Josua 8

Josua siene Kjrichslest

1De Har säd to Josua: Fercht die nich un vezoag nich! Moak die met daut gaunze Kjrichsvolkj toop opp un go no Ai! Horch, ekj hab dän Kjennich von Ai met daut Volkj en siene Staut toop, un sien Launt, die en diene Macht jejäft. 2Du saust met de Staut un äaren Kjennich krakjt soo omgonen aus du met Jericho un äaren Kjennich jedonen hast. Oba dit mol derw jie junt daut Kjrichskaptol un daut Vee endeelen. Lot een Poat von june Mana sikj dicht bie de Staut vestäakjen! #5Mo 20,10-18; Jos 6,21 3Josua muak sikj met daut gaunze Kjrichsvolkj toop opp, om no Ai to reisen. Un Josua socht sikj 30.000 stoakje Kjrieja ut un schekjt dee de Nacht veropp 4un säd an: Jie sellen eene hinjarigjsche Grupp hinja de Staut sennen. Oba blieft nich too wiet auf von de Staut daut jie aulen Tiet reed sent toom aunjriepen. 5Ekj woa met daut gaunze Kjrichsvolkj waut bie mie es, bat dicht aun de Staut komen. Un wan de Mana von Ai ons dan entjäajen komen soo aus daut ieeschte mol, dan well wie fa an ranen, 6om daut see ons hinjaraun jejoacht komen. Soo woa wie dee von de Staut wajchlocken; see woaren denkjen, wie ranen wada fa an soo aus daut ieeschte mol. Un dan wan wie fa an ranen, #Jos 7,5 7sell jie ut junen Vestäakj äwadäl komen un de Staut ennämen. De Har, jun Gott, woat dee en june Macht jäwen. 8Un wan jie de Staut enjenomen haben, dan stekjt dee met Fia aun, soo aus de Har daut jesajcht haft. Un hoolt junt strenj aun miene Wieed! 9No Josua siene Aunordnunk, jinjen see loos un loagaden sikj, om von hinjen auntojriepen tweschen Betel un Ai, aun de wastne Sied Ai. Josua oba bleef de Nacht äwa bie daut Kjrichsvolkj. 10Zemorjes muak hee sikj tiedich opp un deed daut Volkj ordnen un jinkj met de Leida von Israel daut väaschte ver daut Volkj no Ai. 11Un daut gaunze Kjrichsvolkj, waut bie am wia, jinkj doahan un kjeem bat dicht ver de Staut un loagad sikj aun de nuadne Sied Ai, soo daut bloos een Tol tweschen an un Ai wia. 12Josua haud oba bie 5.000 Mana jenomen un dee aus hinjarigjsche Grupp tweschen Betel un Ai, aun de wastne Sied Staut hanjestalt. 13Un see stalden daut Volkj von daut Loaga, waut aun de nuadne Sied Staut wia, soo opp, daut et bat aun de wastne Sied Staut rieekjt. Un Josua jinkj de Nacht medden en daut Tol nenn.

14Aus de Kjennich von Ai daut enwort, muaken de Mana ut de Staut sikj schwind opp un jinjen loos toom Kaumf jäajen Israel. Hee jinkj met sien gaunzet Kjrichsvolkj no däm Plauz, waut no daut Jordantol han op es, om an dort auntojriepen. Wiels hee wist daut nich, daut am eene hinjarigjsche Grupp aun de aundre Sied Staut aunjelajcht wia. 15Josua un siene Grupp stalden sikj soo, aus wan see fa an nojäwen un ranen musten, un randen no de Stap opptoo. 16Dan worden aule Mana ut de Staut toopjeroopt, om de Israeliten to vefoljen. Un aus see Josua hinjaraun juagen, worden see von de Staut wajchjelokt, 17soo daut kjeen Maun en Ai ooda Betel trigjbleef, waut nich metjegonen wia, om Israel to vefoljen. See leeten de Staut hinja sikj op stonen un juagen Israel hinjaraun.

