2 Reyes 24

1Tsa'caen Joacim manda'je'ni Babilonia'su na'su Nabucodonosor Judá andeni jipa tisema patsu. Tsa'caen patsuyepa tsu Joacimjan tres canqque'fave Nabucodonosor mandaqquia'caeñi manda'je. Tsa'caen manda'je'cho ccaningae in'jamba tise'ye somboye in'jamba ñotsse pañañe chi'ga. 2Tsa'ma Joacim tsa'caen Nabucodonosorma pañañe chi'gasi Na'su Chiga antte cuintsu ccanambandeccu, nane caldeondeccu, siriondeccu, moabitandeccu, amonitandeccu'qque, jipa tise andema noñangiamba daño'faye. Nane tayopi Na'su Chigaja tise aya'fama afasundeccuma in'jaensi Judándeccunga condase'fa tsa'caen tise'pama sefaeña'chove. 3Nane Judá na'su Manasés'ye osha'cho egave tson'chone Na'su Chigaja iyicca'yepa tisu'ye Judáma joqquitssiañe in'jamba tsa'caen tson. 4Toya'caen Manasés'yeja Jerusaléni tsain'bitssi egae tsincombindeqquiama injanga fitti'tti'chone tsu Chigaja iyicca'yepa tsa'caen tson. Ñoa'me tsu Na'su Chigaja Judá egae tsincon'choma ti'tsse aqque'paye in'jambi.

5Pa'cco Joacim ti'tsse tson'cho tsu Judá nasundeccu tson'cho tevaen'jenga tevaen'cho. 6Tise pasi tsu tise dutssi'ye Joaquín na'suve dapa manda'je.

7Tsequi Egipto'su na'su ccase Judáni jimbi. Nane Babilonia'su na'sunga pa'cco Egiptondeccu biani an'bian'cho andema, tsa Egipto sinjunccune Eufrates na'empi'e, itsapa tsu tisu andeniñi can'jen.

Joaquín Babiloniani anga'cho

8Joaquínjan diez y ocho canqque'fave an'biamba mandaye ashaemba Jerusaléni tres ccovuveyi manda'je. Tise mamajan Jerusaléni'su Elnatán onque'nge Nehusta. 9Tsa'ma Joaquín tise yaya'ye'caen egae tsinconsi Na'su Chigaja tsama attepa chi'ga.

10Tsa'caen Joaquín manda'je'ni tsu Babilonia'su na'su Nabucodonosor sundarondeccuja Jerusaléni jipa shoquendi ttu'fa geraeñe. 11Geraeñe ashaen'fasi Nabucodonosor'qque ji. 12Tise jipa patsusi tsu Judá na'su Joaquínjan tisuma Babilonia'su na'sunga afepa, tise mama, tisema shondosundeccu, nasundeccu, tise mandasi paña'jen'chondeccuma'qque afe cuintsu indi'faye. Nane Nabucodonosor canqque'fa ochove manda'je'ni tsa'caen Judáma patsu.

13Tsa'caen Judá nasundeccuma indipa Nabucodonosorja Na'su Chiga suqquia'caen osha'cho na'su ettini jincho'choma toya'caen Na'su Chiga ettini bare'cho jincho'choma'qque itsapa anga. Toya'caen pa'cco Salomón tayopi Na'su Chiga ettinga corima ñoña'choma'qque ucca'shopa anga. 14Poiyi'cco Jerusaléni'su aindeccuma indipa poi nasundeccu, poi bove ñotssia sundarondeccu, poi ñoñasundeccu, yoshavama semasundeccuma'qque indipa anga. Nane poiyi'ccoma indipa agattosi tsu diez mil a'i. Tsa'caen angasi metssi tsu Judá andeni can'jen'chove. Tsa'ma tsa'su majan porindeccu tsu toya canjen'fa.

15Aindeccuma angapa Nabucodonosorja Judá na'su Joaquín, tise mama, tise pushendeccu, tisema shondosundeccu, Judá'su ti'tsse joccapitssia aindeccuma'qque Jerusaléne somboemba Babiloniani anga. 16Bove ñotssia sundarondeccu indiyepa ja'chondeccu tsu siete mil a'i. Poiyi'cco tsendeccu tsu quian'me geraeñe atesu'fa'chondeccu. Ñoñasundeccu toya'caen yoshavama semasundeccu indiyepa ja'chondeccu tsu mil a'i. 17Babilonia'su na'suja tsa'caen Joaquínma joqquitssiamba tise ton'ton Mataníasma Judá na'suve ccutsian. Tsa'caen tsomba tise inisema cambian Sedequíasve.

Sedequías manda'je'cho

18Sedequíasja veinte y un canqque'fave an'biamba Jerusaléni mandaye ashaemba once canqque'fave manda'je. Tise mama tsu Libna'su Jeremías onque'nge, Hamutal. 19Tsa'ma tise'qque Joacim'caen egae tsinconsi Na'su Chigaja tsama attepa chi'ga. 20Chi'gapa Na'suja Jerusalén, toya'caen Judáma iyicca'yepa tisu'ye tise'pama joqquitssian.

Currently Selected:

2 Reyes 24: con

Highlight

Compare

Copy