Esra 1
1
De Kjennich Kierus jeft de Aunordnunk dän Tempel to buen un erlaupt de Juden no Jerusalem to trakjen
1En Kierus, däm Kjennich von Persien, sien ieeschtet Joa, wakjt de Har Kierus sienen Jeist opp, om daut däm Harn sien Wuat en Erfellunk jinkj, waut derch Jeremia sien Mul jerät wia. Dan leet de Kjennich von Persien daut derch sien gaunzet Kjennichrikj mintlich un uk schreftlich bekaunt moaken: #Jer 25,11; 29,10 2Soo sajcht Kierus, de Kjennich von Persien: De Har, de Gott vom Himmel, haft mie aule Kjennichrikjs oppe Ieed jejäft, un dee haft mie dän Oppdrach jejäft, am en Jerusalem en Juda een Hus to buen. #Jes 45,1; 44,28 3Wäa doa mank junt to sien Volkj jehieet, dee mucht em Schutz von sienen Gott no Jerusalem en Juda trakjen un dort däm Harn, Israel äaren Gott, sien Hus buen. Wiels hee es dee Gott, dee en Jerusalem wont. 4Un wuaemma uk wäa von de Juden äwajebläwen es, däm sellen de Lied doa, wua hee aus framda jeläft haft, unjastetten met Selwa un Golt un aundre Sachen un Vee buta daut, waut see aus friewelje Gowen fa daut Gotteshus en Jerusalem jäwen.
5Dan muaken de Leida von de Volkjsgruppen ut Juda un Benjamin un de Priesta un Leviten sikj opp, aul dee, dee äaren Jeist Gott aunjespornt haud, om loostogonen un däm Harn sien Hus en Jerusalem to buen. 6Un aul dee, dee runtom an wonden, holpen an met aulahaunt, met Selwa un Golt, met Sachen un Vee un aundre wieetvolle Dinja. Un doatoo kjeemen noch de friewelje Gowen fa dän Tempel.
7Un de Kjennich Kierus jeef uk daut heilje Jereetschoft ut däm Harn sienen Tempel trigj, waut Nebukadnezar ut Jerusalem jenomen un en sien Gott sien Hus jebrocht haud. #2Chr 36,7.18 8Un Kierus, de Kjennich von Persien, äwajeef dän Schauz Vewaulta Mitredat dee. Un dee tald Scheschbazar, däm Prins von Juda, dee väa. #Esra 5,14 9Un de Zol wia: 30 Kuffels von Golt un 1.029 selwane Kuffels, 10un noch eemol 30 goldne Kuffels un 410 selwane Kuffels un 1.000 aundre Sachen. 11Aules toop wieren daut 5.400 Dinja waut von Golt un Selwa wieren. Un Scheschbazar brocht daut aula met, aus see ut de Jefangenschoft von Babel no Jerusalem trocken.
Currently Selected:
Esra 1: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.