De Staut Ai woat enjenomen un venicht

18Dan säd de Har to Josua: Strakj diene Haunt met däm Spies jäajen Ai ut; ekj jäw de Staut en diene Henj. Un aus Josua dän Spies en siene Haunt jäajen de Staut utstrakjt, 19dan kjeem de Grupp von hinjen schwind ut äaren Vestäakj un randen en de Staut nenn, neemen dee en un stekjten de aun un vebrenden dee. 20Aus de Mana von Ai sikj omkjikjten, sagen see dän Ruak von äare Staut no Hecht gonen, un see kunnen no kjeene Sied mea flichten. Wiels de Israeliten waut no de Stap opptoo randen, wongen om un kjeemen jäajen dee, dee an vefoljden. 21Josua un de aundre Israeliten sagen uk daut de Ruak von de Staut enne Hecht jinkj, un daut de hinjarigjsche Grupp de Staut enjenomen haud. Doawäajen wongen see om un jreepen de Mana von Ai aun. 22Un dee ut de Staut kjeemen uk rut an entjäajen, un de Mana von Ai jeroden tweschen de Gruppen von Israel, soo daut kjeena von an met däm Läwen doavon kjeem. 23Bloos däm Kjennich von Ai jreepen de Israeliten läwendich un brochten däm no Josua. 24De Israeliten muaken aule Mana von Ai, waut an hinjaraun jejoacht wieren, opp daut opne Flekj en de Stap, met äa schoapet Schwieet doot. Dan jinjen see en de Staut nenn un schluagen uk aul dee doot waut trigjebläwen wieren. 25Un waut aun disen Dach to dood kjeemen, wieren 12.000 Mana un Frues, aule Enwona von Ai. 26Josua trock siene utjestrakjte Haunt met däm Spies nich ea trigj, bat de Baun aun aule Enwona von Ai derchjefieet wia. 27Bloos daut Vee un de aundre wieetvolle Sachen ut de Staut hilden de Israeliten fa sikj, soo aus de Har daut derch Josua aunjeordnet haud. 28Dan brend Josua Ai dol un muak dee fa emma to eenen Ausch un Prellklompen, waut doa vondoag noch licht. 29Dän Kjennich von Ai honk hee aun eenen Boom bat aum Owent. Aus de Sonn unjajinkj, säd Josua, daut see däm Dooden vom Boom nämen sullen, un see schmeeten däm unja daut Stautspuat un muaken eenen grooten Steenaklompen äwa am, waut doa bat disen Dach noch to seenen es. #5Mo 21,22-23

Een Aultoa woat jebut un daut Jesaz woat väajeläst

30Dan bud Josua däm Harn, Israel äaren Gott, opp dän Boajch Ebal eenen Aultoa, #5Mo 27,2-8 31soo aus Moses, däm Harn sien Deena, de Israeliten daut jesajcht haud, soo aus daut em Jesazbuak von Moses jeschräwen steit: Eenen Aultoa von onbehakte Steena, waut met kjeen Iesa beoabeit sent. Opp disen Aultoa brochten de Israeliten däm Harn Brauntopfa un Dankopfa. #(31 un 32) 2Mo 20,25; 24,1-8 32Josua schreef opp de Steena eene Aufschreft von daut Jesaz, waut Moses ver de Israeliten äare Uagen jeschräwen haud. #5Mo 17,18 33Un daut gaunze Israel, met de Leida, Aumtslied un Rechta, un soo uk de framde stunden aun beid Sieden von de Bundeskjist de Priesta ut däm Staum Levi jäajenäwa, waut däm Harn siene Bundeskjist druagen. Eene Halft no däm Boajch Garizim han un de aundre Halft no däm Boajch Ebal han. Soo aus Moses, däm Harn sien Deena, verhäa aunjeordnet haud, daut Volkj Israel to säajnen. #(33-35) 5Mo 11,29; 27,12-26; 28,1-68 34No däm leet Josua aule Wieed ut daut Jesaz, dän Säajen un dän Fluch, väaläsen, krakjt soo aus daut em Jesazbuak jeschräwen steit. 35Doa wia kjeen Wuat, waut Moses aunjeordnet haud, waut Josua nich väaläsen leet ver de gaunze Jemeent von Israel un ver de Frues un Kjinja un de framde, waut bie an wieren.

Currently Selected:

Josua 8: PB

Highlight

Copy

Compare