Openboarunk 2
2
No Efesus: Velot de ieeschte Leew nich
1No dän Enjel von de Jemeent en Efesus schriew: Dit sajcht dee, dee de säwen Stierns en siene rajchte Haunt helt, un medden mank de säwen goldne Laumpenhoola jeit: #Apost 18,19 2Ekj weet om diene Woakjen, diene Oabeit un diene Jedult, un daut du de veleidende Menschen nich vedroagen kaust. Du hast dee utjeprooft, dee doa väajäwen Apostel to sennen, dee daut oba nich sent, un hast utjefungen, daut daut Lieeja sent. #1Joh 4,1 3Du hast jeduldich utjehoolen un best nich meed jeworden, om mienen Nomen sient haulwen to oabeiden. 4Oba ekj hab dit jäajen die, daut du von diene ieeschte Leew aufjekomen best. #1Tim 5,12 5Denkj doaraun, wuavon du jefollen best, kjia om un doo wada, waut du aum Aunfank deetst. Wan du nich omkjieren woascht, woa ekj komen, un dien Laumpenhoola von siene Städ wajchnämen. 6Oba dit hast du, daut du de Nikolaiten äare Woakjen nich lieden kaust, dee ekj uk nich lieden kaun. #Psa 139,21 7Wäa Uaren haft, däm lot hieren, waut de Jeist de Jemeenten sajcht! Dän Jewenna woa ekj vom Läwensboom to äten jäwen, dee medden en Gott sien Paradies steit. #1Mo 2,9; Opb 22,2
No Smierna: Bliew tru, bat em Doot
8Un no dän Enjel von de Jemeent en Smierna schriew: Dit sajcht de Ieeschta un de Latsta, dee doot wia, un toom Läwen jekomen es. #Opb 1,11.18 9Ekj weet om diene Woakjen, dienen Truastaunt un diene Oamoot – un doch best du rikj – ekj weet, om dee äa Jelasta, dee doa väajäwen Juden to sennen, un daut nich sent, oba eene Sotonsschool sent. #Jak 2,5; Opb 3,9 10Fercht die fa nuscht, waut du em korten woascht lieden motten! Seet mau, de beesa Fient woat eenje von junt faustnämen loten, junt opp de Proow to stalen, un jie woaren tieen Doag lieden motten. Bliew tru bat em Doot, dan woa ekj die de Läwenskroon jäwen. #Mat 10,19.28; 2Tim 4,8; Opb 3,11 11Wäa Uaren haft, däm lot hieren, waut de Jeist de Jemeenten sajcht! De Jewenna kaun derch dän tweeden Doot nich Schoden lieden. #Opb 20,14
No Pergamon: Sikj nich met de Welt aufjäwen
12No dän Enjel von de Jemeent en Pergamon schriew: Dit sajcht dee, dee daut schoape dobbelt schniedende Schwieet haft: #Heb 4,12 13Ekj weet, wua du wonst: doa wua Soton sienen Troon haft; un daut du aun mienen Nomen fausthelst un dien Gloowen aun mie nich veluachst, en dee Tiet aus Antipas, mien trua Zeichnisjäwa, tru bleef, dee bie junt dootjemoakt wort, doa wua de Soton wont. 14Ekj hab oba doch waut jäajen die, wiels du doa soone hast, dee aun Bieleam siene Lia fausthoolen, dee dän Balak lieed Israel veleiden to sindjen, Aufjettaopfa to äten un Huararie to driewen. #4Mo 31,16; 2Pet 2,15; Jud 1,11 15Un soo hast du doa uk soone, dee aun de Nikolaitische Lia hoolen, dee ekj nich lieden kaun. 16Kjieet om, sest woa ekj met eemol doa sennen un met daut Schwieet ut mien Mul jäajen an kjriejen. 17Wäa Uaren haft, däm lot hieren, waut de Jeist de Jemeenten sajcht! De Jewenna woa ekj von daut vestoakne Mauna to äten jäwen. Un däm woa ekj uk een witten Steen jäwen, un opp dän Steen een nieen Nomen jeschräwen, dän sest kjeena läsen kaun aus dee, dee dän kjricht. #Psa 78,24; Jes 62,2
Aun Tiatira: Unjasieekj sorjfeltich jieda Jeist
18Un no dän Enjel von de Jemeent en Tiatira schriew: Dit sajcht de Gottes Sän, dee Uagen haft aus eene Fiaflaum, un Feet aus blanket Messinkj: #Apost 16,14; Opb 1,14-15 19Ekj weet om diene Woakjen, diene Leew, dien Deenst, dien Gloowen un diene Jedult, un daut du emma mea aunfangst to doonen. 20Oba doch hab ekj dit jäajen die, daut du daut Wief Isebel, dee sikj eene Profeetin nant, lieren latst, un miene Deena veleiden latst, Huararie to driewen un Aufjettaopfa to äten. #2Kjen 9,22 21Ekj hab äa Tiet jejäft omtokjieren un äare Huararie to loten, oba see kjieed nich om. 22Oba ekj woa ar en een Krankenbad lajen, un groote lieden äwa dee brinjen, dee met äa Ehebruch jedräwen haben, wan see nich omkjieren un äare Wäaj endren. 23Un ekj woa uk äare Kjinja met däm Doot bestrofen. Un de Jemeenten sellen aula weeten, daut ekj dee sie, dee doa weet, wuamet daut Hoat un de Jedanken sikj beschaftjen, un woa een jiedrem von junt jäwen, waut june Woakjen vedeent haben. #Psa 7,10; Jer 17,10 24Oba ekj saj to junt un to de äwaje en Tiatira un wäaemma dise Lia nich aunnemt, un wäa sikj nich bat opp dän Grunt met däm Soton aufjejäft haft: Junt woa ekj kjeene aundre Laust opplajen. 25Hoolt daut faust, waut jie haben, bat ekj komen woa. #Opb 3,11 26Un de jewennende, dee bat aum Enj mienen Wellen doonen, woa ekj Volmacht äwa de Velkja jäwen. 27Dee sellen met eene Iesastang äwa an harschen, un soo aus een Leemtopp to Bieta schlonen, soo aus mie daut von mienem Voda jejäft es, #Psa 2,8-9 28un ekj woa an dän Morjenstiern jäwen. 29Wäa Uaren haft, däm lot hieren, waut de Jeist de Jemeenten sajcht.
Currently Selected:
Openboarunk 2: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.