Markus 11

Jesus kjemt no Jerusalem

(Mat 21,1-11; Luk 19,28-40; Joh 12,12-19)

1Aus see nu noda no Jerusalem kjeemen, no Betfage un Betanien aum Oliewen Boajch, schekjt hee twee von siene Jinja 2un säd to an: Got no daut Darp daut ver junt licht, un jrod wua jie doa nengonen, woa jie een Falm aunjebungen finjen, wua noch kjeena bowen jeräden haft; leest daut loos un brinjt daut häa! 3Wan junt irjentwäa frajcht, wuarom jie daut doonen, sajcht am: De Har well daut brucken un woat daut boolt wada trigj schekjen. 4See jinjen un fungen een Falm, buten opp de Gaus aum Däarenpost aunjebungen, un leesden daut loos. 5Von de Menschen, dee doa stunden, säden eenje: Waut doo jie doa, daut jie daut Falm loosleesen? 6See säden an, waut Jesus an befolen haud, un dee leeten an gonen. 7Aus see daut no Jesus brochten, spreeden see äare Kjleeda äwa daut Falm, un Jesus sad sikj doa nopp. 8Väl Menschen spreeden äare Kjleeda opp däm Wajch, aundre hakten blädaje Asta von de Beem, un spreeden dee uk opp däm Wajch. 9Dee doa veropp jinjen uk dee doa hinjaraun kjeemen, schrieejen:

Hosiana! Jesäajent es dee, dee em Harn sienen Nomen kjemt! #Psa 118,25-26

10Lot onsen Voda David sien Rikj,

daut em Harn sienen Nomen kjemt,

jesäajent sennen! Halp du Hechsta ons!

11Jesus jinkj en Jerusalem nenn, un jinkj nom Tempel. Hee kjikjt sikj aules aun, un wiels daut aul lot wia, jinkj hee met siene Twalw no Betanien.

Israel – een Fiejenboom onen Frucht

(Mat 21,18-19)

12Aus see dän näakjsten Dach Betanien veleeten, wia Jesus hungrich. 13Hee sach von wiet auf eenen Fiejenboom met Bläda stonen un jinkj han to seenen auf dee Frucht haud. Aus hee han kjeem, funk hee sest nuscht aus Bläda; wiels de Fiejen äare Tiet wia noch nich doa. 14Dan säd hee to dän Boom: Mucht kjeena mea von die Frucht äten! Un siene Jinja hieeden waut hee säd.

Jesus reinicht dän Tempel

(Mat 21,12-17; Luk 19,45-48; Joh 2,13-22)

15Aus hee no Jerusalem kjeem, jinkj hee em Tempel nenn un funk aun dee rut to joagen dee doabennen koften un vekoften. Hee schmeet de Jeltwakjsla äare Deschen un de Duwenhendla äare Benkjen om, 16un leet kjeenem mea siene Woa derch dän Tempel droagen. 17Un aus hee an lieed, säd hee: Steit doa nich jeschräwen: “Mien Hus saul een Bädhus fa aule Velkja jenant woaren”? Oba jie haben eene Reibaheel doarut jemoakt. #Jes 56,7; Jer 7,11 18De Huagepriestasch un Schreftjelieede hieeden daut, un sochten no eene Uasoak am omtobrinjen. See hauden Angst fa am; wiels daut gaunze Volkj sikj äwa siene Lieren wundad. 19Un aus daut ieescht Owent wort, jinjen see #11,19 Eenje oole Schreften sajen hee. ut de Staut rut.

Een Hanwies opp daut Jerecht äwa Israel

(Mat 21,20-22; 6,14)

20Un aus see zemorjes bie dän Fiejenboom vebie jinjen, sagen see daut dee bat en de Wartel vedrieecht wia. 21Petrus foll bie, waut Jesus jesajcht haud, un säd to am: Liera #11,21 ooda Rabi kjikj, de Fiejenboom, opp dän du dän Fluch lädsd, es vedrieecht. 22Jesus auntwuad un säd: Habt Gloowen aun Gott! 23Ekj saj junt de Woarheit: Wäa to disen Boajch sajen wudd: Häw die opp un schmiet die en daut Mäa! un em Hoat nich doaraun twiewelt, oba jleeft, daut daut passieren woat, woat daut kjrieen wuano hee frajcht. #Mat 17,20; Mrk 9,23 24Doawäajen saj ekj junt: Om wautemma jie bäden, jleeft daut jie daut kjrieen, un jie woaren daut haben. #Mat 7,7; Joh 14,13; 1Joh 5,14-15 25Un wan jie stonen un bäden, un jäajen wäm waut haben, dan sell jie däm daut vejäwen, daut jun Voda em Himmel junt june Fälasch uk vejäwen kaun. #Mat 5,23-24; 6,14-15 26Oba wan jie nich vejäwen, woat jun Voda em Himmel, junt june Fälasch uk nich vejäwen.

Wuahäa haft Jesus sien Machtrajcht?

(Mat 21,23-27; Luk 20,1-8)

27Dan kjeemen see wada no Jerusalem. Un aus hee em Tempel romjinkj, kjeemen de Huagepriestasch, de Schreftjelieede un Eltestasch, 28un säden to am: Derch waut fa eene Macht deist du dit? Ooda wäa haft die daut rajcht jejäft dit to doonen? 29Jesus auntwuad un säd to an: Ekj woa junt uk waut froagen; jäft mie eene Auntwuat, un dan woa ekj junt uk sajen, wäa mie daut rajcht jeft dit to doonen. 30Sajcht emol: Wia Johanes siene Doop vom Himmel ooda von Menschen? 31See hauden mank sikj eene Berodunk un säden: Wan wie sajen: Vom Himmel, dan woat hee sajen: Wuarom jleewd jie am dan nich? 32Oba wan wie sajen: Von Menschen? Doatoo ferchten see de Menschen, wiels dee hilden Johanes fa eenen grooten Profeet. #Luk 7,29-30 33Un soo säden see to Jesus: Wie weeten nich. Dan säd Jesus to an: Dan saj ekj junt uk nich, wäa mie daut rajcht jeef dit to doonen.

Currently Selected:

Markus 11: PB

Highlight

Compare

Copy