Joel 1
1
De Graushoppa Ploag
1Dit es de Norecht, dee de Har Joel, Petuel sien Sän, jeef.
2Horcht emol, jie elre Mana;
aul jie, dee jie en dit Launt wonen, horcht emol häa.
Es aul jeemols ea soont jeworden,
en june Tiet, ooda june Vodasch äare?
3Sajcht june Kjinja,
soo daut see äare Kjinja daut sajen,
un soo daut jane noch emol äare Kjinja daut vetalen:
4Daut, waut de Rupen nich oppjefräten haben,
haben de Graushoppa oppjefräten;
un daut waut de Graushoppa nich oppjefräten haben,
haben de Kjniepasch oppjefräten.
Un waut de Kjniepasch nich oppjefräten haben,
daut haft daut Ojjezeffa oppjefräten. #Joel 2,25
5Wakjt doch opp, jie Drinkja, un hielt!
Schriet, dee jie Wien jleichen;
de seeta Wien es junt verem Mul wajchjenomen.
6Een Schwoarm Graushoppa es en mien Launt nenjekomen,
daut es sea stoakj un jeit nich to talen.
Daut haft Tänen aus een Leiw,
un Uagtänen aus däm Leiw siene Mutta. #Joel 2,2
7Daut haft onse Wienranken begrost
un de Fiejenbeem vefräten;
Daut haft de Baust aufjeschalt un wajchjeschmäten;
doa es bloos daut kole Holt jebläwen.
8Truat, aus eene Mejal,
dee äaren Briegaum veloaren haft.
9Doa es kjeen Jeträajd un kjeen Wien,
om de Opfa em Tempel to brinjen;
de Priesta, däm Harn siene Deena, truaren. #Joel 2,14
10Onse Stapen sent kol;
de Ieed truat,
wiels daut Jeträajd nuscht brinjt.
Doa es kjeen Wien ooda Eelj.
11De Foarma lat daut schwierich,
un dee waut em Wiengoaden schaufen, hielen
äwa dän Weit un de Joascht,
wiels de Arnt gaunz vedorwen es.
12De Ranken sent vedrieecht;
de Fiejenboom litt;
de Paulmbeem, Apelbeem un Fruchtbeem,
aule Beem aulawäajen vedrieejen.
Kjeena freit sikj
mank de Menschen.
13Nämt junt Sakkjleeda om un truat,
jie Priesta, dee jie aum Aultoa deenen;
blieft de gaunze Nacht em Truakjleet,
dee jie mienen Gott deenen.
Doa es nich Jeträajd un Wien
toom en Gott sien Hus een Opfa to moaken.
14Roopt de Jemeent toop
un stalt een heiljet Fausten aun.
Lot de Leida un daut gaunze Volkj
en däm Harn junen Gott sien Hus toopkomen,
un roopt däm Harn aun. #Joel 2,15
15Däm Harn sien Dach es gaunz dicht bie.
Daut es een schrakjelja Dach;
dee, dee aule Macht haft, brinjt eenen grooten Schoden. #Jes 13,6; Joel 2,1
16Ons Äten es ons ver de Uagen wajchjenomen;
doa es kjeene Freid un scheengonen en Gott sien Hus. #5Mo 16,11
17Daut Sot vekjemt enne Ieed,
un de Spikjasch sent vejäfs;
de Stalinj vefaulen,
wiels doa kjeen Jeträajd es.
18De Kjieej schrieen vejäfs;
daut Vee es vemuckat,
wiels doa nich Weid es.
Soogoa de Schop lieden.
19 Har, ekj roop die aun,
wiels doa een Fia äwa de Weid
oppe Boaj jegonen es,
un de Beem oppe Stap vedrieecht sent. #Joel 2,3
20Soogoa de wille Tieren schrieen no die,
wiels doa noanich Wota es,
un daut Graus enne Wiltnis vebrent es. #Psa 104,10-11
Currently Selected:
Joel 1: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.