Éxodo 23

Chigama sefacconi'su shondo'su

Tsonsi Chigaja Moisésnga su:

20“Que canjan, ña gi que'ima o'tie moeña ñama sefacconi'su shondo'suma cuintsu que'ima coirapa angaye que'imbe ñoña'cho andeni. 21Tise'ye attufa'fajama. Tisema ñotsse paña'faja pañambiqquia'caen tsinconsa'ne. Nane tiseja ñoa'me ña'cantsse afa'su tsu. Que'i egae tsincon'choma aqque'paya'bi tsu. 22Tsa'ma ñama sefacconi'su shondo'su su'choma ñotsse pañamba pa'cco ña manda'choma tson'ninda gi ñajan que'i'ccu iyiccosundeccui'ccu iyicco'jeya; toya'caen que'ima se'pisundeccuma gi sepi'jeya. 23Nane ñama sefacconi'su shondo'su tsu que'ima o'tie japa angaya tsa amorreo, hitita, ferezeo, cananeo, heveo, toya'caen jebuseondeccu can'jen'cho andeni. Tsendeccuma gi me'tsse sefaeña. 24Tsa andesundeccu tson'jen'chonga ma'de'fajama. Tsendeccumbe chiganga ccaru'fajama ni tsanga iñajan'fajama. Tsa'ma tise'pa ñoña'cho chigandeccuma me'tsse catipa tise'pa iñajan'jen'cho patu ccutsu'choma'qque ttova cati'faja. 25Que Na'su Chigangayi iñajan'jen'faja. Tsa'caen iñajansi tsu que'i pan, toya'caen que'i tsa'ccuma'qque ñotsse tsoña.

“Toya'caen paqque'suma'qque gi que'i'ye joqquitssiaña. 26Tsomba gi que'ima tsoña tisu paya'cho a'ta nepimbi'te pa'masia've. Toya'caen ni fae pushesuyi'qque tsu que'i ande'suja toya chu'ama cati'je'cho ni dusumbiyi'qque jincho'faya'bi.

27“Nane ña gi tsoña cuintsu poiyi'cco cca'isundeccuja ña que'i'ccu can'jen qquen in'jamba dyojo'faye. Toya'caen mani'su aindeccunga que'i ja'fa'nijan tise'pa injama'choma gi qqueñaña cuintsu que'ima attepa ccuya'faye. 28Nane pa'ttanga dyopa ccuyaqquia'caen tsu heveondeccu, hititandeccu, toya'caen cananeondeccu que'ima attepa ccuya'faya. 29Fae canqque'fangayi tsani can'jensundeccuma joqquitssiaña'bi gi panshaen aqquia ande catiyesa'ne; toya'caen osha'cho putsa'su tsampini can'jenqque'su atapapa que'ima vanaesa'ne. 30Tsa'ma ti'tsse que'i atapajisi vasia've gi joqquitssiaña'ccaya cuintsu tsa andeni que'i dushundeccuja can'jen'faye. 31Ñanda gi antteya cuintsu que'i ande qquen jinchoye: Cu'a marne ashaemba Filisteondeccu marni nepiya'cho. Toya'caen a'i menia'ñe ashaemba Eufrates naini nepiye. Nane quenga gi tayo afe tsa aindeccu can'jen'cho andema. Tsa'cansi que'i qui tise'pama tteya maña'faya.

32“Tise'pai'ccu injancco'fajama ni tise'pa chigandeccuma in'jan'fajama; 33ni tise'pama antte'fajama cuintsu que'i'ccu fae'ngae que'i andeni can'jeñe. Nane tsa'caen fae'ngae can'jen'fajama tise'pa que'ima in'jaensi tise'pa chigandeccuma in'jamba ñama egae tsinconsa'ne. Tsa'caen tson'da qui tisupama tsangae qqueña'faya.”

Currently Selected:

Éxodo 23: con

Highlight

Copy