Rut 4
4
De Har säajent Noomi, Rut, un Boas
1Boas jinkj dän Morjen un sad sikj opp däm jeweeneljen Vesaumlungsplauz met de aundre Mana bie daut Stautspuat dol. Dan kjeem dee, von wäm Boas ea jerät haud, dee de ieeschte Fliet haud fa Rut opptokomen. Boas roopt am un säd: Komm sat die hia dicht bie ons dol. Dee kjeem uk fuaz un sad sikj dol. 2Dan kroagd Boas tieen von de Stautsvodasch, daut see sikj dicht bie an dol saden. Aus aule sikj hanjesat hauden 3säd Boas to däm Maun, dee sien Frintschoft wia: Nu daut Noomi von Moab trigjekomen es, well see Elimelech, dee ons Frintschoft es, sien Flekj vekjeepen. 4Ekj docht mau du sust daut weeten, daut du däm hia ver aul dise Stautsvodasch kjeepen kust, wan du west. Du best daut ieeschte, waut en de Famielje aun de Rieej es dän to kjeepen. Ekj well mau weeten auf du dän west, wiels wan nich, dan sie ekj daut näakjste aun de Rieej. Jana säd: Ekj woa dän kjeepen. #3Mo 25,25; Jer 32,6-10 5Dan säd Boas: Wan du daut Flekj von Noomi kjafst, dan nemst du die uk äwa, daut du fa Rut, de moabitische Wätfru von Noomi äa vestorwna Sän, oppkomen woascht un ar eenen Sän jäwen woascht, dee dit Flekj kjrieen woat. #5Mo 25,5-6 6Dan säd jana: En däm Faul, lot ekj mie daut rajcht vebie gonen. Wan dit Flekj dan nich en miene Famielje blift, dan saj ekj to die, kjeep däm. Soo kaun ekj dän nich kjeepen. 7-8Aus hee to Boas soo säd, Kjeep däm, dan neem hee siene Schoo auf un jeef Boas dee. Frieejoa wan eena en Israel een Haundel muak ooda sien Rajcht aufjeef, jeef dee wäa waut aufjeef, siene Schoo no däm, dee daut neem. Dan wist jieda eena daut de Haundel foadich wia. 9Un Boas säd to de Stautsvodasch un aule waut doa wieren: Jie sent vondoag Zeijen daut ekj aul daut Launt, waut Elimelech, Kiljon un Machlon jehieed, von Noomi jekoft hab. 10Ekj hab uk Rut, de moabitische Fru, dee Machlon siene Fru wia, aus miene Fru nenjenomen om dän Famielje Nomen wieda to droagen met daut Launt. Wie wellen Elimelech sienen Nomen en onse Famielje un en dise Staut nich utstoawen loten. Jie aula sent vondoag Zeijen. 11Un de Vodasch un aule waut doa toohorchten säden: Wie sent Zeijen. Mucht de Har Jnod jäwen, daut diene Fru kunn soo sennen aus Rahel un Lea, derch woone daut gaunze Israel aufstaumen. Wie wenschen die, daut du en Efrata goot buaren kust, un en Betlehem goot aunjeseenen woascht sennen. 12Muchten de Nokomen, dee du von dise junge Fru kjrichst, soo sennen aus de Famielje von Perez, Juda un Tamar äa Sän. #1Mo 38,29
13Doamet neem Boas Rut no Hus un see wia siene Fru. De Har jeef sienen Säajen doatoo, daut see schwanga wort un eenen Sän kjrieejen. 14De Nobafrues säden dan to Noomi: Wie preisen däm Harn, daut hee die nich onen Nokomen jeloten haft. Mucht hee en gaunz Israel aunjeseenen sennen. 15Diene Schwieedochta, dee die soo goot es, es die nu mea wieet aus säwen Säns. Dee haft die nu een Grootsän jejäft, dee die nieet Läwen jeft, un dee en diene elre Joaren fa die oppkomen woat. 16Noomi neem daut Kjint oppe Schoot un fläajd daut. 17De Räd mank de Nobafrues wia, daut Noomi eenen Sän haud. See jeewen am dän Nomen Obed. Obed wort de Voda to Isai, un Grootvoda to David. #Mat 1,5-6; Luk 3,32 18-22Dee waut von Perez no de Rieej bat David aufstaumen, sent, Perez, Hezron, Ram, Aminadab, Nachschon, Salmon, Boas, Obed, Isai, un David.
Currently Selected:
Rut 4: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.