Daut Leet 1
1
1Daut scheenste Leet von Salomo
Daut ieeschte Leet
See
2Wan hee mie doch met sien Mul kussen wudd.
Diene Leew es mie scheena aus Wien;
3du best enjeschmäat, un rikjst sea scheen.
Dien Nomen es soo sea beleeft,
aus daut Jeroch von vegotne Saulw;
doawäajen mäajen de Mejales die.
4Nemm du mie met, well wie ranen.
Ekj iea am aus mien Kjennich,
un hee neem mie no sien Tus;
daut jeit mie sea scheen,
un ekj frei mie soo sea to die.
Wan ekj denkj aun woo goot du mie best,
dan bruck ekj kjeen Wien toom mie woamen.
Die goot sennen es aulem leicht.
5Jie Mejales von Jerusalem,
miene Hut es brun un doch straum;
dee es dunkel aus de Zelten en Kedar,
un soo schmock aus de Dakjen en Salomo sien Tempel.
6Kjikjt nich rauf opp mie, daut ekj soo dunkel sie.
Miene Mutta äare Säns wieren mie bossich,
see schekjten mie em Wiengoaden woaken,
un soo woakt ekj nich en mienen Goaden,
nu sie ekj von de Sonn enjebrent.
7Saj mie, mien scheensta,
wua deist du diene Häad vondoag weiden?
Wua woa jie junt opp Meddach dol lajen?
Ekj well nich bie diene Frind äare Häaden
romgonen, aus wan ekj nich weet waut ekj well.
Wuarom sull ekj mie domm feelen, wan ekj
bie aundre äare Häaden no die sieekj?
Hee
8Weetst du noch nich wua, du schmokste?
Weid diene junge Kosen,
wua de Schop jegonen sent,
nich wiet von de Hoads äare Zelten.
9Miene scheenste, mie lat et die krakjt soo schmock,
aus de Kobbel aum ägiptischen Kjennich sien Woagen.
10Diene Baken sent schmock en de Krolkjes,
un Kralen aum Haulsbaunt sent dach.
11Ekj moak die een Haulsbaunt von Golt,
wua noch selwane Städen bennen sent.
See
12Mien Parfum wia nu wiet goot to rikjen,
un mien Kjennich wia doa oppe Benkj.
13Mien scheensta es mie aun de Brost
aus een Pakje von Mirren, soo scheen;
14aus de Bloomen dee dort en En Gedi
emma steil en de Wiengoades stonen.
Hee
15Oba die lat et soo schmock,
miene scheenste, die lat et soo schmock,
diene Uagen sent saunft aus ne Duw.
See
16Ach mien Schauz, daut best du
dee mie schmock lat, opp iernst sea schmock.
Dise Städ es soo scheen dunkel jreen,
17un de Zeedaboom moakt ons daut Dak,
un daut Loof von Ziepressen de Waunt.
Currently Selected:
Daut Leet 1: PB
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.