Éxodo 25

Cachuicco'je'ttive ñoñañe afe'cho

1Na'su Chiga Moisésnga qquen su:

2“Israendeccuma suja cuintsu tisupa injama'choi'ccu ñoa'me afeye in'jan'da ñame in'jamba afe'choma afe'faye. 3Nane vasuma tsu afe'faya'cho: cori, totoacori, cu'a yoshava, 4pajaccopa sarupa, toya'caen sarupa singu'a, sarupa cu'a, totoa lino sarupa, chivo tose, 5oveja ttonoma cu'ave onjoen'cho, faesu ñotssia chhariccotssia ttono, ñotssia caova quini'cco, 6tuñoma setsaenqque'su yayapa, Chigambe qquen canjaeñe yayapaenqque'suve toya'caen oque oraenqque'suve ñoñañe ño'metssia ñome'ba, 7ñotssia si'an patu, osha'cho bareqque'su patuve'qque. (Nane tsesu patuma tsu ancaeña'cho Chigama afa'su na'sumbe conto opipa'chonga toya'caen utu'chonga anduqque'suve ñoña'chonga.) 8Toya'caen ña tise'pai'ccu can'jemba cachuicco'jeya'cho ttuccuve'qque ñoñajan. 9Tsa'ma tsa ña can'jeña'cho ttuccu, pa'cco tseni jincho'choma'qque tsu ñoa'me ñotsse pa'ccoma ñoñaña'cho ña quenga canjaenqquiacantsse.”

Currently Selected:

Éxodo 25: con

Highlight

Copy