2. Chronik 36
36
De Kjennichs Joahas, Jojakim un Jojachin
(2Kjen 23,30—24,17)
1Daut Volkj von Juda muak Joahas, Josia sien Sän, toom Kjennich en Jerusalem en sienen Voda siene Städ. 2Joahas wia 23 Joa oolt, aus hee Kjennich wort, un rejieed mau dree Moonat en Jerusalem. 3Dan sad de Kjennich Necho von Ägipten am en Jerusalem rauf, un läd daut Launt eene Taks Tolunk opp, von 100 Zentna Selwa un een Zentna Golt. 4De Kjennich Necho von Ägipten sad Eljakim, Joahas sienen Brooda, aus Kjennich äwa Juda un Jerusalem en un endad sienen Nomen om no Jojakim. Jojakim sienen Brooda Joahas neem Necho aus Jefangnen met no Ägipten. #Jer 22,10-12
5Jojakim wia 25 Joa oolt, aus hee Kjennich wort, un rejieed alf Joa en Jerusalem. Un hee deed, waut däm Harn, sienen Gott, schlajcht jefoll. 6Un de Kjennich Nebukadnezar, von Babel, kjeem jäajen am opp un neem am faust un bunk am met eene Kjäd aun, un fieed am no Babel. #Jer 22,18 7Uk eenen Deel von daut wieetvolle Jereetschoft ut däm Tempel leet hee no Babel brinjen un stald daut en sienen Paulaust en Babel opp. #Esra 1,7 8Waut oba noch mea von Jojakim to berechten es, äwa siene oppscheiselje Doten, waut hee deed, un waut met am passieed, daut steit jeschräwen em Buak von de Kjennichs von Israel un Juda. Un sien Sän Jojachin wort Kjennich en siene Städ.
9Jojachin wia 18 Joa oolt, aus hee Kjennich wort, un rejieed dree Moonat un tieen Doag en Jerusalem. Un uk hee deed waut däm Harn schlajcht jefoll. 10Aus daut Joa to Enj jinkj, leet Nebukadnezar am no Babel holen, un neem uk wada sea väl von daut wieetvolle Jereetschoft ut däm Tempel met. Un toom Kjennich äwa Juda un Jerusalem sad hee Zedekia, eenem ut Jojakim sien Frintschoft, en. #Jer 22,24-30
De Kjennich Zedekia un de Unjagank von Juda
(2Kjen 24,18—25,21; Jer 39,1-10; 52,1-27)
11Zedekia wia 21 Joa oolt, aus hee Kjennich wort; un hee rejieed alf Joa en Jerusalem. 12Un hee deed, waut däm Harn schlajcht jefoll, un deed sikj uk nich deemootjen aus de Har am derch dän Profeet Jeremia woarnd. #Jer 37,1-21; 38,14-28 13Hee muak sikj uk onaufhenjich von Nebukadnezar, däm Kjennich von Babel, däm hee bie Gott jeschwuaren haud tru to bliewen. Un hee wäad sikj uk hoatnakich un ieejensennich, om trigj no däm Harn, Israel äaren Gott, to komen. 14Uk de väaschte Mana von de Priesta un vom Volkj dreewen daut met äa ontruet Läwen däm Harn jäajenäwa emma schlemma. See läwden no de oppscheiselje Sitten von de aundre Velkja un muaken däm Harn sienen Tempel orrein, däm de Har en Jerusalem fa sikj jeweit haud. #5Mo 18,9 15De Har, äare Vodasch äa Gott, leet an emma wada derch siene Deena woarnen, wiels hee Metleet met sien Volkj un siene Woninj haud. #Jer 25,4 16Oba see muaken sikj äwa Gott siene Deena lostich, un veachten siene Wieed un spotten äwa siene Profeeten, bat däm Harn sien Oaja äwa sien Volkj soo groot wort, daut et kjeene Radunk mea jeef. #Luk 20,10-12; Apost 7,52 17Dan leet de Har däm Chaldäa Kjennich jäajen an komen, un leet äare junge Kjrieja met Schwieed doot schlonen, de latste biem Kaumf em Heilichtum. Nebukadnezar veschoond kjeenem, nich Junges uk nich Mejales, uk nich de oole un schwake. De Har jeef an aula en siene Jewault. 18Un Nebukadnezar leet uk aul daut Tempel Jereetschoft, daut groote uk daut kjliene, uk daut Tempelkaptol un däm Kjennich un siene Rejierungsmana äa Kaptol, no Babel brinjen. 19See vebrenden uk daut Gotteshus un reeten de Stautsmieren von Jerusalem dol, un schmeeten en aule prachtvolle Hiesa Fia nenn, soo daut aul daut wieetvolle Jereetschoft venicht wort. #Jer 26,6 20De latste Enwona, waut däm Kaumf äwaläft hauden, leet Nebukadnezar no Babel wajchbrinjen. Dort musten see am un siene Nokomen aus Sklowen deenen, bat de Persa äa Kjennichrikj de Äwamacht kjrieech. 21Doamet jinkj daut en Erfellunk, waut de Har derch dän Profeet Jeremia jesajcht haud: Daut Launt saul 70 Joa vewillat ligjen, bat aule Sabat Joaren nojeholt sent, waut Israel nich jehoolen haft. #3Mo 26,34; Jer 25,11; Kloag 2,6
Daut Enj von de babelonische Jefangenschoft
(Esra 1,1-3a)
22Oba en daut ieeschte Rejierungsjoa von däm Persa Kjennich Kierus jinkj daut en Erfellunk, waut de Har derch dän Profeet Jeremia jesajcht haud. De Har jeef Kierus, dän Kjennich von Persien daut en sienen Jeist nenn, daut hee en sien gaunzet Kjennichrikj sajen un uk schreftlich bekauntmoaken leet: #(22 un 23) Jer 29,10; Jes 44,28 23Soo sajcht Kierus, de Kjennich von Persien: De Har, de Gott em Himmel, haft aule Kjennichrikjs oppe Ieed en miene Jewault jejäft un haft mie dän Oppdrach jejäft, am en Jerusalem en Juda eenen Tempel to buen. Wäa mank junt to sien Volkj jehieet, met däm es de Har, sien Gott! Dee doaf trigjtrakjen!
Currently Selected:
2. Chronik 36: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.