Rut 2
2
Rut finjt wäm, dee fa ar oppkjemt
1Noomi haud eenem em Frintschoft en dee Jäajent, dee heet Boas. Dee wia Frintschoft met Noomi äa Maun, Elimelech, un dee wia goot auf. 2Een Dach säd Rut, de Moabitafru, to äare Schwieemutta: Lot mie oppem Flekj gonen, Jeträajd toopläsen. Ekj woa aul wäm finjen, dee mie daut lat. Un Noomi säd: Jo, miene Dochta, go. 3Rut jinkj un saumeld hinja dee waut doa arnten. Nu troff sikj daut soo, daut dit opp däm Boas sien Flekj wia, dee waut doa en Elimelech sien Frintschoft wia. 4Un weetst, doaräwa kjeem Boas von de Staut, von Betlehem, un bejreest siene Oabeida met däm Gruss: Mucht de Har met junt sennen! Mucht de Har die säajnen! auntwuaden de Oabeida. #Rut 1,2 5Un Boas fruach däm, waut äwa siene Oabeida aunjestalt wia: Wäm siene Dochta es dise junge Fru? 6Un dee säd: Dit es de moabitische Fru, dee met Noomi toop von Moab jekomen es. 7See kjeem un fruach auf see hinja de Schnieda durf tweschen de Goawen toopläsen. Dee haft von zemorjes aun eendrajchtich jeschauft, buta daut see sikj een stootje unja ons Dak vepusten deed. 8Un Boas säd to Rut: Horch emol häa, junge Fru. Go nich opp aundre Flekja toom oppläsen. Bliew hia opp dit Flekj, un hool die emma een bät dicht bie de Frulied, waut hia fa mie schaufen. 9Paus een bät opp wua miene Schniedasch schaufen, un dan blifst dicht bie de Frulied, waut no de Schniedasch oabeiden. De Mana hab ekj aul jesajcht, daut see die sellen tochloten. Un wan die darschten deit, dan drinkj von de Wotakrucken, dee miene Mana jebrocht haben. 10Doaropp kjneed Rut, met äaren Stiern gaunz bat oppe Ieed, un säd: Wuarom best du soo goot to mie? Ekj sie doch eene Framde. #Rut 1,16-17 11Un Boas säd: De Lied haben mie jesajcht, waut du aules fa diene Schwieemutta jedonen hast no däm daut dien Maun storf. Woo du dienen Voda un Mutta en daut Launt, waut die tus wia, veloten hast, un best no een Volkj jekomen, daut du verhäa nich kjansd. 12Mucht de Har die daut loten goot utkomen, wäajen waut du jedonen hast. Mucht de Har, Israel äa Gott, die rikjlich beloonen, nu daut du bie am unjare Flichten Schutz sieekjst. #Psa 36,8 13Un Rut säd: Dit es mie oba groosoatich väl wieet. Du hast mie jetreest, doamet daut du soo leeftolich to mie räden deetst. Ekj sie nich emol dien Oabeida. 14Lota aus daut Tiet toom äten wia, säd Boas to Rut: Komm häa un at von ons Broot. Aus see sikj haud biejesat, säd hee: Duck dien Biet mau en dit Zopsel en. Hee jeef ar dan uk von de jereeschte Kjieena. See eet sikj scheen saut un haud uk noch waut äwajehoolen, daut see no Hus neem. 15Aus see aula trigj no de Oabeit jinjen, säd Boas to siene Mana: Lot ar uk mank de Goawen toopläsen, un lot ar nuscht doawäajen hieren. 16Lot eefach han un wada een Wesch biesied ligjen, daut see daut kaun oppläsen, un sajcht nuscht doawäajen. #3Mo 19,9-10
17Rut schauft don bat däm Owent, un aus see daut latste utjeklopt haud, haud see bie tieen Kilo Joascht.
18Doamet jinkj see dan no de Staut, un wees äare Schwieemutta, waut see toopjeläst haud. Dan jeef see ar uk daut Äten, waut doa äwajebläwen wia nom äten. 19Dan fruach Noomi ar: Wua deetst du vondoag toopläsen? Wäm sien Flekj wia daut? Mucht deejanja een Säajen kjrieen, dee die daut jeloten haft. Un Rut säd: Ekj wia opp Boas sien Flekj. 20Dan säd Noomi: Nu see ekj, daut däm Harn siene truhoatje Leew nich oppjehieet haft, nich fa de Läwendje un uk nich de Vestorwne. Mucht de Har däm Boas säajnen. Oba weetst du waut, meend see dan noch, Boas es em Frintschoft met ons. Hee es eena von dee, dee ons nom Jesaz no methalpen sull. #Rut 4,4 21Rut säd: Hee säd uk, daut ekj sull met siene Oabeida bliewen bat de gaunze Arnt nenn jebrocht es. 22Un Noomi säd to Rut, äare Schwieedochta: Daut es goot, miene Dochta, daut du dicht bie de Frulied opp sien Flekj blifst. Opp aundre Flekja kunnen see die daut met eemol schwoa moaken. 23Rut deed daut dan soo. See bleef fa de gaunze Joascht un Weit Arnt emma dicht bie de Frulied, dee fa Boas oabeiden. Un see wond met äare Schwieemutta.
Currently Selected:
Rut 2: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.