma se'pi'fajama.
Tsandupajen'choma'qque fuite'faja
faesu tise'bema cca'nasa'ne.”
18Na'suja qquen su:
“Ji'faja. Jinge que'i egae tsincon'chone condasecco'faye.
Que'i egae tsincon'cho cutsse amundeqquia'caen que'ima daño'ni'qque gi me'tsse
chandisu'ccoa'caen tototssia've que'ima giyaeña.
Nane sarupa cu'a da'choma giya'tsse oveja tose'caen tototssia've tsonqquia'caen gi
que'ima'qque tsa'caen giyaeña.
19Que'i in'jamba ñama paña'da qui
osha'cho va ande'su ñotssiama an'faya.
20Tsa'ma ñama chi'gapa pañambi'ta qui
enemigondeccui'ccu geraemba pa'faya.”
Tsa'caen tsu Na'suja su.
Currently Selected:
Isaías 1: con
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
