Openboarunk 13

Daut Tia von em Mäa

1Dan stunt ekj opp däm Saunt aum Mäa un sach een Tia ut daut Mäa rut stieen, daut haud säwen Kjap un tieen Hieena. Un opp siene tieen Hieena haud daut tieen Kroonen, un opp siene Kjap lastaliche Nomen. #Dan 7,3-7 2Daut Tia daut ekj sach, likjend een Leopard, oba haud Feet aus een Boa un een Mul aus een Leiw. Un de Droak jeef am siene Krauft, sienen Troon un siene groote Macht. 3Ekj sach, daut eent von siene Kjap eene Doodeswund jekjräajen haud, oba de Doodeswund wia wada jeheelt. Un de gaunze Ieedboddem wundad sikj äwa daut Tia, 4un see bäden dän Droak aun, dee daut Tia de Macht jeef, un bäden uk daut Tia aun un säden: Wäa kaun sikj däm Tia jlikjstalen? Un wäa kaun jäajen am kjriejen? 5Un am wort een Mul jejäft, groote Dinja un Lastrungen to räden, un am wort Macht jejäft, daut 42 Moonat to doonen. #Opb 11,2 6Dan muak hee sien Mul lastrent jäajen Gott op, sienen Nomen, siene Woninj un uk dee em Himmel wonende to lastren. 7Un am wort daut jejäft, jäajen de heilje to kjriejen, un uk jäajen an to jewennen. #13,7 De oole Schreften haben nich aula Un am wort daut jejäft, jäajen de heilje to kjriejen, un uk jäajen an to jewennen. Un am wort Macht jejäft, äwa aule Volkjsstam un Sproaken un Velkja. #Dan 7,21; Opb 11,7 8Un dee oppe Ieed wonen, woaren am aula aunbäden; daut sent aul dee, dän äare Nomes nich en daut jeschlachte Laum sien Läwensbuak jeschräwen sent. 9Wäa Uaren haft, däm lot hieren! 10Wäa faustjenomen woaren saul, woat faustjenomen. Wäa met däm Schwieet doot jemoakt woaren saul, woat met däm Schwieet doot jemoakt. Hia es de heilje äare Jedult un äa Gloowen! #1Mo 9,6; Mat 26,52; Opb 14,12

Daut Tia vom Launt

11Un ekj sach een aundret Tia ut de Ieed rut komen, daut haud twee soone Hieena aus een Laum, un räd soo aus een Droak. 12Un daut eeft daut ieeschte Tia siene Macht aula ver am ut, un brinjt de Ieed un dee doabowen wonen bat doa, daut ieeschte Tia met de jeheelde Doodeswund auntobäden, 13un deit groote Wundatieekjen, moakt soogoa fa de Menschen to seenen, Fia vom Himmel opp de Ieed faulen. #Mat 24,24; 2Tess 2,9 14Un wiels am daut wia jejäft worden, ver daut Tia Tieekjens to doonen, veleid hee doaderch aule dee opp de Ieed wonen, un befool de Ieedbewona een Bilt to moaken, daut Tia to ieren, daut met däm Schwieet wia vewunt worden un oba doch läwd. 15Un am wort daut jejäft, en daut Bilt vom ieeschten Tia, Läwen nenn to jäwen, daut et räden kunn, un daut et uk aul dee, dee daut Tiabilt nich aunbäden wudden, doot moaken kunn. 16Un hee brocht daut uk bat doa, daut beid, kjlien un groot, rikj un oam, frie ooda veskloft, een Tieekjen opp de rajchte Haunt ooda aum Stiern jejäft wort, #Opb 19,20 17un daut kjeena kjeepen ooda vekjeepen kaun, dee nich daut Tieekjen, ooda daut Tia sien Nomen haft, ooda de Zol, dee fa sien Nomen steit. 18Dit foddat Weisheit! Wäa daut vestonen kaun, däm lot daut Tia sien Numma tooptalen, wiels daut es eene menschliche Numma. De Numma es 666. #13,18 Eenje oole Schreften sajen 616. #Opb 15,2

Currently Selected:

Openboarunk 13: PB

Highlight

Copy

Compare