Openboarunk 16

De Kommen voll Gott sien Oaja

1Dan hieed ekj eene lude Stemm von em Tempel to de säwen Enjel sajen: Got un jeet de säwen Kommen met Gott sien Oaja ut opp de Ieed!

Ieeschte Kommvoll: Schrakjlich kwolvolle Schwäaren

2Un de ieeschta Enjel jinkj un goot siene Kommvoll opp de Ieed; un dee Menschen, dee daut Tia sien Tieekjen hauden un sien Bilt aunbäden, worden voll fule, stenkjaje Schwäaren. #2Mo 9,10-11

Tweede Kommvoll: Daut Mäa woat Bloot

3Dan goot de tweeda Enjel siene Kommvoll opp daut Mäa, un daut wort soo aus een doodjen Mensch sien Bloot, un aules waut em Mäa läwd jinkj doot.

Dredde Kommvoll: Wotastreem un Kjwalen woaren Bloot

4Dan goot de dredda Enjel siene Kommvoll opp de Wotastreem un Wotakjwalen, un dee worden Bloot. #2Mo 7,17-21 5Un ekj hieed dän Enjel, dee äwa aule Wota to jebeeden haft, sajen: Oo Har, du Heilja, dee du best un dee du wieescht, du best jerajcht, daut du soo jerecht hast. 6Wiels see haben de heilje un de Profeeten äa Bloot vegoten, un du hast an Bloot to drinkjen jejäft, soo aus see vedeent haben. 7Un ekj hieed wäm vom Aultoa sajen: Jo Har, aulmajchtja Gott, diene Jerechten sent woarhauftich un jerajcht. #Opb 6,9-10; 9,13

Vieede Kommvoll: De Sonn schmitt senjende Hett

8Un de vieeda Enjel goot siene Kommvoll en de Sonn nenn, un am wort daut jejäft, de Menschen met Fia to brennen. 9Un de Menschen vesenjden von de groote Hett, un see lastaden Gott sien Nomen, dee de Macht haud de Ploagen to schekjen, un see kjieeden nich om, am de Iea to jäwen.

Fefte Kommvoll: Diesta un bietende Weedoag

10Dan goot de fefta Enjel siene Kommvoll opp daut Tia sien Troon nopp, un sien Kjennichrikj wort diesta, un Menschen beeten sikj en Weedoag de Tungen twei 11un lastaden Gott em Himmel wäajen äare Weedoag un äare Schwäaren un bekjieeden sikj nich von äare Woakjen.

Saste Kommvoll: De Eufrat Stroom drieecht ut

12Dan goot de sasta Enjel siene Kommvoll opp dän grooten Wotastroom Eufrat, un dee drieejd ut, daut de Wajch fa de Kjennichs vom Oosten reedjemoakt wort. #Jes 11,15-16 13Un ekj sach ut dän Droak sien Mul, un ut daut Tia sien Mul, un ut dän faulschen Profeet sien Mul dree orreine, Poggenänelje Jeista komen; #Opb 12,3 14wiels daut sent beese Jeista un doonen Wunda, un gonen no de Kjennichs opp de Ieed äwa de gaunze Welt, dee to dän aulmajchtjen Gott sien grooten Dach toom Kjrich to saumlen. 15Kjikjt, ekj kom soo aus een Stäla. Seelich es, wäa doa woakt un siene Kjleeda aunhaft, daut hee sikj nich schämen brukt wan aundre am seenen. #1Tess 5,2 16Un see saumelden dee opp dän Plauz toop, dee opp hebräisch Harmagedon heet.

Säwende Kommvoll: De gaunze Ieedbäben scheddat

17Dan goot de säwenda Enjel siene Kommvoll en de Loft nenn. Dan kjeem eene lude Stemm vom Troon ut däm Tempel em Himmel un säd: Daut es jedonen! 18Un daut blizt un kracht un rummeld. Un doa wia een grootet Ieedbäben, soo groot aus daut noch nienich jewast es, soolang aus Menschen opp de Ieed jewast sent. 19Un de groote Staut deeld sikj en dree Deel, un de Velkja äare Städa follen. Un Gott docht aun daut groote Babel, ar daut Kuffel Wien voll sienen grollenden Oaja to jäwen. #Opb 14,8-10 20Dan veschwungen aule Inseln, un de Boaj wieren uk nich mea to finjen. #Opb 6,14 21Dan follen groote 100 pundje Hoagelstekja vom Himmel opp de Menschen. Un de Menschen lastaden Gott wäajen de Hoagelploag, wiels de Ploag soo sea groot wia. #2Mo 9,23

Currently Selected:

Openboarunk 16: PB

Highlight

Copy

Compare