2 Reyes 25
25
Jerusalén patsuye'cho
Omboe na'su Sedequíasja Babilonia na'su manda'je'choma chi'gapa pañañe in'jambi. 1In'jambisi na'su Nabucodonosorja poiyi'cco tise sundarondeccui'ccu Jerusaléni geraeñe jipa ttu'fa. Nane Sedequías, canqque'fa nueve, decimo ccovu, toya'caen a'ta diez tise manda'je'cho, tsu tsa'caen jipa Jerusalén isevetsse tise'pa carpama ccutsian'fa. Ccutsiamba andema'qque canqque ttuccunga cca'tti, cca'tti boña'fa tsa'ye ansundepa osha'ta canqquenga ca'niñe. 2Tsa'caen canqquema ttupa ronda'je'fa. Sedequías manda'je'cho canqque'fa once, 3ccovu cuatro, a'ta nueveve nepisi anqque'su sefasi poiyi'cco a'i ñoa'me qquipoe'su'fa. 4Tsequi a'ta canqque ttuccuma canshaemba na'su Sedequíasja poiyi'cco tise sundarondeccui'ccu cose canqque'ye sombopa ccuyin ja'fa. Nane Babilonia'su caldeo sundarondeccu toya canqquema ttupa ronda'je'fa'ni'qque tsu canqque'su dos ttuccu enttinge'su sombo'tti'ye sombopa na'sumbe tetaccungae japa Jordán na'en sinjunccuni ccuyin ja'fa. 5Tsa'ma caldeo'su sundarondeccu na'su Sedequíasma mandiamba japa Jericó sinjunccuni tisema indi'fa. Indi'fasi Sedequías sundarondeccuja tisema catipa attufaen japa ccuya'fa. 6Tsa'caen indipa caldeo sundarondeccuja Sedequíasma Babilonia'su na'sunga anga'fa Hamat ande'su Ribla canqqueni. Tse'ttinga na'su Nabucodonosorja Sedequíasma ma'caen tsoña'chove manda. 7Tse'ttingayi Sedequías caña'jen'ni tise dutssiyendeccuma fi'tti'fa. Fi'ttipa Sedequíasmajan tso'fema tssa'jamba candenai'ccu tandamba Babiloniani anga'fa.
Chiga etti asittaye'cho
8Nabucodonosorja, canqque'fa diez y nueve, ccovu cinco, toya'caen a'ta sieteve tise Babiloniama manda'je'cho, tisema coira'su sundaro na'su Nabuzaradánma Jerusaléni manda moe. Mandasi jipa 9Chiga ettima oque cati. Toya'caen tsu na'su etti, poi tsa'o, majan rande, majan chipirima'qque oque cati. 10Pa'ccoma oque catisi tisei'ccu jacan'su caldeo'su sundarondeccuja Jerusalén'su patu ttuccuma'qque asitta'fa. 11Tsa'caen pa'ccoma asi'ttapa Nabuzaradánjan manda cuintsu poiyi'cco toya canqqueni can'jensundeccuma Babiloniani anga'faye. Toya'caen majan judándeccu, tisupa a'ima chi'gapa Babilonia na'sunga tisuma afe'chondeccu, toya can'jen'cho osha'chove ñoñasundeccuma'qque manda cuintsu indipa Babiloniani anga'faye. 12Nane jo'su majan ti'tsse osha'chove mendeqquiaveyi toeni cati cuintsu can'jemba tsajaccu, potreroma'qque coira'je'faye.
13Toya'caen caldeondeccuja Chiga ettini jincho cu'a yoshavama ñoña'choma do'jo'fa fava'ccoe dasi Babiloniani angaye. Nane tsa'caen Chiga ettima asi'ttapa cu'a yoshavama ñoñamba dyaiña'choma, tsa'ccu tanque randema, tsambe tsosiccunga ccutsutsian'choma'qque do'jopa Babiloniani anga'fa.
Currently Selected:
2 Reyes 25: con
Highlight
Share
Compare
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
