Openboarunk 18

Daut groote Babel es jefollen

1No dit sach ekj noch een Enjel vom Himmel rauf komen, dee haud grootet Machtrajcht, un een harlicha Glaunz wuavon daut opp de Ieed dach wort. #Hes 43,2 2Un dee schrieech met eene jewaultje Stemm: Babel, dee groote Staut, es jefollen, es jefollen. Dee es eene Behusunk fa de beese Jeista jeworden, un eene Woninj fa aule orreine Jeista, un eene Woninj voll aule orreine Väajel de eena nich lieden kaun. #Jer 50,39; Opb 14,8 3Wiels de Velkja haben aula von äaren jlieejenden Huarenwien jedrunken. #18,3 Eenje oole Schreften sajen sent aula von äaren jlieejenden Huarenwien jefollen. Un de Kjennichs opp de Ieed haben met ar Huararie jedräwen. Un de Haundelslied opp de Ieed sent derch äare onbejrenste Jia no Luksus rikj jeworden. #Jer 51,7; Nah 3,4

4Un ekj hieed noch eene Stemm vom Himmel sajen: Mien Volkj, got ut ar rut, daut jie nich met ar toop sindjen, un äare Ploagen uk äwa junt komen! #Jes 48,20; Jer 50,8; 51,6.45; 2Kor 6,17 5Wiels äare Sinden rieekjen bat aum Himmel, un Gott haft äare vebräakjarische Woakjen nich vejäten. #1Mo 18,20-21; Jer 51,9 6Tol ar trigj, waut see junt aunjedonen haft. Tol ar dobbelt trigj fa daut waut see jedonen haft. Un waut see junt em Kuffel nenn jerieet haud, daut jäft ar tweemol soo stoakj trigj. #Psa 137,8; Jer 50,15.29; 2Tess 1,6 7Un doano aus see sikj selfst veharlijd un en Luksus un Jemietlichkjeit jeläft haft, sat ar nu Kwol un Trua too! Wiels see sajcht sikj em Hoaten: Ekj sett aus Kjennichsche un sie nich eene Wätfru, un woa kjeene Trua seenen. #(7 un 8) Jes 47,7-9 8Doawäajen woaren aul äare Ploagen en eenen Dach komen, Doot un Trua un Hunga, un see woat met Fia vebrent woaren, wiels Gott de Har, dee ar rechten woat, es stoakj.

De Welt betruat Babel äaa Faul

9Un dee Kjennichs opp de Ieed, dee met ar Huararie jedräwen, un met ar toop huachhäa jeläft haben, woaren ar behielen un bekloagen, wan see dän Ruak von äaren Braunt seenen woaren. 10See woaren ut Forcht fa äare Kwol wiet auf stonen un sajen: Too schod, too schod, de groote Staut Babel, dee stoakje Staut! Dien Jerecht es en eene Stund jekomen! #Jer 51,8 11Un de Haundelslied oppe Ieed woaren äwa ar hielen un kloagen, daut kjeena mea äare Woa kjeepen deit, 12soone Woa aus Golt, Selwa, diere Steena un Parlen, feinet Lienzeich, bleiwroodet Zeich, Sied un blootroodet Zeich, aulahaunt Zitroonenholt, un veschiedne Sachen von Aulfenbeen jemoakt, dieret Holt, Messinkj, Iesa un Marmor, 13Kerneel, Kjriedarie, Weiruak, Mirren, Ruakstoff, Wien un Eelj, fienet Mäl un Weit, un Vee un Schop un Pieed un Woages, un Menschen met Kjarpa un Seel.

14Un daut Oft, daut du soo jieren haben muchst es nich mea to haben. Aul dien Rikjtum un Harlichkjeit es veschwungen, nie mea trigjtokomen. 15De Hendla, dee dise Sachen vekoften un doaderch rikj worden, stonen nu ut Forcht fa äare Kwol, wiet auf un hielen un kloagen 16un sajen: Too schod, too schod, dise groote Staut, dee bleiwroot un blootroot met dieret Lienzeich jekjleet wia, un met Golt un diere Steena un Parlen jlitzad. #Opb 17,4 17Wiels en eene Stund es soon groota Rikjtum to nuscht jeworden! Un aule Scheppmeista, un dee opp de Schäp reisen, un Seemana, un dee äa Läwen oppem Mäa moaken, woaren wiet auf stonen. #(17-19) Hes 27,27-36 18Wan dee dän Ruak von äaren Braunt seenen woaren, woaren dee schrieen: Wäa es met dise groote Staut to vejlikjen? 19See schmeeten sikj Stoff opp däm Kopp un schrieejen, hielden un kloagden un säden: Too schod, too schod, dee groote Staut, wua aul dee, dee doa Schäp oppem Mäa hauden, derch äare Woa rikj jeworden sent. Wiels dee es en eene Stund to Grunt jegonen.

20Frei die äwa ar, oo Himmel! Freit junt, jie heilje un Apostel un Profeeten! Gott haft ar om junt haulwen jerecht. #Jer 51,48

Babel woat gaunz en de Grunt jebrocht

21Dan neem een jewaultja Enjel een Steen, soo groot aus een groota Molsteen, un schmeet dän em Mäa un säd: Met soone Jewault woat de groote Staut Babel rauf jeschmäten woaren, daut dee nie mea woat to finjen sennen. #Jer 51,63-64 22Un de Sinja un Seidenspäla un Fleetenspäla un Trompeeten äare Stemmen sellen en die nich mea to hieren sennen. En die saul uk kjeen Hauntoabeida ut irjent een Hauntwoakj mea to finjen sennen. Un eena woat en die uk nich mea de Molsteena rublen hieren. #Jes 24,8; Hes 26,13 23En die woat uk kjeen Laumpenlicht mea schienen. En die woat uk niemols mea dän Briegaum un de Brut äare Stemm to hieren sennen. Diene Haundelslied wieren de groote Mana en de Welt, wiels derch diene Zaubarie sent aule Velkja veleit worden. #Jer 25,10; Jes 23,8 24En die wort de Profeeten un heilje äa Bloot jefungen, un uk aul dee äat, dee oppe Ieed sent dootjemoakt worden. #Opb 6,10; 17,6

Currently Selected:

Openboarunk 18: PB

Highlight

Copy

Compare