Josua 5

1Aus aul de Kjennichs von de Amorita, waut aun de wastne Sied Jordan wonden, un aule Kanaanita Kjennichs aum Meddelmäa daut hieeden, woo de Har däm Jordan ver de Israeliten utdrieejen leet, bat daut gaunze Volkj Israel doa derchjegonen wia, wort an Angst fa de Israeliten, un see veluaren aulen Moot. #Jos 2,24; 3,16

De Beschniedunk un daut ieeschte Passafast en Kanaan

2Dan säd de Har to Josua: Moak die Massasch von Steen un doo aule Maunslied en Israel beschnieden, soo aus daut aul emol ea wort. #1Mo 17,12-14; 2Mo 4,25 3Dan muak Josua sikj steenane Massasch un beschneet de Maunslied von Israel opp eenen Plauz, dee von dan aun Väahut Eewa heet. 4Un dit es de Grunt, wuarom Josua dee beschneet: Aule Maunslied, waut ut Ägipten rutjetrocken wieren, aul dee waut bie de Utwaundrunk ut Ägipten Kjrieja wieren, wieren oppe Reis derch de Wiltnis jestorwen. 5Aus de Israeliten Ägipten veleeten, wieren aule Maunslied beschnäden; oba dee waut oppe Reis derch de Wiltnis jebuaren wieren, dee wieren nich beschnäden worden. 6De Israeliten waundaden 40 Joa en de Wiltnis, bat daut gaunze Volkj utjestorwen wia, dee aus Kjrieja ut Ägipten jetrocken wieren, wiels see däm Harn siene Stemm nich jehorcht hauden, un de Har an vesproaken haud: Jie sellen daut Launt nich seenen, waut ekj june Vodasch vesproaken hab, daut Launt, waut von Malkj un Honnich äwarant! #4Mo 14,22-23 7Äare Säns, dee de Har haud oppwaussen loten un aun äare Städ stunden, dee beschneet Josua. Wiels see dee hinjawäajes nich beschnäden hauden wieren dee noch onbeschnäden. 8No däm aus dee aula wieren beschnäden worden, bleewen see doa em Loaga, bat de Wunden jeheelt wieren. 9Un de Har säd to Josua: Vondoag hab ekj de ägiptische Schaund von junt raufjenomen. Un dise Städ wort Gilgal jenant bat dän vondoagschen Dach. #Jos 4,19

10Aus de Israeliten bie Gilgal opp de Stap bie Jericho äa Loaga hauden, fieeden see aum 14. Dach en de 1. Moonat aum Owent daut Passafast. #(10 un 11) 2Mo 12,6.39; 3Mo 23,10.14; 2Kjen 23,21-22; Hos 9,15 11Aum näakjsten Dach eeten see toom ieeschten mol von daut, waut em Launt Kanaan jewossen wia: Jereeschte Jeträajd Kjieena un onjesuadet Broot. 12Von disen Dach aun hieed uk daut Mauna opp, wiels see nu von daut Jeträajd em Launt äten kunnen, soo daut de Israeliten von däm Dach aun kjeen Mauna mea fungen. See eeten aul en daut ieeschte Joa von de Arnt em Launt Kanaan. #2Mo 16,35

Gott schekjt eenen stoakjen Helpa

13Aus Josua dicht bie Jericho wia, kjikjt hee opp, un sach daut doa een Maun ver am stunt, waut een ut de Scheed jetroknet Schwieet enne Haunt haud. Josua jinkj no am un fruach: Jehieescht du to ons ooda to onse Fiend? #4Mo 22,23.31 14Hee säd: Beides nich. Ekj sie de Befälshaba äwa däm Harn sien Häa; un sie nu jrod jekomen. Dan schmeet Josua sikj ut Ieaforcht ver am han un säd: Waut haft mien Har sienen Deena to sajen? 15Dan säd de Befälshaba äwa däm Harn sien Häa to Josua: Trakj die de Schoo ut, wiels du steist opp heilje Grunt! Un Josua deed, waut hee am säd. #2Mo 3,5

Currently Selected:

Josua 5: PB

Highlight

Copy

Compare